Ақтөбеде төбелес болып, 5 адам ауруханаға жеткізілді
Полиция қазіргі кезде нақты қанша адамның қамауға алынып, күдікке ілінгенін айтпады.
Кеше түнде Ақтөбе қаласындағы Зауыт көшесінде орналасқан дәмхана алдында бірнеше адам төбелесіп қалған. Үш адам кесіп-тесілген, тағы бір адам жабық бас жарақатымен ауруханаға түсті.
Қонақтардың арасында жанжал туып, бір-бірімен төбелескен. Нәтижесінде бірнеше ер адам түрлі дене жарақатымен ауруханаға жеткізілді. Бұзақылық дерегімен сотқа дейінгі тергеп- тексеру жұмыстары басталды. Қылмысқа қатысы бар тұлғалар анықталып, полиция бөліміне жеткізілді. Қазіргі таңда оқиғаның мән-жайын анықтауға бағытталған тергеу іс-шаралары жүргізіліп жатыр, — деді Ақтөбе қалалық ПБ бастығының бірінші орынбасары Мадияр Әкентай.
Полиция қазіргі кезде нақты қанша адамның қамауға алынып, күдікке ілінгенін айтпады. Ал облыстық денсаулық сақтау басқармасының хабарлауынша, төбелес кезінде барлығы 5 адам зардап шеккен.
31, 30, 29 жастағы ер адамдарда кесіп, тесілген жарақаттары болды. Олардың бірін Ақтөбе медцина орталығына, екіншісін Ақтөбе көпсалалы ауруханасына жеткізді. 28 жастағы бір адам жабық бас-ми жарақатын алған. Сонымен бірге 39 жастағы адам дәрігер көмегінен бас тартты. Оқиға орнына барлығы 2 бригада барды, — деп хабарлады Ақтөбе облыстық денсаулық сақтау басқармасының баспасөз қызметі.
