شەكارا بەكەتىن تەكسەرۋگە كەلگەن وفيتسەردى قاساقانا ولتىرگەن كىم؟

جامبىل وبلىسىنداعى شەكارا قىزمەتىندە ءجۇرىپ مەرت بولعان وفيتسەردىڭ جاقىندارى ونىڭ قاساقانا ولتىرىلگەنىنە سەنىمدى. ولاردىڭ ايتۋىنشا، اعا لەيتەنانت ازات ۇمبەت ۇلى “وتەگەن” زاستاۆاسىن تەكسەرۋ بارىسىندا ەسكەرتۋ جاساعان كەزدە زاستاۆا باستىعى وزگە قىزمەتكەرلەردىڭ كوزىنشە سوققىعا جىققان دەپ حابارلادى turkystan.kz كتك ارناسىنا سىلتەمە جاساپ.

 «ەرەگەس باستالعان، «شىق بىلاي» دەگەن، ەرەگەسكەن، قاسىنداعى بالالار اجىراتقان. ءسويتىپ، ەكىنشى رەت باسپالداقتان ءتۇسىپ بارا جاتقان كەزدە ارتىنان كەلىپ ۇرعان، موينىنان. قاتتى زاتپەن، قولمەن ۇرۋ مۇمكىن ەمەس. بىلمەيمىز عوي ەندى، نە ول. ءسويتىپ، بيىك باسپالداقتان قاتتى قۇلاعان. سودان ورنىنان سويلەپ تۇرىپ، قايتا قۇلاعان، سول جەردە»، – دەيدى مارقۇمنىڭ جەسىرى بوتاگوز ىلماعامبەت.

بۇل جاعدايدى كورگەن ارىپتەستەرى بىردەن مارقۇمنىڭ تۋىستارىنا جەتكىزگەنىمەن، ەندى ايتقان سوزدەرىنەن باس تارتىپ وتىر. ال ەكى جىل بۇرىن اقتوبەدەن قوردايداعى شەكارا شەبىنە اۋىسقان ازات ۇمبەت ۇلى مەديتسينا بولىمىنە جەتەكشىلىك ەتىپ كەلگەن.

«وتەگەن» زاستاۆاسىنان اۋىر جاراقاتپەن قورداي اۋدانى ورتالىق اۋرۋحاناسىنا جەتكىزىلگەنىمەن، سول جەردە كوز جۇمدى. ارتىندا ءۇش قىزى مەن اياعى اۋىر كەلىنشەگى قالدى. تۋىستارى ءىستى اسكەريلەر جىلى جاۋىپ قويادى دەپ قورقادى. ال «زاستاۆا باستىعىنىڭ قولىنان ءولىپ وتىر» دەگەندى ازىرگە شەكارا قىزمەتىندەگىلەر راستامادى، جوققا دا شىعارعان جوق.

2022 جىلدىڭ 27-شىلدەسىندە ۇقك شق جامبىل وبلىسى بويىنشا دەپارتامەنتىنىڭ وفيتسەرى ازات ۇمبەت ۇلى قورداي اۋدانى ورتالىق اۋرۋحاناسىندا قايتىس بولدى. ءولىمنىڭ الدىن الا سەبەبى ميعا قان كەتۋىمەن بايلانىستى ەكەنى انىقتالدى. اتالعان فاكتى بويىنشا قر ءىىم وڭتۇستىك وڭىرلىك اسكەري تەرگەۋ باسقارماسى سوتقا دەيىنگى تەرگەۋ امالدارىن جۇرگىزىپ جاتىر.

ۇقساس جاڭالىقتار

Back to top button