ءبىر اياق، ءبىر قولمەن الەمدى مويىنداتقان سپورتشى

اۋىلدا دوستارىمەن ويناپ جۇرگەن بولاشاق چەمپيون ابايسىزدا توق سىمىنا ءتۇسىپ، ءبىر قول، ءبىر اياقتان ايىرىلام دەپ مۇلدە ويلاماعان ەدى. بىراق بۇل وقىس وقيعا قايسار بالاعا كەدەرگى بولا المادى. قانشاما سىناقتى باستان وتكەرىپ، ەلىمىزدىڭ كوك تۋىن تالاي الەمدىك دودادا تىك كوتەرگەن ەرجان سالىمگەرەەۆتىڭ تاعدىرى مەن تارتىس جولى تالايدى تاڭداي قاقتىرارى ءسوزسىز. بۇگىندە ول حالىقارالىق دارەجەدەگى سپورت شەبەرى، الەم كۋبوگىنىڭ يەگەرى، ازيا ويىندارىنىڭ ەكى مارتە جەڭىمپازى. بىراق سپورتشى كوڭىلىنە بۇل ماراپاتتار مەدەۋ ەمەس. ونى الاڭداتار جايت پەن قىنجىلتار دۇنيە مۇلدە باسقا.

فوتو: ايگ
m.123ru.net

– ءسىز حالىقارالىق دەڭگەيدەگى ۇزدىك سپورتشىلاردىڭ ءبىرى عانا ەمەس، ەرەكشە تاعدىردىڭ دا يەسىسىز. ءوزىڭىز «9 جاسىمدا مەنىڭ بالالىق شاعىما نۇكتە قويىلدى» دەپ سيپاتتايتىن وقيعادان سوڭ جارتى جىلداي عانا اربادا وتىرىپ، بالداقپەن جۇرۋگە كوشىپسىز. ءسىزدى سول قادامعا، اياققا تۇرۋعا يتەرمەلەگەن قانداي كۇش؟

– بالالىقتىڭ قىزۋى باسقا تۇسكەن قيىندىقتى ويلاپ، مۇڭايىپ وتىرۋعا مۇمكىندىك بەرمەيدى. ەشتەڭەگە قاراماستان ويناعىڭ كەلەدى، تۇرعىڭ كەلەدى، جۇرگىڭ كەلەدى. مەنى اربادا ۇزاق وتىرعىزباعان دا سول سەزىم. جالپى، مەن كىشكەنتايىمنان وتە ەلگەزەك بالا بولدىم. بارلىعىن تەز ۇعىپ، ۇيرەنىپ الاتىنمىن. ادامدار ەسەيگەن سايىن كوپ تاۋەكەلگە بارۋدان قورقىپ، قورعانشاق بولا باستايدى عوي. ال بالا كەزدە مۇمكىن ەمەس ەشتەڭە جوق سياقتى كورىنەدى. قورقىنىش پەن قايعىعا بالالىق امبيتسيا دا مۇمكىندىك بەرمەيدى. دەگەنمەن ءبىر-اق ساتتە ءومىرىمدى 180 گرادۋسقا اينالدىرىپ جىبەرگەن جاعدايدان العاشىندا «شوك» الىپ قالعانىم راس. بۇل مەنى تەز ەسەيتتى. ارى قاراي قازىرگى بولمىسىمدى قالاي بار، سولاي قابىلداپ، ومىرگە باسقاشا بەيىمدەلۋگە كوشتىم. ءدال وسى وقيعادان سوڭ ماعان ومىردەگى باسقا قيىندىقتىڭ ءبارى تۇككە تۇرعىسىز بولىپ قالدى.

«ءجۇزۋ – ول قوزعالىستاعى مەديتاتسيا» دەگەن ءسوز بار ەكەن. ادامنىڭ جانى مەن ءتانىن دە قاتار ەمدەي الاتىن قابىلەتكە يە بۇل سپورت تۇرىنە قىزىعۋشىلىعىڭىز قاي كەزدە وياندى؟

– مەن – جايىقتىڭ جاعاسىندا وسكەن جىگىتپىن. ءۇيىمىز وزەننىڭ جانىندا ەدى. بالا كەزدەن سوندا بارىپ شومىلاتىنبىز. كەيىن دە «اياعىم جوق، قولىم جوق» دەپ قول قۋسىرىپ وتىرمادىم. جالپى، ەش ارەكەتسىز ءبىر جەردە وتىرۋ ماعان ءتان قاسيەت ەمەس. بۇكىل دەنە مۇشەسى ساۋ ادام جاساي المايتىن دۇنيەنى مەن ءبىر اياق، ءبىر قولمەن جاساپ تاستايتىنمىن. مەن ءۇشىن مۇمكىن ەمەس بيىك تە، الىنبايتىن قامال دا جوق.

 

 

پوسموترەت ەتۋ پۋبليكاتسيۋ ۆ Instagram

 

پۋبليكاتسيا وت ەرجان ساليمگەرەەۆ (@yerzhan.salimgerey)

– «ومىرگە قۇلشىنىسىمدى ارتتىرعان – سپورت» دەپ ايتىپسىز ءبىر سۇحباتىڭىزدا. كەزىندە تۇيە بالۋان بولىپ، كۇرەستەن 3 رەت اتىراۋ چەمپيونى اتانعان اكەڭىزدىڭ سپورتقا بەتبۇرۋىڭىزعا اسەرى بولدى دەپ ويلايسىز با؟

– مەنىڭ ەڭ العاش سپورتقا دەگەن قىزىعۋشىلىعىمدى ارتتىرعان ول – فۋتبول. سەبەبى ءبىزدىڭ اۋىلدا «اتىراۋ» قۇراما كومانداسىنىڭ بازاسى بولعان. سول بازادا بالداقپەن ءجۇرىپ جاتتىقتىم. تاڭعى شايىمدى ىشە سالا مارشرۋتتان مارشرۋتقا ءمىنىپ، سونداعى ويىنشىلاردىڭ ويىنىن كورۋگە كەتەتىنمىن. ال اكەم مەن مەندەگى سپورتقا دەگەن قۇشتارلىقتى بايلانىستىراتىن نارسە بويداعى قان دەپ ويلايمىن. قازاقتا «قاننان كەلگەن»، «قاننان دارىعان قاسيەت» دەگەن ءسوز بار ەمەس پە…

– الەم كۋبوگىندا 100 مەتردە باتتەرفلياي ادىسىمەن جۇزۋدە 1:21،61 ناتيجەسىمەن قارسىلاس شاق كەلتىرمەي چەمپيون اتانعان ەدىڭىز. باتتەرفلياي – جىلدامدىق جاعىنان كرولدەن كەيىن ەكىنشى ورىندا تۇرعان ءجۇزۋدىڭ ەڭ قيىن ستيلدەرىنىڭ ءبىرى ەكەن. بۇل ءادىستى ۇيرەنۋ دە وڭايعا تۇسپەگەن بولار؟

– مەن نەگىزى 100 مەتردىڭ ەمەس، 50 مەتردىڭ مايتالمانىمىن. بۇل ءادىستى مەڭگەرۋ وتە قيىن بولدى. قازىردە دە وڭاي ەمەس. ويتكەنى ونى ءدال مۇگەدەك جاندارعا ارناپ ۇيرەتەتىن كاسىبي ماماندار جوق. وسىنىڭ اسەرىنەن جارىستاردا زارداپ شەككەن كەزىمىز كوپ بولدى. ءدال وسى سالانىڭ دامۋى ءالى كەنجەلەپ تۇر. مىسالى، كۇرەس، بوكس سياقتى سپورت تۇرلەرىنىڭ تاريحى كەمى 300 جىلدى قامتىسا، باتتەرفلياي ءجۇزۋ ءادىسى 10 جىلدىقتى عانا قامتيدى. وسى كەزگە دەيىن باق وكىلدەرىنىڭ پاراسپورت باپكەرلەرى مەن ولاردىڭ بۇل سالاعا كەلۋ جولى مەن مۇگەدەك جاندارمەن جۇمىس جاساۋ دەڭگەيى تۋرالى زەرتتەگەنىن، اشىپ جازعانىن كورگەن ەمەسپىن. بۇل سالادا ەش تاجىريبەسى جوق، بويىنان ءبىز كورگەن قيىندىقتىڭ ءبىرى دە وتپەگەن ماماندارمەن بىرگە جاتتىعۋدىڭ قانداي اۋىر بولاتىنىن ەلەستەتىپ كورىڭىزشى. كاسىبي بىلىگى از، بىزبەن قالاي جۇمىس جاسارىن بىلمەي ولار تۇرادى، ناعىز باپكەردىڭ قولداۋى مەن كومەگىنە مۇقتاج بوپ ءبىز تۇرامىز. سونداي ساتتەردە وسى مۇگەدەك جاندارمەن جۇمىس جاسايتىن مامانداردى ارنايى وقىتاتىن، دايىندايتىن ۋاقىت تۋا ما ەكەن دەگەن ويعا قالامىن. باسىندا قينالعانبىز، ءالى دە قيىندىقتار بار. ءبىزدىڭ كورسەتەر ناتيجەمىز باپكەرلەردىڭ كاسىبيلىگىنە تىكەلەي بايلانىستى. ەگەر مەن ون ەكى مۇشەسى تۇگەل ادام بولسام، كەز كەلگەن سپورت سەكتسياسىنا جازىلىپ، قاتىسا بەرۋشى ەدىم. ول جەردەگى ماماندار دا بىلىكتى، بارىنەن حاباردار. ال مۇگەدەك ادام قانداي سپورتپەن اينالىسا الادى؟ وعان كىم كومەكتەسەدى؟ ماماندار بىلاي تۇرسىن، ول سپورت ءتۇرى دە قازاقستاندا جوق بولىپ شىعۋى مۇمكىن. ءسىز ماعان سۇراق قويىپ وتىرسىز. ەندى سىزگە مەن ءبىر سۇراق قويايىنشى؟

– ءيا، ارينە.

– ءبىزدىڭ ەلدەگى ەكونوميكا قانداي جاعدايدا داميدى دەپ ويلايسىز؟ دامىعان 30 مەملەكەتتىڭ قاتارىنا قاي كەزدە كىرەمىز؟

– اۋىل شارۋاشىلىعىن دامىتۋ، ەلگە قاجەتتى كاسىپورىنداردى اشۋ…

– جوق، ءسىز ايتقاننىڭ ەشقايسىسى دا ەمەس. ءبىز قاي كەزدە داميمىز؟ مۇگەدەك جاندارعا كوشەگە ەش قيىندىقسىز شىعىپ، دۇكەننەن وزىنە قاجەتتى زاتىن ساتىپ الا الاتىن جاعداي جاسالعاندا. ولار ەش جەردە، ەشكىمنەن قىسىم، ەش جەردەن كەدەرگى كورمەي ەركىن ءجۇرىپ-تۇرعانىن قالايمىن. مىسالى، زاعيپ جاندارعا ارنالعان ارنايى جول بولۋى كەرەك. ال اربامەن جۇرەتىن ادامعا كەز كەلگەن قوعامدىق ورىنداردا پاندۋستار ورناتىلۋ كەرەك. مىنە، سول كەزدە عانا مەملەكەتتىڭ الەۋەتى دە، ەكونوميكاسى دا داميدى. سونداي ۋاقىتقا قاشان جەتەمىز؟ مەنى مازالايتىن كوپ سۇراقتىڭ ءبىرى – وسى! مەنىڭ ماقساتىم – اتى اڭىزعا اينالعان سپورتشى بولۋ ەمەس، باي بولۋ ەمەس، ەلدەگى جارىمجان جانداردىڭ جاعدايىن تۇزەۋگە ۇلەس قوسۋ، سولاردىڭ تاعدىرى ءۇشىن كۇرەسۋ. سول ءۇشىن وسى سالانى باستادىم. ەگەر اقشانى، اتاقتى قالاسام، وسى كەزگە دەيىن شەتەلدەن ءتۇرلى ۇسىنىستار ءتۇستى. يران، دۋباي، امەريكا قۇراما شتاتتارىنا دا شاقىردى. ال مەن نەگە قازاقستاندا ءجۇرمىن؟ ماعان قوماقتى اقشا دا بەرىلگەن ەمەس، تۇراقتى جالاقى، جەكە بيزنەس تە جوق. ءتىپتى، وسى كۇنگە دەيىن سپونسورىم دا بولماعان. باسقا دەنى ساۋ سپورتشىلاردى قاراساڭ، ءبىر باسىندا بىرنەشە دەمەۋشىدەن بار. ويتكەنى قوعام بىزگە تەك پاراليمپيادا كەزىندە عانا نازار اۋدارادى دا، باسقا ۋاقىتتا ەشكىمگە كەرەك ەمەسپىز. ءتىپتى، جەتىستىككە جەتكەن پاراليمپيادا جەڭىمپازدارىنىڭ وزىنە دۇرىس كوڭىل بولىنبەيدى. تەك سايىس كەزىندە، ارنايى تاپسىرما بەرىلگەندە بولماسا، جۋرناليستەردىڭ ءوزى ءبىز تۋرالى كوپ نارسە بىلە بەرمەيدى، بىلگىسى دە كەلمەيدى. بۇعان دەيىن تالاي تەلەكانالعا باردىم، كوپ جۋرناليسپەن جاقىن تانىس بولدىم، سودان تۇيگەنىم – وسى. قولداۋدى كوبىنە قول-اياعى ساۋ، دەنى سپورتشىلارعا كورسەتەدى. ميلليونداعان اقشا دا سولارعا بولىنەدى. ال ءبىز «جىرتىعىمىزعا جاماۋ» تابا الماي جۇرەمىز. سودان كەيىن مۇگەدەك سپورتشىلاردىڭ كوڭىلى قالىپ، بارىنەن كۇدەر ۇزە باستايدى.

– جۇزۋدەن باسقا قانداي ءحوببيىڭىز بار؟ ءسىزدىڭ ادەمى قوڭىر داۋسىڭىز بار دەيدى. جانە بۇرىن ءان دە شىعارعان ەكەنسىز.

– كەيبىر جەردە «سپورت مەنىڭ ءومىرىمدى تۇبەگەيلى وزگەرتتى» دەپ جازادى. وعان كەلىسپەيمىن. مەن جۇزۋگە بەت بۇرعانعا دەيىن دە ءوزىمدى وزگە سالالاردا قالىپتاستىرىپ ۇلگەرگەن ەدىم. ءوزىمدى جان-جاقتان سىناپ كورۋدەن ەشقاشان جالىقپادىم. قازىر مىسالى ءوز كولىگىمدى ءوزىم جۇرگىزىپ ءجۇرمىن. سپورتقا كەلمەستەن بۇرىن «جاستار ساياساتىندا» دا جاقسى جۇمىس ىستەدىم. ءبىر ءبولىمنىڭ جەتەكشىسى لاۋازىمىنا دەيىن كوتەرىلدىم. «نۇر وتان» دەلەگاتسياسىمەن بىرگە ۇلكەن قالالارداعى جينالىستارعا قاتىستىم. ال ونەر سالاسىنا كەلسەك، اقىلبەك جەمەنەي سياقتى ەسترادا جۇلدىزىمەن بىرگە ءان شىرقاپ، ول كىسى مەنى الماتىعا شاقىرىپ، پروديۋسەرىم بولۋعا دا ۇسىنىس جاسادى. وقۋ وقىپ جۇرگەسىن، ءارى اتا-انامدى ويلاپ اتىراۋدا قالدىم. كەيىن دە ءتۇرلى ۇسىنىستار بولدى. بىراق مەن «مۇندا اقشا بار، مۇندا اتاق بار» دەگەن جىلتىراعان دۇنيەنىڭ بارىنە جۇگىرگەن ەمەسپىن. قاي جەردە شىندىق پەن ادىلەت بار، مەن سول جەردەمىن. سول كەزدە عانا ءومىرىڭ دە، كوڭىلىڭ دە جارقىن. ال ەگەر ادام وزگەنى الداپ-ارباپ، ارامدىق ويلاپ جەتىستىككە جەتەتىن بولسا، ار الدىندا دا، قۇداي الدىندا دا جۇرەگى تىنىش بولا المايدى.

