Адвокат Ләззат Ахатова «боксшы Жанқош Тұраров зорлады» деп мәлімдеген Әнару Құрманәлі ісіне қатысты тағы бір мәлімдеме жасады, деп хабарлайды turkystan.kz.
Ол бұл істен не себепті кеткенін айтып, жәбірленуші тарапқа қатысты өз күмәнін ашық білдірді. Ахатованың айтуынша, қыз тағдырына араласамын деген ниеті соңында оған жүйкелік және моральдық ауыртпалық алып келген.
«Өмірде ең жек көретінім – желідегі «разборка» еді. Қайтейін?! Басыма түсті. Қыз тағдырына немқұрайды қарамайық деген «жалпақшешейліктің» зардабы өзімізге тиді, ақырында.
Ол қыз ешкімнің жақсылығын түсінбейтін, адамдықтың ауылынан алыс адам екен. Туған-туыстары мен әкесі текке безінбепті. Суайт, фантазер, намыссыз жан екен. Адам баласы туралы, әсіресе қыз бала туралы бұлай сөйлемеуші едім. Осы суайт үшін қанша жүйкем мен энергиямды жоғалттым. Қазақта әбден түңілгенде «Әй, адам болмайды-ау» дейді ғой. Соңында менде де дәл сол күй болды. «Адам боларына» сенім жоғалғасын, істі тоқтатып, қош айтысуға мәжбүр болдым. Ол қыз әкесіне өкпелі. Әкесінде кеткен кегі бар. Анасын екі баламен тастап, басқаға үйленіп кеткені бар, әкесіз өскені бар, одан «әнші болам дегенімді қолдай салмады, әкем мүмкіндігі бола тұра, мені жұлдыз қылмады» деген сасық көкірек бар. Адам әуелі өз шамасына қараушы еді. Бұл қыз өзінің «талантына» қатты сенсе керек. Бұл қыз танымал болу үшін, атын шығару үшін ештеңеден тайынбайтын, намыссыз екен. «Қызым» деп, бауырыма тартып, үйіме қондырып, дәм татқызып жүрген көңілімнен садаға кетсін! Алла бар болса, осы жаласының жазасын тартары сөзсіз. Бірақ мен Аллаға тапсырып, отыра бермеймін. Алдымен заң алдында айтқан өтіріктері, жалған күйесі үшін жауап береді», – деді заңгер.
Оның сөзінше, Әнарудың санасын есірткі мен ішімдік улап тастаған. Сондай-ақ оны оған тәуелді еткен Жанқош Тұраров екенін де жасырмады.
«Соңына дейін осы қыздың ары мен абыройын жауып, Жанқошты кінәлі етіп кеткен болатынмын. Шын мәнінде бұл қыз оттағандай, екінші тараппен «келісімім» болса, дәл олай жазбайтынымды көзі қарақты адам айтпай-ақ ұғады. Оған бірақ бұл байғұс қыздың басы жетпейді. Мефедрон мен ішімдік адамның санасын улап, мисыз қып қояды ғой. Мефке Жанқош отырғызды деген. Рас та шығар. Оған сенем. Жанқошты жек көретінім де содан. Онымен «келіскен» адам жек көретінін айтпаса керек. Оны мектеп оқушысы да түсінеді. Ал зорланғанына күмәнім көп. Істен кетуімнің басты себебінің бірі де – осы. Есіме түскен ессіздіктерін жасырмай, айтам. Өз абыройын қыз бала өзі ойламаса, әбден бұзылып тынған адамның абыройына мен не үшін бас ауыртуым керек?!», – деді Л. Ахатова.
