Ticketon.kz сервисі көптен күткен Дженнифер Лопестің концертіне билеттердің бағасын жариялады, деп хабарлайды turkystan.kz.
Концерт 10 тамыз күні Алматыдағы Орталық стадионда өтеді. Билет бағалары 40 мыңнан 180 мың теңгеге дейін өзгереді.
Ең қымбат орындар — сахнаның дәл алдында орналасқан VIP-аймақта — мұндай билеттердің бағасы 180 мың теңгені құрайды. Сахнаға жақын қатарлардағы орындарда билет құны 160 мың теңге.
Fan zone және сахнаның екі жағындағы секторлардағы орындар 120 мың теңгеге бағаланған. Би алаңын (Dance floor) таңдаған көрермендер билеттерді 90 мың теңгеге сатып ала алады.
Алысырақ орналасқан секторларды қалайтын көрермендер үшін билет бағасы орынға байланысты 40 мыңнан 80 мың теңгеге дейін өзгереді.
Концерт жаздың ең жарқын музыкалық оқиғаларының бірі болады деп күтілуде және әлемдік поп-жұлдыздың мыңдаған жанкүйерін тартпақ. Ұйымдастырушылар билеттерге сұраныстың жоғары болатынын ескертіп, оларды алдын ала сатып алуға кеңес береді.
