Елорда республика күнін ерекше атап өтті
Еліміздің ең ұлық мерекесінің бірі – Республика күніне орай елордада 100-ден астам мәдени-бұқаралық, білім беру, спорттық және әлеуметтік іс-шаралар, соның ішінде мерекелік концерттер, көрмелер, дөңгелек үстелдер, ұлттық спорт түрлері бойынша турнирлер және тағы шаралар өтті. Іс-шаралар орталық алаңдар мен ірі нысандарда, сондай-ақ тұрғын үй аумақтарында, білім беру ұйымдарында және тағы басқа алаңдарда өтті.
Ең алдымен екі күн бойы Республика күні және ҚР мәслихаттарының құрылғанына 30 жыл толуына орай волейболдан турнир өтті. Бұл турнирге 16 команда қатысып, өзара мықты ұжымды анықтады. Олардың арасында Астана қаласы Дене шынықтыру және спорт басқармасына қарасты қалалық Спорттық-бұқаралық іс-шараларды өткізу дирекциясының, Спортты дамыту дирекциясының, Елорда спорт клубының, №5 балалар мен жасөспірімдердің мамандандырылған олимпиадалық резерв спорт мектебінің және №7 балалар мен жасөспірімдер спорт мектебі ұжымының командалары да болды.
160 адам қатысқан турнирдің ашылу салтанатында Астана қаласы мәслихатының депутаты, «AMANAT» партиясы фракциясының мәслихаттағы жетекшісі Ғабит Тәжімұратов пен Астана қаласы мәслихатының депутаты, мәслихаттың бюджет, экономика, өнеркәсіп және кәсіпкерлік мәселелері жөніндегі комиссиясының төрағасы Кендебай Адамбек сөз сөйлеп, қатысушыларға сәттілік тіледі.
«Біз айтулы мереке қарсаңында осындай жарыс ұйымдастырып отырмыз. Спорт – денсаулық кепілі, сондай-ақ достықтың, бірліктің символы. Бәріңізге сәттілік тілеймін. Мереке құтты болсын!», – деді Кендебай Адамбек.
Sana Sport орталығының екі алаңында өткен турнирде командалар 2 күн бойы өзара бақ сынасты. Турнир топтық форматта өтті. 16 қатысушы командалар әуелі 4 топқа бөлініп, өзара 1 кездесуден өтті. Әр топта үздік нәтиже көрсеткен 2 команда турнирдің ширек финалына жолдама алды. Әр топтың жеңімпазы келесі топтың 2-орын алған командасымен кездесті. Турнирге ұлттық деңгейдегі төрешілер төрелік етті. Барлық қатысушыларға, еріктілерге, төрешілерге және турнирді ұйымдастыруға атсалысқан азаматтарға «ҚР мәслихаттарына 30 жыл» естелік медалі табысталды.
Депутат Кендебай Адамбек пен Астана қаласы әкімдігінің Спорттық-бұқаралық іс-шараларды өткізу дирекциясының басшысы Бахтияр Масанов жарыстың жеңімпаздары мен жүлдегерлерін және жарысты жоғары деңгейде өткізуге атсалысқан төрешілер мен еріктілерді марапаттады.
Сондай-ақ Елорданың мекемелері мен кәсіпорындары Республика күнін мерекелеуге арналған патриоттық челлендж өткізді.
Челленджге Астананың ардагерлері, мемлекеттік қызметкерлер, ҚХА мүшелері, ведомстволар мен кәсіпорындардың, мемлекеттік органдардың, жастар ұйымдарының қызметкерлері, ШОБ қызметкерлері мен қала тұрғындары қатысты. Елорда жастары «Ұлттық киім» флешмобын ұйымдастырды. Флешмобқа елордалық жоғары оқу орындарының студенттері мен қазақтың ұлттық киімдерін киген белсенді жастар қатысты. Олар заманауи патриоттық әнге ұлттық нақышта би нөмірін дайындады.
Елордада мерекеге орай автошеру өткізілді. Оған Мемлекеттік Тумен безендірілген 40-қа жуық жеңіл автокөлік қатысқан. Бұл туралы қала әкімдігінің сайты хабарлады.
