Бас прокуратура Абай облысындағы ірі орман өртіне қатысты қылмыстық істі сотқа жолданды, деп хабарлайды turkystan.kz Бас прокуратураның баспасөз қызметіне сілтеме жасап.
Өрт 60 мың гектар орман қорын жалмаған. «Семей-Орманы» резерваты Новошульбинск филиалының 14 қызметкері қаза болды.
Прокуратураның мәліметінше, өрттің тұтануына қылқанжапырақты ағаштың діңіне түскен найзағай (құрғақ найзағай) себеп болған.
Аталған нұсқа сарапшы, маман қорытындыларымен, фото/видео түсірілімдерімен, куәлардың айғақтары және қылмыстық істің басқа да құжаттарымен расталады. «Семей-Орманы» резерваты және Новошульбинск филиалы басшылығының іс-әрекеттері Қылмыстық кодекстің 292 бабының 3 бөлігімен сараланып (өрт қауiпсiздiгi талаптарын бұзу, абайсызда екі немесе одан да көп адамның өліміне әкеп соғу, 5 жылдан 10 жылға дейін бас бостандығынан айыру жазасы көзделген), «үйқамақ» түріндегі бұлтартпау шарасы қолданылды. Мамандардың қорытындылары шыққан соң барлық лауазымды тұлғалардың әрекеттеріне құқықтық баға берілетін болады. - деп мәлімдеді Бас прокуратура.
Экология және табиғи ресурстар және төтенше жағдайлар министрліктерінің лауазымды тұлғаларының әрекетсіздік дерегімен тіркелген сотқа дейінгі тергеп-тексеру жалғасуда.