"4 баласы бар, қарттар үйінде тұрады, тауға шығады": Әлемдегі ең қарт адам туралы деректер
Ол 70 жасында 3 067 метр биіктіктегі Онтакэ тауына екі рет шыққан.
Жапониялық Томико Итоока әлемдегі ең қарт адам атанды. Ол 116 жасында Гиннесстің рекордтар кітабына енді. Бұған дейін бұл мәртебе 117 жасқа келген Мария Браньясқа тиесілі болатын.
1908 жылы 23 мамырда дүниеге келген Итооканың жасы мен туған күні Геронтологиялық зерттеулер тобының мәліметтерімен расталды. Топ 110 жастан асқан адамдардың деректерін тексеріп, оны әлемдегі ең ұзақ өмір сүрген адамдар тізімінде бірінші орынға қойды.
Томико Итоока – төрт баланың анасы, қазіргі уақытта Ашия қаласындағы қарттар үйінде тұрады. Әлемдегі ең қарт адам атанғаны туралы хабарды алған кезде, ол «Рақмет» деп қана жауап берген. Бұл – оның күтушілеріне жиі айтатын сөзі.
Осака қаласында туған Итоока мектепте волейболмен айналысқан. 20 жасында тұрмысқа шығып, екі ұл мен екі қыз тәрбиелеген. Екінші дүниежүзілік соғыс кезінде күйеуінің тоқыма фабрикасын басқарған.
1979 жылы жұбайы қайтыс болғаннан кейін де, Итоока белсенді өмір салтын жалғастырды. Ол Нара префектурасында он жыл бойы жалғыз тұрып, жиі тау шыңдарын бағындырған, соның ішінде Конго тау жотасындағы Нидзё шыңына көтерілген. 70 жасында ол 3067 метр биіктіктегі Онтакэ тауына екі рет шыққан. Таңқаларлық жайт, ол шыңды арнайы аяқ киімсіз, кәдімгі кроссовкамен бағындырған. 80 жасында Осака 33 Каннон қажылық сапарына қатысып, 33 храмды аралаған. Ал 100 жасында ешқандай таяқтың көмегінсіз Асиядағы жапон ғибадатханасына көтерілген.
Барлық жетістіктеріне қарамастан, Итоока әлі де банан жеп, сүйікті йогуртты сусыны – Calpis ішіп, қарапайым нәрселерден ләззат алады. Үш ай бұрын туған күнін атап өтіп, гүлдер, торт және қала мэрінен ашық хат алған.
