Көлденең табыс табуды ойлаған Астана халықаралық әуежайы енді айыппұл төлейді. Мекеме әкімшілігі әуежайға келуші көліктерге арналған тұрақта тегін тұру уақытын 30 минуттан 20-ға дейін қысқартқан болатын. Нәтижесінде әуежай қазынасына - 57 миллион 317 мың 830 теңге пайда түскен.
Табиғи монополияларды реттеу және бәсекелестікті қорғау комитетінің Астана қалалық департаменті осы істің мән-жайын анықтап, тиісті заңнаманың бұзылғанын растады. Мамандандырылған аудан-аралық соты Астана халықаралық әуежайын әкімшілік жазаға тартып, табыс көлемінің бес пайызы мөлшерінде айыппұл салу туралы қаулы шығарды. Енді пайдаға кенелуді көздеген әуежай әкімшілігі 7 милион 816 мың теңге айыппұл төлейді. Сонымен қатар, авто-тұрақтан түскен 57 317 830 теңге де тәркіленді.