«Жастар Рухы» Жастар қанатының белсенділері Наурызнама онкүндігін ерекше форматта атап өтіп жатыр. 300-ден астам ерікті ұрпақтар сабақтастығын нығайту мақсатында 100-ден астам қарияның үйіне барып, үй шаруасына көмектесіп, ауласын тазалап, айрықша құрмет көрсетті.
Еріктілер қариялардың өмірлік тәжірибесін тыңдап, олардың ақ батасын алды. Өз кезегінде ардагерлер қазақы дәстүр мен ұлттық құндылықтар жайында сыр шертіп, жастарға ізгі тілектерін жеткізді.
Бұл күндері көпшілік Шымкент қаласы мен Жамбыл, Қостанай, Ақмола облыстарында жастар мен аға буын арасындағы рухани байланыстың нық екеніне көз жеткізді.
Қостанай облысындағы «Жастар Рухы» белсенділері Ұлы Отан соғысының ардагері Михаил Федоровтің үйіне барып, оған құрмет көрсетті.
«Ардагерлер – ел тарихының айнасы. Біз үшін оларды құрметтеу – үлкен міндет. Бүгінгі іс-шара барысында қариялардың өткен өмірін тыңдап, өмірлік кеңесін алдық. Мұндай кездесулер жастарға рухани азық болары анық», – деді «Жастар Рухы» Қостанай облыстық филиалының төрағасы Аружан Сарсенбаева.
Ардагер болса жастарға бұл игі дәстүрді жалғастыра беру керек екенін айтты.
«Жастардың жанашырлығы мен ізеттілігі көңілімді көтеріп тастады. Осындай ықылас білдіргендеріңе алғысым шексіз. Бұл дәстүрді жалғастыра беріңіздер», – деп Михаил Федоров өз ризашылығын білдірді.
Шымкент қаласының белсенді жастары да көнкекөз қарияларымызға құрмет көрсетті.
«Ұрпақтар сабақтастығы – халқымыздың ең асыл құндылықтарының бірі. Ардагерлеріміздің айтқан ақыл-кеңесі – біз үшін баға жетпес мұра. Бүгінгі іс-шара – үлкендерге деген алғысымыздың бір көрінісі ғана. Біз бұл дәстүрді алдағы уақытта да жалғастырамыз», – деді «Жастар Рухы» Шымкент қалалық филиалының белсендісі Жанерке Нұрланқызы.
Бұл бастама «Ардагерлерді ардақтайық» партиялық жобасы аясында жүзеге асырылып, жастар арасында үлкенге құрмет, кішіге ізет көрсету дәстүрін дәріптеуге бағытталған.
Ұйымдастырушылардың айтуынша, мұндай іс-шаралар тек мереке кезінде ғана емес, жыл бойына тұрақты түрде өткізіледі.