– ءبىر اياقپەن جۇگىرىپ، جاتتىعۋ جاساپ جۇرگەنىڭىزدى كورىپ ەدىم ينستاگرام پاراقشاڭىزدان. 24 كگ-دىق گىر تاسىن كوتەرىپ جاتقانىڭىزدى دا بايقاپ قالدىم. جالپى، بالداقسىز جۇگىرۋ، جاتتىعۋعا قالاي داعدىلاندىڭىز؟

– بالا كەزىمنەن بالداقپەن ءجۇرىپ فۋتبول وينادىم، جۇگىردىم، ءجۇزدىم. سونىڭ ءبارى بويىمداعى سپورتقا قاجەت بەيىمشىلدىك، شاپشاڭدىق، توزىمدىلىك سياقتى قاسيەتتەردى دامىتتى. ءوز قاتارلاستارىمنان بولەك، ەرەسەك بالالارمەن بىرگە جۇرەتىنمىن. ولار جاساعان جاتتىعۋدى، بالداقپەن جۇرگەن مەن دە جاسايتىنمىن. توققا تۇسكەنگە دەيىن قانداي شاپشاڭ، قابىلەتتى بولسام، اياق-قولىمنان ايىرىلعاننان كەيىن دە ول ماعان كەدەرگى بولا المادى. ءالى دە سول ءوز-ءوزىمدى شىڭداۋ مەن قايراۋدىڭ ناتيجەسىندە ءجۇرىپ كەلەمىن.

 

 

پوسموترەت ەتۋ پۋبليكاتسيۋ ۆ Instagram

 

پۋبليكاتسيا وت ەرجان ساليمگەرەەۆ (@yerzhan.salimgerey)

– «ءار ءتۇرلى موتيۆاتسيالىق كەشتەرگە بارامىن. ولاردىڭ ەشقايسىسىنان باس تارتپايمىن. سەبەبى مەنىڭ جاعدايىمدى باستان كەشىپ جاتقان قانشاما ادام بار. ولار ماعان قاراپ، ەڭسەلەرىن كوتەرۋى ءتيىس» دەپسىز. سىزدەن موتيۆاتسيا الىپ، ءومىرىن وزگەرتكەن ادامدار بار ما؟

– ونداي ادامداردىڭ كوپ بولعانى سونشالىق، سانىن ايتا المايمىن. مەنى قاناتتاندىراتىن دا سول جانداردىڭ سوزدەرى مەن تىلەكتەرى. ۇنەمى الەۋمەتتىك جەلىلەردەن ءوز وقيعالارىن ايتىپ، پىكىرلەرىمەن بولىسەدى. ءتىپتى، اعايىن-تۋىستارى ارقىلى حابارلاسىپ جاتادى. وسى كەزگە دەيىن جۇزدەگەن كەزدەسۋ وتكىزىپ تاستاعان شىعارمىن. مۇمكىندىگى شەكتەۋلى جانداردان باستاپ، بيزنەسمەن، كاسىپكەرلەرگە دەيىن ءتۇرلى ترەنينگتەر ءوتتىم.

– توكيو وليمپياداسىنان سوڭ سپورتتىق مانساپتى اياقتاپ، قوعامعا پايداسى بار ىستەرمەن شۇعىلدانۋدى جوسپارلاعان ەكەنسىز. قازىر نەمەن اينالىسىپ ءجۇرسىز؟

– قازىر جاستارمەن، مەكتەپ وقۋشىلارىمەن قوعامدىق كەزدەسۋلەر وتكىزەمىن. جانە ولاردىڭ بارىنە تەگىن بارامىن، اقى العان ەمەسپىن. ءتۇرلى جوبالار جاساپ، قولدارىندا كوپ قارجى جۇرەتىن ازاماتتاردىڭ الەۋمەتتىك ۆيدەولارىنا دا ءتۇسىپ بەردىم. ولاردان دا ءبىر تيىن العان ەمەسپىن. ەلدەگى ءار وتباسىدا ءبىر قيىن جاعداي تابىلادى. ءبىرىنىڭ اكەسى اراق ىشەدى، ءبىرىنىڭ جارىمجان بالاسى بار، ءبىرى كومەككە مۇقتاج. سول جاندارعا سوزدەرىم مەن ارەكەتتەرىم ارقىلى قولداۋ كورسەتكىم كەلەدى، ۇيىنەن، قوعامنان الا الماعان جىلۋدى بەرگىم كەلەدى. سونداي ماقساتپەن بارلىق شاقىرتۋلارعا تەگىن بارامىن.

– وتە وزەكتى ماسەلەلەردى ايتتىڭىز، ەرجان مىرزا. ۋاقىت ءبولىپ، سۇقبات بەرگەنىڭىزگە كوپ راقمەت!

Back to top button