Алкоголизм ми құрылымын өзгертеді – зерттеу

Алкогольдік тәуелділіктен емделіп жүрген ер адамдардың миындағы ойлау мен эмоцияға жауап беретін аймақтарда ми тінінің көлемі азаятыны анықталды. Бұл туралы Psychiatry Research: Neuroimaging журналында жарияланған жаңа зерттеу мәлімдеді.

Ғалымдар ми құрылымындағы өзгерістер есте сақтау мен көңіл-күйдің бұзылуына әсер ететінін, ал бұл өз кезегінде алкоголизмнің ауырлығын күшейтуі мүмкін екенін анықтады.

Алкогольдік тәуелділік – бүкіл әлем бойынша миллиондаған адамды алаңдататын маңызды денсаулық мәселесі. Бұған дейінгі зерттеулер ішімдікке тәуелділік тек мінез-құлықты өзгертіп қана қоймай, мидың ойлау, есте сақтау және эмоцияларды реттеу қызметіне де әсер ететінін көрсетті.

Жоба жетекшісі, Сан-Паулу федералды университетінің профессоры Изабель Кристина Сеспедес бұл зерттеуді жүргізуге алкоголизмнен зардап шеккен адамдар мен олардың отбасыларының қиын жағдайы себеп болғанын айтады.

Ғалымдар Бразилиядағы емдеу орталығында алкогольдік тәуелділікке байланысты ем алып жүрген 50 ер адамды және алкогольге тәуелділігі жоқ 50 сау ер адамды зерттеуге алды. Бірінші топтағы қатысушылар 10-15 күн бойы ішімдік ішпеген және олардың алкогольдік тәуелділігі ресми түрде расталған.

Барлық қатысушының миы 3-Тесла магниттік-резонанстық томографиясы (МРТ) арқылы зерттелді. Нәтижесінде, алкоголизммен ауыратын науқастардың сұр зат көлемі азайғаны анықталды. Бұл аймақтар ақпаратты өңдеуге, эмоцияларды бақылауға және мінез-құлықты реттеуге жауап береді.

Негізгі қорытындылар:

– Алкоголизммен ауыратын ер адамдардың ми құрылымында өзгерістер бар.
– Бұл өзгерістер есте сақтау қабілетінің нашарлауымен және көңіл-күйдің тұрақсыздығымен байланысты.
– Шешім қабылдау қабілетіне қатысты айтарлықтай айырмашылық байқалмады.

Зерттеу тек ер адамдар арасында жүргізілген, сондықтан оның нәтижелері әйелдерге қаншалықты қатысты екені белгісіз. Сондай-ақ кейбір қатысушылардың басқа да есірткі құралдарын қолданғаны ескерілген жоқ.

Ғалымдар бұл мәселені тереңірек зерттеу үшін генетикалық факторларды қарастыратын жаңа зерттеу дайындап жатыр. Изабель Кристина Сеспедестің айтуынша, болашақта алкоголизмнің генетикалық, психологиялық және әлеуметтік факторларын біріктіріп зерттеу жоспарлануда.