Astana hub халықаралық IT стартаптар технопаркінде «Agritech – Efficiency & Resiliency» атты халықаралық конференциясы өтті. Жиында ауыл шаруашылығын дамытуда жоғары технологиялық әдістемелер талқыланды.
Жиын барысында қатысушылар аграрлық секторда диджитал технологияларды пайдалану, шаруашылық қожалықтарға арналған цифрлық мүмкіндіктер, Франция мен Қазақстан компаниялары арасындағы ықпалдастық мәселелерін талқылауда.
Конференцияға Пьер Пулен (Valeur-Tech Франция), Илан Мезьер (Connecting Food), Дидье Канесс (Францияның Қазақстандағы елшісі), Ауылшаруашылық вице-министрі Бағлан Бекбауов, ҚР цифрлық даму, инновациялар және аэроғарыш өнеркәсібі вице-министрі Асқар Жамбакин, Серік Толукпаев (Aitas холдингі), Нұрлан Оспанов (Қазақстан астық өндірушілер одағы), Талғат Алдажаров (Aitas Agro), Мағжан Мәдиев (Astana Hub) және т.б. қатысты.
Халықаралық конференцияда алғашқы болып Францияның Қазақстандағы елшісі Дидье Канесс сөз сөйледі.
«Франция - ауыл шаруашылығы саласындағы көшбасшылардың бірі. Біз ноу-хау, жаңа технологиялармен бөлісе аламыз. Қазақстанда ауыл шаруашылығы қарқынды дамып келеді. Территориясы ауқымды мемлекеттердің қатарында. Сондықтан екі ел арасындағы ынтымақтастығымыздың перспективасы зор. Мына шараға Қазақстан мен Франция компаниялары қатысуда. Олар ауыл шаруашылығын тұрақты дамытуға қол жеткізу, сондай-ақ аграрлық саланың өнімділігі мен тиімділігін одан әрі ұлғайту ісінде бірлесе жұмыс істейді деген сенімдеміз, әрі оған цифрландыру айқын ықпал етеді» - деді Францияның Қазақстандағы елшісі.
«Франция елінің технологиясын зерттеп, тиімдісін пайдалануға Қазақстан мүдделі», - деді Ауыл шаруашылығы вице-министрі Бағлан Бекбауов.
Өз сөзінде екі ел арасында ынтымақтастықты арттырып, бірге нәтижелі жұмыс істеу мәселесінің жан-жақты талқыланып жатқанын айтты.
Айта кетсек, бүгінде еліміздің аграрлық секторында бірқатар шаралар атқарылуда. Экологиялық қауіпсіздік талаптарын ескере отырып, өнімділікті, өнім сапасын және өндірістің экономикалық тиімділігін арттыру үшін агротехнологиялар белсенді түрде қолданылуда.
«Цифрландыру мәселесі ауылшаруашылық саласы үшін аса маңызды. Біз француз серіктестерімен бірлесіп жұмыс істеуге қызығушылық танытамыз. Өзіміздің де бөлісетін тәжірибеміз бар. Экономиканы дамытамыз десек, ІТ шешімдерсіз жүзеге асыру мүмкін емес. Бұл қай саланы болмасын шығындарын азайтып, табысты өсірудің қолайлы әдісі. Сондықтан француз әріптестерімізбен ұзақ мерзімді трендтерге икемделген және тұрақты қарастырып жатырмыз», - деді өз сөзінде «Aitas group» компаниясының бас директоры Серік Толықбаев.
Қазақстандық кәсіпкер Мақсұт Бақтыбаевтың айтуынша, жаңа технологияларды енгізу өндіріс тиімділігін ғана арттырып қоймай, түсімнің өзін 20-30% арттыруға ықпал етеді.
«Цифровизацияға ерте ме, кеш пе, бәріміз келеміз. Бүгінде онсыз даму жоқ. Өндіріс орындары, кәсіпкерлер өнімнің құнын төмендетіп, пайданы өсіретін ІТ технологиялар екендігін түсінуі керек», - деді Мақсұт Бақтыбаев.
Франция компаниялары еліміздегі ауыл шаруашылығын дамыту үшін өз технологияларымен бөлісуге даяр екендігін жеткізді.
«Біз Қазақстан компанияларымен бірге жұмыс істеуге мүдделіміз. Мысалы, біздің компания қызметін Азия, Африка елдері пайдаланады» - деді Паскаль Вензак Weather Force метео-компаниясының құрылтайшысы.
Ұйымдастырушылардың айтуынша, конференцияның өткізілуіне Aitas Digital, My Easy Farm Platform, Weather Force Company, Connecting Food Platform, Astana Hub Technopark, The Grain Union of Kazakhstan, Most Holding, Thales Alenia Space, Qoldau Internet Resource компаниялары қолдау білдірді.
