Дәнді және дәнді бұршақ дақылдарға 458,3 мың га, майлы дақылдарға 67,3 мың га, мал азығы дақылдарына 274,0 мың га бөлінсе, картоп 3,5 мың га және көкөніс бақша дақылдары 3,4 мың га отырғызылады.
Егіс науқанын жүргізу үшін 44,9 мың тонна тұқым қажет. Бүгінгі таңда 44,3 мың тонна тұқым жеткізілді, бұл 99% құрайды. Егіс жұмыстары басталғанға дейін тұқымдар сараптамаға жіберіледі, зерттеу жұмыстары жүргізіледі.
«Ауыл шаруашылығы тауарын өндірушілер минералды тыңайтқыштар мен өсімдіктерді қорғау құралдарын сатып алуға шарттар жасасу бойынша жұмыстар жүргізуде. 1,1 мың тонна минералды тыңайтқыштарды сатып алуға келісім жасалды, оның 500 тоннасы жеткізілді», - деді Ақтөбе облысы ауыл шаруашылығы басқармасының бөлім басшысы Нұрбек Райымбаев.
Көктемгі далалық жұмыстарды жүргізу үшін 1,5 мың трактор, егіс жұмыстарына арналған 100-ден астам кешен, 1,4 мың тұқым сепкіш және топырақты өңдеуге арналған 1,4 мың бірлік техника тарту жоспарлануда. Ауыл шаруашылығы техникасының дайындығы 95% құрайды. Егіс жұмыстарын қамтамасыз ету үшін 6,2 мың тонна арзандатылған дизель отыны бөлінді. Шаруашылықтар үшін дизель отынының бағасы литріне 253 теңгені құрайды, бұл нарықтағы бағадан 15%-ға арзан.
Ауыл шаруашылығы құрылымдарын қолдау үшін жергілікті бюджеттен өсімдік шаруашылығына 1,2 млрд теңге бөлінді. Сонымен қатар, биыл «Кең дала-2»бағдарламасы аясында егіс науқанын жылдық 5% пайыздық мөлшерлемемен «Аграрлық несие корпорациясы» және «Ақтөбе» ӘКК арқылы несиелеу жүзеге асырылуда. Қазіргі уақытта 4,9 млрдтеңге сомасына өтінімдер қабылданып, оның ішінде 4,3 млрд теңгеге несиелер мақұлданды және 2,0 млрд теңге берілді. Өтінімдерді қабылдау жалғасуда.
Жалпы, көктемгі дала жұмыстарына дайындық жалғасуда және тұрақты бақылауда.
Мемлекет басшысы Қасым-ЖомартТоқаев IV Ұлттық құрылтайда ауыл шаруашылығының жалпы өнімін алдағы бес жылда екі есе көбейтіп, осы саладағы еңбек өнімділігін үш есе арттыруды міндеттеген болатын. Аталмыш тапсырмаларды орындау мақсатында ҚР Ауыл шаруашылығы министрлігі шаралар кешенін іске асыруда.
