IQanat مەكتەبىنىڭ شاكىرتتەرى ۇبت رەكوردىن جاڭارتتى

17 ماۋسىم كۇنى IQanat High School of Burabay بىرەگەي مەكتەبىنىڭ تۇلەكتەرى مەن قوردىڭ قامقورشىلارى باس قوسقان «التىن ۇيام – Iqanat» مەكتەپ ءبىتىرۋ كەشىنىڭ سالتاناتتى ءراسىمى ءوتتى دەپ حابارلادى turkystan.kz.

مەرەكە قارساڭىندا تۇلەكتەردىڭ ۇبت ناتيجەلەرى بەلگىلى بولدى. وسىلايشا بالالاردىڭ ەكەۋى جوعارى بالل جيناپ، ۇزدىكتەردىڭ ۇزدىگى اتاندى. اتاپ ايتقاندا ۇزىناعاش اۋىلىنىڭ تۇرعىنى ماحاببات حاۆال – 133 بالل جانە اباي اۋدانىنىڭ تۇرعىنى باگدان ياساقوۆ – 132 بالل الدى. جالپى مەكتەپ تۇلەكتەرىنىڭ ورتاشا بالى – 109.

IQanat High School of Burabay – بۇل IQanat وليمپياداسىنىڭ رەسپۋبليكالىق كەزەڭىنىڭ اقتىق سىنىنا جەتكەن، اۋىلدىق جەرلەردەن كەلگەن دارىندى وقۋشىلارعا ارنالعان مەكتەپ-پانسيونات.

«Iqanat» قورىنىڭ ارقاسىندا اۋىلدان شىققان مىڭداعان وقۋشىلار جىل سايىن ساپالى ءبىلىم الىپ، وتاندىق جانە الەمدىك رەيتينگتەگى جوعارى وقۋ ورىندارىنا ءتۇسۋ مۇمكىندىگىن يەلەنەدى. قوردىڭ بارلىق باعدارلاماسى، ونىڭ ىشىندە وليمپيادا مەن مەكتەپتە وقۋ – بۇل ۇزاق مەرزىمدى جانە كەشەندى الەۋمەتتىك ماڭىزدى جوبا. ونىڭ باستى ماقساتى – ەلىمىزدىڭ شالعاي اۋداندارىندا تۇراتىن بالالارعا الەۋمەتتىك ورلەۋ بەلەسىن قامتاماسىز ەتۋ. بەس مەزگىل تاماق پەن مەكتەپ كيىمىن قوسا العاندا، بارلىق شىعىندى قور وزىنە الىپ وتىر.

وقىتۋ جۇيەسىنىڭ ىرگەتاسى – اباي قۇنانباەۆتىڭ يدەيالارى مەن ويلارىنا نەگىزدەلگەن ءبىلىم بەرۋدىڭ فين ۇلگىسىنىڭ، ال تاربيە جاعىنان جاپون ءادىسىنىڭ سينتەزى. بۇل كومبيناتسيا بالالارعا ومىردە ءوز ورنىن تابۋعا، دەربەستىككە ۇيرەنۋگە جانە ءىس-ارەكەتى ءۇشىن جاۋاپكەرشىلىكتى سەزىنۋگە كومەكتەسەدى.