Мәдениет және ақпарат министрлігінің Жастар және отбасы істері комитеті Республика күніне орайластырылған мерекелер аясында «Астана жастары» ЖРО-мен бірлесіп, мерекелік автошеруді қала жұртшылығы тамашалады. Еліміздің жалауы бар автомобильдер елорданың даңғылдары мен көшелерімен жүріп өтті.
«Баршаңызды Республика күнімен құттықтаймын. Бүгін біз 20 шақырымдық маршрутты жүріп өттік. Мұндай іс-шаралар мемлекеттік мерекелерді есте сақтау және бағалау үшін маңызды», – деп атап өтті Астана автомотоспорт федерациясының басшысы Анатолий Бондарь.
«Біз бұл күн елімізде жоғары деңгейде аталып өтетінін көрсеткіміз келді. Іс-шараның басты мақсаты – мемлекеттік рәміздерді насихаттау, патриоттық шаралардың маңызын сезіндіру. Мұндай іс-шаралар еліміздің әр қаласында өтеді. Бұл автошеру нағыз челлендж бен дәстүрге айналады деп үміттенеміз. Мұндай іс-шаралар жыл сайын өткізіледі. Іс-шараны қолдағандардың барлығына шын жүректен алғыс айтамыз», – деді Жастар және отбасы істері комитетінің жастар саясатын үйлестіру басқармасының басшысы Ақұлан Тастемір.
Елордадағы Достық үйінде өткен конференцияда Қазақстанда медиация институтын дамыту мәселелері талқыланды. Ұйымдастырушылардың айтуынша, бұл шараның мақсаты – отбасындағы даулы және жанжалды жағдайларды шешуде медиацияны қолданудың келешегі, сондай-ақ тұрмыстық зорлық-зомбылықтың алдын алу.
«Біздің конференция Республика күніне арналған. Біз оған көптен бері дайындалып, мықты спикерлерді шақырдық. Сонымен, ҚХА Республикалық медиация кеңесінің төрағасы, Қазақстан Республикасы Президенті жанындағы Ұлттық Құрылтайдың мүшесі Шерзод Пулатов медиаторлардың заңды жауапкершілігіне тоқталды. Отбасылық медиация сияқты өзекті тақырып қызу талқыланды. Өкінішке қарай, соңғы кездері отбасылық зорлық-зомбылыққа байланысты атышулы қылмыстар жиі болып жатыр. Медиация көптеген мәселені өркениетті түрде, жанжалсыз, агрессиясыз шешуге мүмкіндік береді. Мысалы, мұраны бөлу, ажырасу сияқты жағдайларда да маңызды құрал болып саналады», – деді конференция модераторы, заңгер және Астана қалалық ҚХА Достық үйінің медиаторы Роза Бекішева.
Оның айтуынша, дөңгелек үстел барысында азаматтық-құқықтық қатынастардан туындайтын дауларды шешуде, сондай-ақ ұлтаралық жанжалдарды реттеуде медиацияны қолданудың маңызы зор.
«Медиацияның қағидаттары – дауласушы тараптардың өз еркімен әрекет етуі, ал медиатор тарапынан – тәуелсіздік, бейта-
раптық және құпиялылық. Біздің іс-шараға әртүрлі адамдар қатысты: қоғамдық ұйымдардың, қала басшылығының, денсаулық сақтау, білім беру, коммерциялық құры-
лымдардың өкілдері келді. Алайда ең бастысы, біз мұнда жастарды шақырдық. Бұл жерде жастар өте маңызды әрі пайдалы ақпарат алды деп ойлаймын. Біз спикерлерден де сұрадық, олардың барлығы практиктер, сондықтан олардың әрқайсысы еліміздегі медиацияның болашағы мен дамуы туралы өз ұсыныстарын айтты», – деді Роза Бекішева.
Бүгінде Астананың түрлі аудандарында мерекелік концерттер өтеді. Оған елімізге танымал өнер жұлдыздары қатысады.
А. БИМЕНДИЕВА
