Көкшетауда өтіп жатқан турникке тартылудан Tartyl Fest республикалық спорттық фестивалінде 81 жастағы қария Владислав Изюмский тамаша өнер көрсетті деп хабарлады turkystan.kz ҚазАқпаратқа сілтеме жасап. Жарысқа қатысушылардың арасында жасы ең үлкен қарияның айтуынша, Tartyl Fest фестивалі салауатты өмір салтын ұстанған жастар мен жасөспірімдер үшін жақсы мотивация.
«Осындай жарыстың өтетінін жақында ғана естідім. Сол себепті, тыңғылықты дайындалып үлгермей, өз деңгейімнен аз тартылдым. Дегенмен, жас кезімде спортпен шұғылданғандықтан 24 рет тартылу мен үшін онша ауыр болмады. Жалпы, атмосфера күшті, барлығы керемет болып жатыр», - дейді Tartyl Fest фестиваліне қатысушы 81 жастағы қария Владислав Изюмский.
Айта кетсек, Tartyl Fest фестивалі еліміздің 20 қаласында 10 шілде мен 6 қыркүйек аралығында өтпекші. Көкшетау - ҚР Президенті жанындағы «Дара» таланттарды қолдау қорының ұйымдастыруымен өтіп жатқан аталмыш фестивальді қабылдап отырған 14-қала. Мұндағы жарысқа барлығы 278 адам қатысты. Оның ішінде ең жасы 5 жасар қыз - щучелік Валерия Дмитриева болды.
Tartyl Fest-ке қатысушылар 9 санат – салмақ және жас ерекшеліктері бойынша жарысады. Әр қаладан 27 жеңімпаз таңдалып алынады, жеңімпаздар Нұр-Сұлтан қаласында өтетін ақтық сынға жолдама алады. Гранд-финалдың жүлде қоры – 54 млн теңге.