سقو-دا كاسىپكەرلەر جەردى مەملەكەتكە قايتارۋعا مىندەتتەلدى

سولتۇستىك قازاقستان وبلىسىندا مال شارۋاشىلىعىن دامىتىپ وتىرعان شارۋالار يەلىگىندەگى جەر ۋچاسكەلەرىن مەملەكەتكە قايتارۋ قاجەتتىگى تۋرالى سوتتان تالاپ-ارىز الىپ جاتىر دەپ حابارلادى turkystan.kz قازاقپاراتقا سىلتەمە جاساپ.

سقو كاسىپكەرلەر پالاتاسى ءباسپاسوز قىزمەتىنىڭ مالىمەتىنشە، كاسىپكەرلەر بۇرىن جايىلىمدار مەن شابىندىقتار ءۇشىن بەرىلگەن جەر ۋچاسكەلەرى بويىنشا مامىلەلەردى جارامسىز دەپ تانۋ تۋرالى سوتتان تالاپ-ارىز الىپ جاتىر. ولاردى وبلىستىق اۋىل شارۋاشىلىعى جانە جەر قاتىناستارى باسقارماسى سوتقا بەرگەن. قازىر وبلىستىڭ مامانداندىرىلعان اۋدانارالىق ەكونوميكالىق سوتىندا 16 ازاماتتىق ءىس قوزعالدى.

زاڭ كەڭەسشىسى ەلەنا پريگوجەنكونىڭ ايتۋىنشا، باسقارما وسىنداي 35 سوت ءىسىن دايىنداعان. تالاپ-ارىزعا جەر ۋچاسكەلەرىنىڭ ءبىر كەزدە ەلدى مەكەندەر شەگىندە جانە كونكۋرستار وتكىزىلمەي بەرىلگەنى سەبەپ بولعان. كەي جاعدايلاردا زاڭبۇزۋشىلىقتار 10، ءتىپتى 15 جىل بۇرىن جاسالعان. شارۋالار دا، كاسىپكەرلەر پالاتاسىنداعى جۇمىس توبىنىڭ مۇشەلەرى دە كەزىندە شەنەۋنىكتەر جىبەرگەن ولقىلىقتارعا نەلىكتەن ولار جاۋاپ بەرۋى ءتيىس ەكەنىن تۇسىنبەيدى.

«قازىر ىستەرى سوتتا قارالىپ جاتقان شارۋاشىلىقتار ەكونوميكانىڭ ناقتى سەكتورىنا جاتادى. بۇل بيزنەس سۋبەكتىلەرى بەرىلگەن جەر ۋچاسكەلەرىن جاي عانا پايدالانباي، ونىڭ ساپاسىن جاقسارتتى. وڭىردە بۇعان 230 ملن تەڭگەدەن استام قاراجات جۇمسالدى. سونداي-اق 2 ملرد تەڭگەدەن استام سوماعا مال ساتىپ الىنىپ، اۋداندارعا 3 ملرد تەڭگەدەن استام ينۆەستيتسيا سالىندى. ەندى وبلىس بويىنشا اۋىل شارۋاشىلىعى وندىرۋشىلەرى شىعىندارىنىڭ جالپى سوماسى 5،2 ملرد تەڭگەدەن اسپاق»، – دەيدى ەلەنا پريگوجەنكو.

وسىنداي جاعدايعا تاپ بولعانداردىڭ ءبىرى – ع.مۇسىرەپوۆ اتىنداعى اۋداندا جۇمىس جاسايتىن «ۆوزۆىشەنكا سك» جشس. 2012 جىلى سەرىكتەستىك مال شارۋاشىلىعىن دامىتۋ ءۇشىن جەر تەلىمىن العان. وسىلايشا، ەت باعىتىنداعى مال فەرماسىن سالىپ، اقش-تان اسىلتۇقىمدى مال اكەلىندى. وتكەن جىلدان باستاپ سەرىكتەستىك 1 800 باس سيىرعا ارنالعان ءسۇت-تاۋار فەرماسىن سالۋ بويىنشا جوبانى ىسكە اسىرىپ جاتىر. وسى ارالىقتا «ۆوزۆىشەنكا سك» جشس 1352 باس ءىرى قارا ساتىپ الدى.

«بۇل مال جايىلمايدى، قورادا ۇستاۋ قاجەت. ول ءۇشىن جاقسى جەمازىق بازاسى بولۋى كەرەك. 2014 جىلى مال شارۋاشىلىعىمەن اينالىسا باستاعاننان كەيىن بىزگە ۆوزۆىشەنكا اۋىلىنىڭ ماڭىندا ءشوپ شابۋ ءۇشىن جەر بەرىلدى. بۇل جەرلەردى ءبىز ەتتى باعىتتاعى مال شارۋاشىلىعى كەشەنىنىڭ جەم-ءشوپ بازاسىنىڭ ساپاسىن جاقسارتۋ ءۇشىن پايدالانامىز. ال بيىلدان باستاپ ساۋىن سيىرلار ءۇشىن جەم-ءشوپ الۋ ءۇشىن پايدالانامىز. ەندى وسى جەر ۋچاسكەلەرىن قايتارۋدى تالاپ ەتكەن ءىس سوتتا قارالىپ جاتىر»، – دەيدى «ۆوزۆىشەنكا سك» جشس ديرەكتورىنىڭ ورىنباسارى دەنيس پوسوۆەتس.

شارۋالار شابىندىق، جايىلىمدىق جەرلەردى قايتارۋعا تۋرا كەلسە، بارلىق مالدى ەتكە وتكىزۋدەن باسقا امال بولمايدى دەپ وتىر. ال الىنعان جەرلەر ەلدى مەكەن تۇرعىندارىنا اۋىل مالىن باعۋعا بەرىلمەك.

«بىزدە اۋىل تۇرعىندارىمەن ەشقانداي كەلىسپەۋشىلىك جوق. ماعان سەنەن الىنعان جەردى ەكاتەرينوۆكا ەلدى مەكەنىنىڭ حالقىنا بەرەمىز دەپ ايتتى. ول جەردە 5 ءۇي عانا بار، ال اۋىلدىڭ مالى 25-تەن اسپايدى. بۇل ماسەلەنى سوتقا جەتكىزبەي-اق شەشۋگە بولار ەدى عوي. ءبىز ولارعا مالدارىن جايماسىن دەپ وتىرعانىمىز جوق»، – دەيدى «اتاباي» شق-نىڭ وكىلى الفيا قۇلجاباەۆا.

 

ۇقساس جاڭالىقتار

Back to top button