«كىنالىلەر انىقتالادى»: وسكەمەندە ەكى بالانىڭ ۇستىنە ايالداما قۇلادى

وسكەمەن قالاسىندا قاتتى جەلدەن ەكى بالانىڭ ۇستىنە ايالداما پاۆيلونى قۇلادى دەپ حابارلادى turkystan.kz.

قالالىق تۇرعىن ءۇي-كوممۋنالىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمىنىڭ مالىمەتىنشە، 27 ماۋسىمدا قاتتى جەلدىڭ سالدارىنان شاھار بويىنشا كوممۋنيكاتسيا سىمدارى ءۇزىلىپ، اعاشتار قۇلادى.

تروتۋارلار مەن قالا كوشەلەرىن اعاشتار، ۇلكەن بۇتاقتار جاۋىپ قالدى. سونداي-اق جەلدەن ترامۆايلار 3 باعىتتا ۋاقىتشا قاتىنامادى. گاگارين مەن وتەپوۆ كوشەلەرىندەگى ايالداما پاۆيلوندارى قۇلاپ، 10 جانە 12 جاستاعى ەكى قىز زارداپ شەكتى.

قازىرگى ۋاقىتتا ولار قالالىق اۋرۋحاناعا جاتقىزىلعان. دارىگەرلەر قاجەتتى مەديتسينالىق كومەك كورسەتۋدە.

«بارلىق جەرگە «تازا وسكەمەن» كاسىپورنىنىڭ ماماندارى اتتاندى. 10 بريگادا ارنايى تەحنيكالارمەن جولداردى، كوشەلەردى تازارتتى. گاگارين بۋلۆارى ايالداماسىنىڭ پاۆيلونى «قازالەم» اتتى مەردىگەر كومپانيانىڭ كەپىلدىگىندە. وتەپوۆ ايالداماسىنا «تازا وسكەمەن» مەكەمەسى قىزمەت كورسەتەدى. وسى ەكى جاعداي بويىنشا جاۋاپتى ۇيىمداردىڭ كىناسى بار-جوقتىعىن انىقتاۋ ءۇشىن ىشكى اۋديت جۇرگىزىلەدى»، – دەلىنگەن اقپاراتتا.

ۇقساس جاڭالىقتار

Back to top button