«اۋىل اماناتى»: پارتيا مۇشەلەرى 74 اۋىلدىق وكرۋگتى ارالادى

«AMANAT» پارتياسى ۇكىمەتپەن بىرلەسىپ جۇزەگە اسىرىپ كەلە جاتقان «اۋىل اماناتى» جوباسى بويىنشا اۋقىمدى اقپاراتتىق مارافون جالعاسۋدا دەپ حابارلادى turkystan.kz پارتيانىڭ ءباسپاسوز قىزمەتىنە سىلتەمە جاساپ.

باستى ماقسات – اۋىل تۇرعىندارىنا تابىسىن، ءال-اۋقاتى مەن ءومىر ءسۇرۋ ساپاسىن ارتتىرۋعا كومەكتەسۋ.

بيىل ساۋىردە مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس «2025 جىلعا دەيىن حالىقتىڭ تابىسىن ارتتىرۋ باعدارلاماسى» بەكىتىلدى. اۋىل تۇرعىندارىنىڭ جىلدىق مولشەرلەمەسى 2،5%-دى قۇرايتىن جەڭىلدەتىلگەن نەسيە الۋىنا، كووپەراتيۆ قۇرۋ جانە تەحنيكانى ليزينگكە رەسىمدەۋ كەزىندە كومەك الۋىنا مۇمكىندىك پايدا بولادى. وسى باعدارلاما اياسىندا پارتيا ۇكىمەتپەن بىرلەسىپ «اۋىل اماناتى» جوباسىن جۇزەگە اسىرۋدا.

28 شىلدەدە پارتيا مۇشەلەرى اۋقىمدى اقپاراتتىق مارافوندى باستادى. سونىڭ بارىسىندا شىعىس قازاقستان، ماڭعىستاۋ، اقمولا جانە اتىراۋ وبلىستارىنداعى 74 اۋىلدىق وكرۋگتى ارالاپ ۇلگەردى.

ماسەلەن، شىعىس قازاقستان وبلىسىندا پارتيا مۇشەلەرى 18 اۋىلدىق ەلدى مەكەندە بولىپ، 700-گە جۋىق ادام جوبامەن تانىستى.

«شىعىس قازاقستان وبلىسىنىڭ تۇرعىندارى جوباعا ەرەكشە قىزىعۋشىلىق تانىتىپ وتىر. قويىلعان سۇراقتاردىڭ كوبىسى 2،5 پايىزدىق نەسيەگە بايلانىستى بولدى. تۇرعىندار بانكتە نەمەسە قازاگرو جەلىسىندە راسىمدەگەن نەسيەدەن گورى، وسىنى تولەۋ وڭاي دەپ سانايدى»، – دەيدى بيزنەس-ترەنەر جۇماگۇل ماقاشەۆا.

اتاپ ايتقاندا، تارباعاتاي اۋدانىنداعى تۇعىل اۋىلىنىڭ تۇرعىندارى باعدارلاماعا بەلسەندى قاتىسۋعا بەل بايلاپ وتىر.

«جۇمىسسىزدىق، بايانسىز بولاشاق پەن نەسيە، سۋبسيدياعا قاتىستى قيىندىقتار ادامداردى اۋىلدان كوشۋگە ماجبۇرلەدى. تۇرعىندار اۋىل شارۋاشىلىعىمەن اينالىسقىسى كەلگەنىمەن، ەشقانداي مۇمكىندىك بولماعان سوڭ اينالا ازىپ-توزا باستادى. بۇل جاعداي شەكارا شەبىندە ورنالاسقان اۋىلىمىز ءۇشىن اسا قاۋىپتى. سوندىقتان اتالعان جوبا اۋىلدى گۇلدەندىرىپ، جاستار تۋعان جەرىندە جۇمىس تابادى، قالاعا كوشىپ كەتپەيدى دەپ ۇمىتتەنەمىن»، – دەيدى جەرگىلىكتى تۇرعىن سەرىكبول ورالباەۆ.

جىلدىق مولشەرلەمەسى 2،5%-دى قۇرايتىن جەڭىلدەتىلگەن نەسيە جونىندە تولىعىراق پارتيا جانىنداعى «اۋىل اماناتى» جوبالىق كەڭسەسىنىڭ باسشىسى نۇركەن شاربيەۆ ايتىپ بەردى. ول بىردە-ءبىر كوممەرتسيالىق بانكتە جەكە تۇلعا ءدال وسىنداي شارتپەن نەسيەنى راسىمدەي المايتىنىنا نازار اۋداردى.

«قاراجات رەسپۋبليكالىق بيۋدجەتتەن بولىنەدى. نەسيە الەۋمەتتىك-كاسىپكەرلىك كورپوراتسيالار ارقىلى رەسىمدەلەدى. تۇرعىنداردان كەلىپ تۇسكەن وتىنىشتەردى اۋىلدىق وكرۋگ اكىمدىگى جيناپ، اگەنتكە جولدايدى. 7 جىلعا دەيىنگى مەرزىمگە بەرىلەتىن نەسيەنىڭ ەڭ جوعارى سوماسى – 2500 اەك (شامامەن 8 ملن. تەڭگە). تۇرعىندار كوبىنەسە، بۇل اقشاعا مال ساتىپ الادى. كەيبىرەۋلەرى ناۋبايحانا سياقتى شاعىن بيزنەس نىساندارىن اشادى»، – دەدى ول.

مال شارۋاشىلىعى نەمەسە مايلى داقىلداردى ءوسىرۋ سياقتى كاسىپ باعىتىن ايقىنداۋعا اۋىلدىق وكرۋگتەردىڭ اكىمدەرى كومەكتەسەدى. ول ءۇشىن «AMANAT» پارتياسىنىڭ ساياسي مەنەدجمەنت اكادەمياسى اۋىل، اۋىلدىق وكرۋگ اكىمدەرىنە جانە «AMANAT» پارتياسى وڭىرلىك فيليالدارىنىڭ اتقارۋشى حاتشىلارىنا ارنايى كۋرستار وتكىزدى. حالىقتىڭ ەكونوميكالىق بەلسەندىلىگىن ارتتىرۋ سالاسىنداعى بىلىكتىلىكتى جەتىلدىرۋ بويىنشا 2346 ادام وقىتىلدى. ەندى اۋىل تۇرعىندارىنا كەزەك كەلدى.

اقمولا وبلىسىنداعى 30 اۋىلدىق ەلدى مەكەننىڭ تۇرعىندارى تابىستى ارتتىرۋ باعدارلاماسىنىڭ جاي-جاپسارىمەن جانە «اۋىل اماناتى» جوباسىمەن تانىستى. اسىرەسە، كووپەراتيۆ قۇرۋ مۇمكىندىگى ەرەكشە تارتىمدى كورىنەدى. ونىڭ مۇشەلەرى وزدەرىن جەم-شوپپەن قامتاماسىز ەتىپ، ءونىم وتكىزۋ كەزىندە ءبىر-بىرىنە كومەك كورسەتە الادى. سونداي-اق، قاجەت بولعان جاعدايدا شيكىزاتتى قايتا وڭدەيتىن ءوندىرىس ورىندارىن ۇيىمداستىرۋعا مۇمكىندىك پايدا بولادى.

«كووپەراتيۆ قۇرعاننان كەيىن جەم، تۇقىم جانە تىڭايتقىش ساتىپ الا الامىز. كەم دەگەندە 5 ادام بىرىگىپ كووپەراتيۆ قۇرىپ، جىلدىق مولشەرلەمەسى 2،5%-دى قۇرايتىن جەڭىلدەتىلگەن نەسيەمەن ليزينگكە تەحنيكا مەن جابدىق ساتىپ الۋىنا بولادى. ەندى بۇعان اۋىلداستارىمدى كوندىرۋىم كەرەك»، – دەيدى اۋىل تۇرعىنى عيززات شولاقوۆ.

اماناتتىقتاردىڭ ايتۋىنشا، كووپەراتسيانىڭ بارلىق قاعيداتىن ساقتاعان جاعدايدا، كووپەراتيۆ مۇشەلەرى ءۇشىن قىزمەت قۇنى نارىقتان الدەقايدا تومەن بولادى. سونىمەن قاتار، وبلىس اكىمدىكتەرى كاسىبي اگرونومداردىڭ، ۆەتەرينارلار مەن مەحانيزاتورلاردىڭ، زووتەحنيكتەردىڭ كووپەراتيۆكە قاتىسۋىن قامتاماسىز ەتەدى.

ماڭعىستاۋ وبلىسىندا پارتيا مۇشەلەرى 12 اۋىلدىق ەلدى مەكەندى ارالاپ شىقتى. مۇنايلى اۋدانى ماڭعىستاۋ اۋىلىنىڭ تۇرعىنى مايرا مامبەتوۆا 15 جىلدان استام ۋاقىت ءىس تىگۋمەن اينالىسىپ كەلەدى. ونىڭ ايتۋىنشا، جەڭىلدەتىلگەن نەسيە مەن «اۋىل اماناتى» جوباسى وعان ناعىز بيزنەسپەن اينالىسۋعا كومەكتەسەدى.

«اقشا الىپ، ءوز تسەحىمدى، ءتىپتى فابريكامدى اشا الامىن. بۇل ناعىز سەرپىن، زور جەتىستىك بولار ەدى. قازىر ەكى بولمەلى پاتەردە 50 كورپە تىگىپ جاتىرمىن. بۇل دا ءوندىرىس. الايدا جالعىز تىگەمىن. ەگەر كومەكشىلەرىم، جۇمىسشىلارىم بولسا، وسى 50 كورپەنى 3 كۇندە تىگىپ تاستار ەدىم»، – دەيدى مايرا مامبەتوۆا.

پارتيا مۇشەلەرى اقپاراتتىق مارافون اياسىندا ارنايى بارعان اتىراۋ وبلىسىنىڭ تۇرعىندارى دا تابىسىن ارتتىرىپ، ءوزىن-ءوزى قامتاماسىز ەتۋگە نيەتتى. اماناتتىقتار بارلىعى 14 اۋىلدى ارالادى. اتاپ ايتقاندا، ولار يندەر اۋدانىنىڭ ورلىك اۋىلىنا بولدى.

«ءوز ءىسىمدى قالاي جەتىلدىرۋدى، قاتەلىك جىبەرمەۋدى ۇيرەندىم. اقشا تابۋ ءۇشىن تەك نيەتتەنىپ قويۋ جەتكىلىكسىز. بيزنەس-جوسپار قۇرا ءبىلۋ كەرەك. ونى قورعاپ، پايدا اكەلەتىنىن دالەلدەي العاننان كەيىن عانا نەسيە بەرەدى. قازىر جاستاردىڭ مول مۇمكىندىگى بار. اۋىلدا بالاباقشا، وقۋ ورتالىعىن اشۋعا بولادى. مۇنداي باستامالاردى قولداۋ قاجەت»، – دەدى كاسىپكەر بيبىگۇل شاحمانوۆا.

ءموبيلدى توپتار ەلىمىزدىڭ ءار وڭىرىندەگى 394 اۋىلدىق ەلدى مەكەنگە بارۋدى كوزدەپ وتىر. ساپار 10 قىركۇيەككە دەيىن جالعاسادى.

ۇقساس جاڭالىقتار

Back to top button