жұма, 4 сәуір, 2025

Көрісу күні туралы не білеміз?

/
gov.kz
Қазақстанның батыс өңірі 14 наурызда амал мерекесін ерекше атап өтеді.

Жыл басы –  Наурыз мейрамы,  14 наурыз – Көрісу күнінен басталады. Бұл күннің екінші атауы – Амал мерекесі. Бұл мерекенің мәні неде?

Көрісу күнін Наурыз мейрамының бастауы деуге болады. Жан-жануар көкке шығып, адам баласы аққа ауыз тигізетін шақ. Жан-жануар түлеп, түрлі тіршілік иелері ұйқысынан оянатын уақыт. Жер аяғы кеңіп, алты ай қыста хабар-ошарсыз қалған ағайын-туыс бір-біріне жетіп, арқа-жарқа көрісетін мезгіл.

Қазіргідей технология дамымаған, байланыс құралы жоқ ертеректе ұшы-қиыры жоқ Қазақстанның әр өңірін мекен ететін көшпенді ата-бабаларымыз алты ай қыста көрісе алмай, қолы байланған. Жердің тоңы жібіп, күн жылыған шақта ат арытып, көктеуге көшіп, бір-бірінің қонысын аралап, сағынысып көрісетін болса керек. Амандық-саулық сұрасып, мауқын басады.

Мұндағы «амал» сөзі ескіше парсы тілінің «хамал» сөзінен алынған. Наурыз айын парсыша «Хамал» айы деп атауы себепті, «Амал мерекесі» аталса керек. Қазақстанның батыс өңірі 14 наурызда амал мерекесін ерекше атап өтеді.

Бұл күні бір туғандар бір-бірінің үйіне барып, өкпе-реніштерін ұмытып, бір-біріне деген ақ тілектерін жеткізеді. Әулеттің жастары әулеттің үлкендеріне барып, сәлем береді. Бір-біріне кәде-сый, тарту-таралғы береді. «Бір жасың құтты болсын!», «Жыл басы құтты болсын!», «Жылдан жылға аман-есен жете берейік!» деп бірін-бірі құттықтап, жақсылық тілейді. Осылайша Көрісу күнінде басталған қуаныш пен шаттық, он күнге созылған ойын-сауық Ұлыстың ұлы күніне ұласады. Ақ түйенің қарны жарылады. Тоқты шоқжұлдызы туғанда Жаңа жыл басталады.

Бөлісу: