جەدەل جاردەم كەلگەنشە 17 ادام قايتىس بولعان – الماتى پروكۋراتۋراسى

الماتىلىق تۇرعىندار مەدەۋ اۋدانى اكىمى مەن پروكۋرورىمەن كەزدەسۋدە مەديتسينالىق كومەكتى ۋاقتىلى الۋ ماسەلەسىن كوتەردى دەپ حابارلادى turkystan.kz.

جەدەل مەديتسينالىق كومەك كورسەتۋ ەرەجەسى بويىنشا دارىگەرلەر بريگاداسى ومىرگە قاۋىپ توندىرەتىن جاعدايلاردا شاقىرتۋدى العان ساتتەن باستاپ 10 مينۋتقا دەيىن كەلۋى ءتيىس.

الايدا  پروكۋرورلار شاعىناۋدانعا ەڭ جاقىن ستانتسيا 20 شاقىرىم جەردە ورنالاسقانىن، بۇل كوبىنەسە كەپتەلىستى ەسكەرە وتىرىپ، فەلدشەرلەردىڭ كەلۋ ۋاقىتىن كەشىكتىرەتىنىن انىقتادى.

«تالداۋ ناتيجەلەرىنەن بىلتىر اتالعان شاعىناۋداننىڭ 17 تۇرعىنى جەدەل جاردەم كولىگى كەلگەنگە دەيىن قايتىس بولىپ كەتكەنىن بىلدىك. مەدەۋ اۋدانىنىڭ پروكۋراتۋراسى وسى پروبلەمانى شەشۋ ءۇشىن ۋاكىلەتتى ورگانعا پروكۋرورلىق قاداعالاۋ اكتىسىن ەنگىزدى. بۇل اكتى بويىنشا «الاتاۋ» ىقشاماۋدانىندا جەكە جەدەل جاردەم ستانتسياسى اشىلدى، سونداي-اق 17 ادامنىڭ قايتىس بولۋ سەبەپتەرىن تەرگەۋ ءۇشىن ارنايى كوميسسيا قۇرىلدى»، – دەلىنگەن الماتى قالالىق پروكۋراتۋراسى حابارلاماسىندا.

 

ۇقساس جاڭالىقتار

Back to top button