Шығыс Қазақстанда қоңыр аюлардың саны 4,5 мың басқа жетті. Экология министрлігінің деректеріне сәйкес, жыл сайынғы популяция өсімі шамамен 50%-ды құрайды, деп хабарлайды turkystan.kz.
Ведомство келесі жылы оларды ату лимитін ұлғайту мүмкіндігін жоққа шығармайды. Бұл туралы Сенат кулуарларында ҚР экология және табиғи ресурстар вице-министрі Нұркен Шарбиев мәлімдеді.
Шарбиевтің айтуынша, ШҚО-да әзірге аюлардың адамдарға шабуылдау оқиғалары тіркелмеген. Алайда алыс ауылдық округтерде малға шабуылдау жағдайлары болған.
«Мұндай жағдайларда жануарлар санын реттеу қарастырылған. Шығыс Қазақстан облысында акимат жанынан аюларды атуға құқығы бар арнайы ұйым жұмыс істейді. Олардың қызметтік қаруы мен осындай шараларды жүргізе алатын жедел жасақтары бар. Ұқсас жұмыстар қабандар мен қасқырларға да жүргізіледі, себебі олар реттелетін түрлерге жатады», — деді ол.
Оның айтуынша, атуға арналған лимиттер жыл сайын жануарлардың саны мен биологиялық негіздемеге сүйене отырып бекітіледі. Бұл деректерді аңшылық шаруашылықтары, сондай-ақ мемлекеттік «Охотзоопром» ұйымы жинайды.
«Аюлардың жыл сайынғы популяция өсімін біз шамамен 50% көлемінде бағалаймыз. Қазіргі уақытта Шығыс Қазақстанда 4,5 мыңға жуық қоңыр аю бар. Сондықтан келесі жылы лимиттердің ұлғаюы мүмкін», — деді Шарбиев.
Ол тіркелген малға шабуылдар жаппай сипат алмағанын да қосты.
