Мәжіліс төрағасы Ерлан Қошанов Оңтүстік Кореяда екіжақты кездесулер өткізді
Бүгінде Корея Қазақстан экономикасындағы ең ірі алты инвестордың қатарында.
Корея Республикасы мен Орталық Азия елдері арасындағы ынтымақтастық мәселелері жөніндегі Парламент спикерлерінің бірінші кеңесіне қатысу үшін бір топ Мәжіліс депутаты Сеулге ресми сапармен барды.
Мәжіліс төрағасы Ерлан Қошанов Қазақстан Президенті Қасым-Жомарт Тоқаевтың 2021 жылы Кореяға мемлекеттік сапары екі ел арасындағы кеңейтілген стратегиялық әріптестікке жол ашқанын атап өтті. Оның айтуынша, бүгінде Корея Қазақстан экономикасындағы ең ірі алты инвестордың қатарында.
«Мемлекет басшысының жаңа Жолдауынан кейін елдеріміз арасындағы байланысты нығайтудың өзектілігі тіптен арта түсуде. Қазақстандағы бизнесті, өнеркәсіпті, банк ісін, энергетиканы және IT секторын дамыту үшін бізге Азиядағы экономикасы қарқынды дамып келе жатқан елдің тәжірибесі қызықты.
Біз бұл мәселелерді Корея Премьер-министрі Хан Док Су мырзамен кездесуде талқыладық. Корея Үкіметінің басшысы өндіріс, сауда және білім беру салаларындағы бірлескен жобаларды кеңейту әлеуеті туралы айтты. Екі ел Үкіметі мен Парламенттерінің міндеті – осы әлеуетті іске асыруға жағдай жасау. Осындай қолайлы факторлардың бірі - Қазақстан мен Корея арасындағы әуе қатынасының кеңеюі деуге болады. Бүгінгі таңда «Азиана» компаниясы Алматы мен Сеул арасында аптасына 11 рейс жасайды. Бұл - екі ел арасындағы белсенді іскерлік және әлеуметтік байланыстың айқын көрсеткіші», - деді ол.
Ерлан Қошанов Корея Республикасы Ұлттық Ассамблеясының төрағасы Ким Чжин Пхёмен де кездесті. Мәжіліс спикері екі ел Парламенттері арасында әріптестік қарым-қатынас орнағанын және достық топтары деңгейінде де, комитеттер деңгейінде де белсенді жұмыс жүргізіліп жатқанын атап өтті.
«Корея Республикасы Ұлттық Ассамблеясының төрағасы Ким Чжин Пхёмен де келіссөз жемісті болды. Екі ел Парламенттері арасында жақсы әріптестік қарым-қатынас орнаған. Достық топтары деңгейінде де, комитеттер деңгейінде де белсенді жұмыс жүргізілуде.
Ынтымақтастықты дамыту мәселелері Samsung Electronics компаниясының атқарушы президенті Пак Сунг Химен кездесуде де талқыланды. Корей тарапы Қазақстандағы инновациялық жобалардың үлкен әлеуетін байқап отыр.
Бүгін біз Сеул ұлттық ғылыми-техникалық университетінде де болдық. Бұл оқу орны Кореядағы инженерлік және гуманитарлық ғылымдар бойынша үздіктердің қатарында. SeuolTech университетіне биыл 113 жыл толып отыр. Мемлекет басшысының шетелдік үздік жоғары оқу орындарымен ынтымақтастықты арттыру жөніндегі тапсырмасын орындау аясында жуық арада университеттің Қызылорда қаласында филиалын ашу жоспарлануда. Сонымен қатар оқу орнында түрлі бағдарлама бойынша білім алып жатқан қазақстандық студенттермен де тілдестік.
Ал ертең басталатын Корея және Орталық Азия елдері Парламенттері спикерлерінің кездесуі өңірлеріміздің ықпалдастығындағы жаңа кезеңнің бастауы болатынына сенімдімін», - деді Мәжіліс Төрағасы Е.Қошанов.
