ەلوردادا 250 جەدەلساتىنىڭ توزىعى جەتكەن

ەلورداداعى تۇرعىن ۇيلەردە 250 جەدەلساتى ابدەن توزعان. ال قالادا جىل سايىن ءارى كەتكەندە نەبارى 10 ليفت اۋىستىرىلادى دەپ حابارلادى turkystan.kz «حابار 24» ارناسىنا سىلتەمە جاساپ.

جەدەلساتى كومپانيالار قاۋىمداستىعى وكىلدەرىنىڭ مالىمدەۋىنشە، استانالىقتار تۇرعىن ءۇيدى جاڭارتۋ باعدارلاماسىنا قاتىسقىسى كەلمەيدى. ويتكەنى ونىڭ شىعىنى كوپ. سالدارىنان جەدەلساتىلار ءجيى ىستەن شىعادى.

وسىدان بىرەر كۇن بۇرىن الەۋمەتتىك جەلىلەردە ەلوردالىق تۇرعىن ءۇي كەشەندەرىنىڭ بىرىندە جەدەلساتى قۇلاعان بەينەروليك تارادى. ونىڭ ىشىندە قىزىمەن بىرگە بولعان نينا قوجاحمەتوۆا 14-قاباتتان 1-قاباتقا تۇسپەك بولدى. الايدا ءۇشىنشى قاباتقا جەتكەندە ليفت ىستەن شىعىپ، جوعارى جىلدامدىقپەن جەرتولەگە قۇلعان.

«ليفت قۇلاعاندا ءبىز تەز ارادا ديسپەتچەرگە حابارلاستىق. ول بىزگە جەدەلساتى جوندەۋدەن ءوتىپ جاتقانىن ايتتى. ەگەر ول جوندەلىپ جاتسا، ونىڭ ەسىگى مۇلدەم اشىلماۋى كەرەك ەدى عوي. قاتتى قورقىپ قالدىق. بىراق جاراقات العان جوقپىز»، – دەدى قالا تۇرعىنى نينا قوجاحمەتوۆا.

مەنشىك يەلەرى بىرلەستىگى توراعاسىنىڭ ايتۋىنشا، بۇل ۇيدە ورناتىلعان جەدەل ساتىلار ەسكى بولىپ شىقتى. قۇرىلىس كومپانياسى 2006 جىلى كەشەندى سالعاندا مۇندا جاڭا ليفت ورناتۋدى ءجون كورمەدى. شىدامى تاۋسىلعان تۇرعىندار جەدەلساتىنى اۋىستىرۋ تۋرالى شەشىم قابىلدادى.  الايدا ولار بيىلعى تۇرعىن ۇيلەردى جاڭارتۋ باعدارلاماسىنا ىلىگە المادى.

بىراق جەدەلساتىنى ءوز ەسەبىنەن اۋىستىرعىسى كەلەتىن تۇرعىندار از كورىنەدى. كوبىنىڭ قالتاسى مۇنداي شىعىنداردى كوتەرە المايدى.

«پاتەر يەلەرىنىڭ وزدەرى ءليفتىنى اۋىستىرۋعا قارسى شىعادى. ويتكەنى ولار بيۋدجەتتەن جاڭارتۋعا بولىنەتىن قارجىنى 8 جىلدا قايتارۋى ءتيىس. سوندىقتان بولار، قالادا جىل سايىن 3-10 ليفت اۋىستىرىلىپ جاتىر. بىلاي ەسەپتەپ قارايتىن بولساق، ءار پاتەر ايىنا نەبارى 2 مىڭ تەڭگە تولەيدى. مەنىڭ ويىمشا، ول كوپ ەمەس»، – دەدى قالالىق جەدەلساتى كومپانيالارى قاۋىمداستىعى توراعاسىنىڭ ورىنباسارى ۆلاديمير تاباشنيۋك.

جەدەلساتىلاردىڭ قاۋىپسىزدىگىنە پاتەر يەلەرىمەن بىرگە قالا اكىمدىگى دە جاۋاپ بەرەدى. بىراق ينسپەكتور سانى از بولعاندىقتان ءتيىستى تەكسەرىستەر ۋاقتىلى وتكىزىلمەيدى. سوندىقتان ماماندار تەك شاعىم تۇسكەن كەزدە عانا باقىلاۋ جۇرگىزە باستايدى.

«ءبىزدىڭ باسقارماعا نەمەسە قالا اكىمدىگىنە تۇرعىنداردان شاعىم جازباشا تۇردە كەلىپ تۇسەتىن بولسا، ءبىز تەكسەرىس جۇرگىزەمىز. سونداي-اق 4 اۋداندىق اكىمدىكپەن بىرگە پروفيلاكتيكالىق جۇمىس جۇرگىزەمىز. ولارعا ءتۇسىندىرۋ، تەحنيكانى پايدالانۋ بويىنشا جينالىس ۇيىمداستىرامىز»، – دەدى قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ ءبولىم باسشىسى راحىمجان بەكتانوۆ.

ايتا كەتسەك، ەلىمىزدە سوڭعى 4 جىلدا جەدەلساتىلارعا قاتىستى 13 توتەنشە جاعداي تىركەلگەن. ولاردىڭ 8-ءى ادام ولىمىنە اكەپ سوقتىردى. سول سەبەپتى ءار ءۇيدىڭ تۇرعىندارىنا ءوز قاۋىپسىزدىگىن ويلاپ، جەدەلساتىنى دەر كەزىندە جوندەپ نەمەسە اۋىستىرۋىنا تۋرا كەلەدى.

ۇقساس جاڭالىقتار

Back to top button