Мәжіліс депутаттары, «AMANAT» партиясы фракциясының мүшелері ҚР Премьер-министрі Әлихан Смайыловқа энергия объектілерінің жай-күйіне қатысты депутаттық сауал жолдады деп хабарлады turkystan.kz.
Онда мәжілісмендер электр станцияларына, жылу және электр желілерінің жабдықтарына, ғимараттары мен құрылыстарына жөндеу жұмыстарын жүргізу, энергия объектілеріне қатысты бақылауды күшейту мәселесін көтерді.
Сауалды Мәжілістің жалпы отырысында депутат Бауыржан Смағұлов оқыды.
«Бүгінгі таңда азаматтарды Қазақстан Республикасының жылу энергетикасы саласында қалыптасқан жағдай алаңдатып отыр. Энергетикалық кәсіпорындардың авариялық аялдамаларының саны 2022 жылы 2021 жылмен салыстырғанда 23%-ға өсті. Бірқатар аймақта жылыту маусымы сәтсіз болды деп айтуға болады. Президенттің тапсырмасы бойынша кәсіпорындарда жүргізілген тексеру жұмыстарының нәтижелері көңіл көншітпейді», – деді ол.
2023 жылдың 1 қаңтарындағы жағдай бойынша жылу энергиясын өндіру секторында орташа жасы 61 жылды құрайтын 37 энергия көзі жұмыс істейді. Жабдықтардың біразы тозған.
«Жабдықтың орташа тозуы 66%-ды құрайды. Кейбір қалаларда бұл көрсеткіш 80%-дан асады», - деп атап өтті мәжілісмен.
Оның айтуынша, Мәжілісте энергетика саласындағы мемлекеттік бақылауды едәуір қатаңдату бойынша заң жобасы қаралып жатыр. Сонымен қатар генерациялардың, жылу және энергия желілерінің жай-күйіне әсер ететін бірқатар мәселе Энергетика министрлігінің Заңға тәуелді нормативтік-құқықтық актілерімен реттеледі.
«Тағы бір мәселе, коммуналдық жылумен жабдықтау жүйелерінің тозу мәселелері шешілмеген күйінде қалды. 2014 жылы желі иелерінің мүдделерін лоббилеу нәтижесінде өнеркәсіптік қауіпсіздік саласындағы уәкілетті орган заңды және заңға тәуелді деңгейде құбырларды жобалау, оларды пайдалану және жөндеу процесіне бақылау жүргізу бойынша қосымша талаптар қою мүмкіндігін жоғалтты. Нәтижесінде 12 мың шақырым жылу желілерінің 3 500 шақырымы толық ауыстыруды талап етеді», - деді Мәжіліс депутаты.
Жоғарыда айтылған мәселелерге байланысты заңның қабылдануын күтпей, депутаттар мынандай шараларды қолдану қажет деп санайды:
- электр станцияларының, жылу және электр желілерінің жабдықтарына, ғимараттары мен құрылыстарына техникалық қызмет көрсету мен жөндеуді ұйымдастыру бөлігінде қолданыстағы заңға тәуелді нормативтік құқықтық актілерге өзгерістер енгізу;
- жылу желілерінің нақты параметрлерін (қысым, температура) ескере отырып, «қысыммен жұмыс істейтін жабдықты пайдалану кезінде өнеркәсіптік қауіпсіздікті қамтамасыз ету қағидаларын» қайта қарау;
- жөндеу жұмыстарын жоспарлау үшін жылумен жабдықтау қызметтеріне шекті тарифтерді бекіту туралы шешім қабылдау.
«Өз тарапымыздан біздің фракция заңнамалық деңгейде мемлекеттік бақылауды күшейтуді және елдің энергетикалық объектілерінің жай-күйі үшін жауапкершілікті қамтамасыз етеді», - деп атап өтті Бауыржан Смағұлов.
