شىعىس قازاقستانداعى ەنەرگيا جەلىسىنىڭ 76 پايىزى توزعان

شىعىس قازاقستان وبلىسىنداعى ەلەكتر ەنەرگياسىن تاسىمالدايتىن جالپى قۇرىلعىلاردىڭ 76 پايىزى توزىپ تۇر. ياعني 18 مىڭ شاقىرىم جەلى مەن 60 ستانتسيا جاڭالانۋى ءتيىس. وسىنىڭ كەسىرىنەن سوڭعى كەزدە ايماقتا جارىق ءجيى وشەدى. الىس اۋدان-اۋىلدى ايتپاعاندا، وبلىس ورتالىعى وسكەمەننىڭ وزىندەگى تراسفورماتورلىق قوسالقى ستانسالار كەيدە ىستەن شىعادى دەپ حابارلايدى حابار ارناسى.

ال ايماقتاعى ەنەرگەتيكالىق كومپانيا ماماندارى كەي جەلىلەر مەن قوسالقى ستانسالاردىڭ جاڭارماعانىنا 40-50 جىل بولعانىن ايتادى. ەل دامۋىنداعى ەڭ وزەكتى سانالاتىن سالاعا جاڭعىرتۋ جۇمىستارى قاشان جۇرگىزىلەدى؟

وڭىردەگى ەنەرگيا توڭىرەگىندەگى ەڭ نەگىزگى ءارى قاۋىپتى پروبلەما تۇتىنۋشىلارعا قاتىستى بولىپ تۇر. اسىرەسە وسكەمەننىڭ وزىندەگى كەيبىر كوپ قاباتتى ۇيلەردىڭ كىرەبەرىسىندەگى ەلەكتر سىمداردارىنان ادام شوشىرلىق. اشىق-شاشىق جۇيەلەردى تۇرعىنداردىڭ وزدەرى جوندەيدى. ال ونىڭ سوڭى كەيدە قايعىلى جاعدايعا اكەپ سوقتىرادى. وسىنداي نەمقۇرايلىلىقتان جىل باسىنان بەرى 68 ءۇي ورتەندى.

كەيبىر ترانسفورماتورلىق قوسالقى ستانتسيالار وتكەن عاسىردا قويىلعان. قالاداعى 1600-دەن استام كوپقاباتتى ءۇي مەن الەۋمەتتىك نىساندارعا ەنەرگيا تاراتۋشى جۇيەلەر مەن قۇرىلعىلار ابدەن ەسكىرگەندىكتەن، جۇكتەمەنى كوتەرمەي قالادى.

كونستانتين دىكين، وبلىستىق تجد ءورت زەرتحاناسىنىڭ ينجەنەر-سىناقشىسى:

-بۇرىن سالىنعان ۇيلەردەگى ىشكى، سىرتقىسىمدار كوبى شەكتىك مولشەردەگى ەلەكتر جۇكتەمەسىنە ەسەپتەلمەگەن. ال قازىر تۇتىنۋشىلاردىڭ سانى وسكەن سايىن جالپى ەنەرگيا جۇيەسىنە دە اۋىرتپالىق تۇسەدى. سوندىقتان كەي جاعدايلاردا كابەلدەر قىزىپ، ءورت شىعادى.

ءورت شىقپاس ءۇشىن ۇساق كابەلدەردەن باستاپ، جوعارى كەرنەۋلى جۇيلەردى ۇنەمى جاڭالاۋ قاجەت. ايماقتا 35 مىڭ شاقىرىم ەلەكتر جەلىسى، 313 قوسالقى ستانتسيا بار. بۇگىندە ونىڭ 76 پروتسەنتى ەسكى. ياعني 18 مىڭ شاقىرىم جەلى مەن 60 ستانتسيا جاڭالانۋى ءتيىس. ەنەرگەتيكا باسقا سالالارعا قاراعاندا 10-15 پايىز ىلگەرى دامۋى ءتيىس. سەبەبى ەلدىڭ جان-جاقتى دامۋى تىكەلەي ەنەرگيا كوزىنە تاۋەلدى. سوندىقتان توزعان جەلىلەر مەن قوسالقى ستانتسيالاردى ۇنەمى جاڭالاۋ ەرەكشە ستراتەگيالىق ماڭىزعا يە. ايماقتىق ەنەرگيا تاسىمالداۋشى كومپانيا تەك ەسكىرگەن قۇرىلعىلاردى جاڭارتۋعا جىل سايىن 500 ميلليون تەڭگە بولگەنىمەن ول جەتكىلىكسىز بولىپ وتىر.

جەلىلەر مەن تراسفورماتورلىق ستانتسيالاردىڭ ەسكىلىگىنەن ەنەرگيا تاسىمالداۋشى كومپانيا جىل سايىن 2 ميلليارد تەڭگەنىڭ قۋاتىن جوعالتادى. ونىڭ باستى سەبەبى وبلىستا قازىر 1031 شاقىرىم جەلى مەن 13 ستانتسيا يەسىز تۇر. ال ايماقتا تاعى ۇساق 19 مەكەمە ەنەرگيا تاسىمالدايدى. ەگەر ولار بىرىكتىرىلىپ، ءبىر جەردەن باسقارۋعا بەرىلسە، ەنەرگيا كوزى بىردەن 1 ميلليارد كيلوۆاتت ساعاتقا ارتادى.

رۋسلان قارمانوۆ، ەنەرگەتيكالىق كومپانيانىڭ باسقارما توراعاسى ورىنباسارىنىڭ مىندەتىن اتقارۋشى:

-ەگەر ۇساق كومپانيالاردى ءبىزدىڭ قاراماعىمىزعا وتكىزگەن جاعدايدا قۋات كوزى ارتادى. بۇل ءبىر. ەكىنشىدەن، قۇرىلعىلاردى جاڭارتۋعا ارنالعان ينۆەستيتسيالىق الەۋەتىمىز الدەنبەك.

ەلىمىز بويىنشا گيدروستانتسيالار ەڭ كوپ شوعىرلانعان وڭىردە ەلەكتر باعاسى دا توقسان سايىن وسەدى. ايماقتاعى بىردەن-ءبىر مونوپوليست «شىعىسەنەرگوترەيد» كومپانياسى 1 كيلوۆاتت ساعات ەنەرگيانى قازىر تۇتىنۋشىلارعا 8-16 تەڭگە ارالىعىندا ساتىپ وتىر. بىراق سوعان قاراماستان ءتاريفتى وسىرۋگە وسى ايدا تاعى ءوتىنىم بەردى.

ۇقساس جاڭالىقتار

Back to top button