"Киіміңіздің түсі, ауа райы": Жұмысқа орналасуға әсер ететін 8 нәрсе

Жұмысқа тұру үшін сұхбаттасуға бару – стресс тудыратын, сондай-ақ аса маңызды қадам. Сондықтан оған алдын ала дайындалған дұрыс. Кандидаттар әдетте жұмыс тәжірибесі мен кәсіби дағдылар туралы сұрақтарға қалай жауап беру керек екенін жақсы біледі. Алайда, рекрутердің шешіміне әсер етуі мүмкін кейбір маңызды жайттарды ескермей қалуы мүмкін.

Ауа райы 

Зерттеулер көрсеткендей, ауа райы маңызды шешімдерге әсер етуі мүмкін. Бұл кандидатқа да, рекрутерге де әсер етеді. Мысалы, кейбір адамдар белгілі бір ауа райы жағдайында ашуланшақ болып, көңіл-күйі түседі. Егер сұхбат кезінде ауа райы бұлтты немесе жаңбырлы болса, нәтиже шамамен 1%-ға нашарлауы мүмкін. Сондықтан сұхбатқа күн ашық болғанда барған дұрыс.

Кешікпеу

Сұхбатқа ертерек келген дұрыс, өйткені бұл сізді тәртіпті әрі уақытты бағалайтын адам ретінде көрсетеді. Бірақ тым ерте келуге де болмайды, өйткені бұл сіздің тым мазасызданып тұрғаныңызды немесе асықтырып тұрғаныңызды білдіруі мүмкін. Ең дұрысы — сұхбатқа белгіленген уақыттан 5-10 минут бұрын келу.

Бәсекелестер

Егер сізге сол күні өзіңізден күштірек кандидатпен бәсекелес болатыныңыз белгілі болса, кездесуді басқа күнге ауыстырған дұрыс. Рекрутерлер күштірек үміткерлермен салыстыру арқылы басқа кандидаттарға қатысты субъективті пікірде болуы мүмкін.

Киім

Сұхбат — бұл іскерлік кездесу, сондықтан киім үлгісі де маңызды. Рекрутерлер көбінесе кандидаттардың соған сай киінгенін күтеді. Көк, қара және сұр түстер жақсы таңдау бола алады, ал қызыл, сарғыш және басқа ашық түстерден аулақ болған жөн.

Сенімділік

Рекрутер сізге отыруды ұсынғанда, орындық ыңғайсыз болса, оны дұрыстаудан қорықпаңыз. Бұл сіздің сенімді әрі бастамашыл адам екеніңізді көрсетеді, сәйкесінше сіздің жетістікке жету мүмкіндігіңізді арттырады.

Ым-ишара

Рекрутерлер жестикуляцияға және қолдың орналасуына назар аударады. Қолдарды тізеге, үстелге немесе шынтақ қойғыштарға қоюға болады. Бетіңізді немесе шашыңызды ұстамауға тырысыңыз, себебі бұл алаңдау немесе мазасыздану ретінде қабылдануы мүмкін. Қол қусырудан аулақ болыңыз, бұл "жабықпын" дегенді білдіруі ықтимал.

Қол алысу

Сұхбатқа кірер алдында кезекте тұрсаңыз, ұялы телефонмен сөйлесуге немесе кофе ішуге болмайды. Жақсысы — бір қолыңызды бос ұстап, рекрутермен қол алысып амандасуға дайын болыңыз. Бұл сіздің мұқият адам екеніңізді көрсетеді.

Нәтижені қадағалау

Сұхбат нәтижесін қадағалау маңызды. Бұл үшін рекрутерге сұхбаттан кейін бір күн ішінде, жұмыс уақытында хат жазған жөн. Хабарсыз кетсеңіз, бұл сіздің жұмысқа аса қызықпайтыныңызды білдіруі мүмкін.