بقو-دا قاڭعىباس يتتەرمەن كۇرەسكە تاعى 8 ميلليون تەڭگە بولىنەدى

باتىس قازاقستان وبلىسىنىڭ اكىمى عالي ەسقاليەۆ وڭىردە قاڭعىباس يتتەر وتكىر ماسەلەلەردىڭ ءبىرى ەكەندىگىن ايتتى دەپ حابارلادى turkystan.kz.

«قاڭعىباس يتتەردى اۋلاۋ، چيپ تاعۋ جانە ستەريلدەۋگە قاتىستى ۆەتەرينارلىق قىزمەتتى مەملەكەتتىك-جەكەمەنشىك قۇزىرەتىنە بەرگەنبىز. بۇل باعىتتاعى جۇمىس 2 جىل بويى قارقىندى ءجۇرىپ كەلەدى. قاڭعىباس يتتەر تۇرعىنداردىڭ ومىرىنە قاۋىپ توندىرسە، «109» قىزمەتىنە حابارلاسا الادى. ورتالىققا كەلىپ تۇسكەن شاعىمدارعا قاتىستى شۇعىل شەشىم قابىلدانادى. توپ بولىپ جۇرەتىن يتتەردى اۋلاپ، ادام ومىرىنە قاۋىپ توندىرگەن جاعدايدا كوزىن جويۋ شاراسى قولدانىلادى»، – دەدى عالي ەسقاليەۆ.

ايماق باسشىسىنىڭ مالىمەتىنشە، اۋلانعان بۇرالقى يتتەردىڭ 20-25 پايىزىنىڭ كوزى جويىلادى. قالعانىن ەمدەپ، ستەريلدەپ، چيپ تاعىپ، قايتا بوساتادى.

«قاڭعىباس يتتەردى اۋلاۋ ماسەلەسى قالالىق ءماسليحاتتا قارالىپ، قوسىمشا قارجى بولىنەدى. سەبەبى قازىر تۇرعىنداردان كەلىپ تۇسەتىن شاعىم سانى ارتقان. ءبىزدىڭ وڭىردە قاڭعىباس يتتەرمەن كۇرەسۋدە ۇلگى تۇتاتىنداي اۋداندار دا بار. ول جەردە يتتەردى ارنايى ورىندا ۇستاپ، كۇتىپ-باپتايدى. يتتەردى اۋلاپ، ولارعا ۆەتەرينارلىق قىزمەت كورسەتۋ بويىنشا 3 جىلعا ارنالعان بايقاۋ ءوتتى. جوبانىڭ قۇنى 61 ميلليون تەڭگەنى قۇرايدى. قوسىمشا تاعى 8 ملن تەڭگە بولىنەتىن بولادى»، – دەدى ول.

ۇقساس جاڭالىقتار

Back to top button