Атырау облысының полицейлері жоғалған баланы кәріз құдығынан тауып, құтқарды, деп хабарлады turkystan.kz.
Polisia.kz сайтының мәліметінше, оқиға Аққыстау ауылында болған.
«19 қыркүйек күні сағат 17:48 шамасында полицияға Аққыстау ауылының тұрғыны хабарласып, 20 минут бұрын үйінен 5 жастағы ұлының жоғалып кеткені туралы мәлімдеген», – делінген хабарламада.
Жедел-іздестіру жұмыстары дереу жүргізілген.
«Полицейлер баланың дыбысын тұрғын үй ауласындағы кәріз шұңқырынан байқап, шығарып алуға талпынған. Кәріз құдығының қақпағы тар болғандықтан бүлдіршіннің денесіне жарақат салмай құтқарып алып шығу үшін 5 минуттай уақыт кетті», – делінген хабарламада.
Баланың денсаулығы жақсы, дәрігерлердің қарауында болды.