Жоғарғы сот өмір бойына бас бостандығынан айырылған сотталғандар туралы мәліметтерді жариялады, деп хабарлады turkystan.kz tengrinews.kz сайтына сілтеме жасап.
Ведомствоның мәліметінше, Қылмыстық кодекстің нормаларына сәйкес, өмір бойына бас бостандығынан айыру аса ауыр қылмыстар үшін тағайындалады.
“Бас прокуратураның Құқықтық статистика және арнайы есепке алу комитетінің 2024 жылғы статистикалық деректеріне сәйкес, бірінші сатыдағы соттар заңды күшіне енген үкімдер бойынша 6 адамды өмір бойына бас бостандығынан айырды”, – делінген Жоғарғы соттың редакция сұранысына берген жауабында.
Соттың мәліметінше:
• Үшеуі Қылмыстық кодекстің 99-бабы (“Кісі өлтіру”);
• Үшеуі 121-бабы (“Сексуалдық сипаттағы зорлық-зомбылық әрекеттері”) бойынша сотталған.
Сонымен қатар өмір бойына бас бостандығынан айыру жазасы басқа мерзімді жазаға ауыстырылған немесе мерзімді жаза өмір бойғы бас бостандығымен ауыстырылған істер бойынша нақты есеп жүргізілмейтіні атап өтілді.
