«AMANAT» پارتياسىنىڭ جانىنان «جەر اماناتى» كوميسسياسى قۇرىلدى

 «جەر اماناتى» كوميسسياسى پايدالانىلماي جاتقان جانە زاڭسىز بولىنگەن اۋىل شارۋاشىلىعى ماقساتىنداعى جەرلەردى مەملەكەت مەنشىگىنە قايتارۋ ماسەلەسىمەن بەلسەندى اينالىسادى. بۇل تۋرالى «AMANAT» پارتياسىنىڭ اتقارۋشى حاتشىسى اسحات ورالوۆ Facebook-تەگى پاراقشاسىندا جازدى دەپ حابارلادى turkystan.kz.

مەملەكەت باسشىسى قاسىم-جومارت توقاەۆ مۇنداي جەرلەردى مەملەكەت مەنشىگىنە قايتارۋعا جانە ولاردى اۋىل تۇرعىندارىنا قولجەتىمدى ەتۋگە تاپسىرما بەرگەنى بەلگىلى. پرەزيدەنتتىڭ قوعامدىق تىرەگى رەتىندە پارتيا بۇل ماسەلەنى شەشۋگە اتسالىسۋعا كىرىسىپ كەتتى.

جەر كوميسسياسىنىڭ قۇرامىنا: پارتيا حاتشىسى داۋلەت كارىبەك، ماجىلىستەگى «AMANAT» پارتياسىنىڭ دەپۋتاتتارى ايدوس سارىم، ەرلان سايروۆ، جاناربەك ءاشىمجان، قاينار اباسوۆ، ارتۋر پلاتونوۆ جانە باقىتجان بازاربەك، مۇرات ابەنوۆ، مارات ءباشىموۆ، كيريلل پاۆلوۆ، عالىم بايتوق، مارات شيبۇتوۆ، ماقسات تولىقباي سىندى باسقا دا تاۋەلسىز ساراپشىلار مەن قوعام قايراتكەرلەرى كىردى.

اپتا باسىندا پارتيا توراعاسى ەرلان قوشانوۆ قاسىم-جومارت توقاەۆقا «اMANAT» پارتياسىنىڭ قوعامداعى الەۋمەتتىك ادىلدىكتى قامتاماسىز ەتۋگە باعىتتالعان جۇمىسى، ونىڭ ىشىندە كوميسسيا قىزمەتى تۋرالى دا اقپارات بەردى.

ايتا كەتسەك، سوڭعى بىرنەشە اي ىشىندە پارتيا مۇشەلەرىنىڭ كۇشىمەن قاراعاندى، جامبىل، تۇركىستان جانە اقتوبە وبلىستارىنداعى 160 مىڭ گەكتاردان استام جايىلىمدىق جەر مەملەكەت مەنشىگىنە قايتارىلدى.

 

جەر ماسەلەسىن جەدەل شەشۋ ءۇشىن قازاقستاندىقتار بۇگىننەن باستاپ بارلىق زاڭ بۇزۋ فاكتىلەرى تۋرالى «AMANAT» پارتياسىنىڭ «جەدەل جەلى» 8 800 080 44 41 تەلەفونى ارقىلى حابارلاي الادى. وتىنىمدەر WhatsApp ارقىلى دا +77008004441 ءنومىرى بويىنشا قابىلدانادى.

«جەر اماناتى» كوميسسياسىنىڭ جۇمىسى ەلىمىزدىڭ بارلىق وڭىرىندە جالعاسىپ جاتىر.

ۇقساس جاڭالىقتار

Back to top button