IQanat مەكتەبىنىڭ شاكىرتتەرى ۇبت رەكوردىن جاڭارتتى

«مەن وليمپيادادا جانە مەكتەپتە باستان كەشكەن بارلىق ءساتتى ەرەكشە جىلىلىقپەن، قۋانىشپەن ەسكە الامىن. مۇنداي ەستەلىكتەر ۇنەمى سانادا جاڭعىرىپ تۇراتىنى انىق. بۇل مەنىڭ جانە اۋىلدىق جەرلەردەگى دوستارىمنىڭ الدىنان اشىلعان ۇلكەن مۇمكىندىك دەپ بىلەمىن. وسى جوبانى جۇزەگە اسىرعان قامقورشىلارعا زور العىسىمدى جەتكىزگىم كەلەدى: اسا قادىرلى قامقورشى اعا-اپالار، سىزدەرگە كوپ راحمەت! ەندى مەن ارى قاراي قادامىمدى نىق باسىپ، ماقساتىما ۇمتىلماقپىن. بۇل دەگەنىڭىز، جوعارى بىلىكتى ماتەماتيكا ءپانىنىڭ مۇعالىمى بولعىم كەلەدى جانە «عىلىمي ماتەماتيكا» فاكۋلتەتىنە ءتۇسۋدى جوسپارلاپ وتىرمىن»، دەپ مەكتەپ تۇلەگى ماحاببات حاۆال ءوز اسەرىمەن ءبولىستى.

«Iqanat، ءسوزسىز، قازاقستاننىڭ ماڭىزدى ءبىلىم بەرۋ جوبالارىنىڭ ءبىرى دەپ سانايمىن. وسى جوبانىڭ ارقاسىندا مەن ەمتيحاندى ءساتتى تاپسىرۋ، ۋنيۆەرسيتەتكە ءتۇسۋ جانە داعدىلارىمدى ماقساتتى تۇردە دامىتۋ مۇمكىندىگىمدى ارتتىردىم. بۇل جەردە مەن اتتەستات الىپ، ۇبت تاپسىرىپ قانا قويعان جوقپىن، ءوز جوسپارلارىم مەن ماقساتتارىمدى ءتۇزىپ، ولارعا قالاي قول جەتكىزۋگە بولاتىنىن ءتۇسىندىم جانە ەكىنشى وتباسىمدى، جاقىن جاندارىمدى تاپتىم»، – دەپ اتاپ ءوتتى جاس تۇلەك باگدان ياساقوۆ قيماستىق سەزىممەن.

وتكەن جىلى IQanat High School of Burabay تۇلەكتەرىنىڭ 85%-ى قازاقستاندىق جانە شەتەلدىك جوعارى وقۋ ورىندارىنا گرانتقا تۇسكەنىن كەلتىرە كەتكەن ءجون. 2022 جىلى جالپى قابىلداۋ ناتيجەلەرى تامىز ايىندا بەلگىلى بولادى.

قور باعدارلامالارىنىڭ تۇلەكتەرى، بۇگىندە ەلىمىزدىڭ جانە الەمنىڭ بەدەلدى جوعارى وقۋ ورىندارىنىڭ ستۋدەنتتەرى: Nazarbayev University، University of Purdue، Polytechnic University of Hong Kong، University of Chicago، Vitautus Magnus University جانە تاعى باسقا.

جوبا «IQanat» قورىنىڭ قامقورشىلارىنىڭ ارقاسىندا مۇمكىن بولىپ وتىر. ال مۇنداي قامقورشى، وڭىرلەردەگى بالالارعا كومەكتەسۋگە قۇلشىنىسى زور ءار ادام بولا الادى. قوردىڭ كوپتەگەن مەتسەناتتارى اۋىلدىق جەرلەردە تۋىپ-وسكەن. ولار ساپالى ءبىلىم الۋ مۇمكىندىگى كەز كەلگەن وقۋشىدا، ءتىپتى ەلدىڭ ەڭ الىس شالعايىندا وقيتىن بالادا بولۋى كەرەك ەكەنىنە سەنىمدى. بولاشاقتا بۇل بالالار ءوز، اۋىلىنىڭ، اۋدانىنىڭ، وبلىسىنىڭ جانە جالپى قازاقستاننىڭ الەۋمەتتىك-ەكونوميكالىق دامۋىنىڭ وسۋىنە ىقپال ەتەتىنى، ءارى قاراي وزدەرىنىڭ جاس جەرلەستەرىن قولتىقتان دەمەپ، ولاردىڭ باسەكەگە قابىلەتتى جانە تابىستى بولۋىنا سەپتەسەتىنى داۋسىز.

ۇقساس جاڭالىقتار

Back to top button