نازارباەۆقا قاتىستى قىلمىستىق ءىس قوزعالمايدى – مۋسين

زاڭنامادان نۇرسۇلتان نازارباەۆتى قورلاعانى ءۇشىن جاۋاپكەرشىلىككە تارتۋ تۋرالى جەكە باپ جويىلاتىن بولدى دەپ حابارلادى turkystan.kz.

بىراق قىلمىستىق كودەكستە پرەزيدەنتتىڭ ار-نامىسى مەن قادىر-قاسيەتىنە قول سۇقپاۋ تۋرالى جالپى باپ قالادى ەكەن. بۇل تۋرالى سەنات وتىرىسىنان كەيىن ادىلەت ءمينيسترى قانات مۋسين ايتتى.

سونداي-اق، مينيستر كونستيتۋتسيادان ەلباسى ءسوزى مۇلدە الىنىپ تاستالعانىن جەتكىزدى.

«كونستيتۋتسيانىڭ 46-بابى جالپى نورماعا كەلتىرىلەدى، وندا پرەزيدەنتتىڭ ار-نامىسى مەن قادىر-قاسيەتىنە قول سۇعىلمايتىنى جازىلعان»، – دەدى مۋسين جۋرناليستەرگە.

ول ۇلت كوشباسشىسىن قورلاۋ تۋرالى جەكە باپ جويىلاتىنىن مالىمدەدى.

«قىلمىستىق كودەكستە پرەزيدەنتتىڭ ار-نامىسى مەن قادىر-قاسيەتىن قورلاعانى ءۇشىن جاۋاپكەرشىلىككە تارتۋعا باعىتتالعان جالپى باپ بار، ول قالادى. ال ەلباسى تۋرالى بولەك باپ بولمايدى»، –  دەپ ناقتىلادى مينيستر.

سونداي-اق ادىلەت ءمينيسترى نازارباەۆ جاۋاپقا تارتىلۋى مۇمكىن بە دەگەن سۇراققا جاۋاپ بەردى.

«كونستيتۋتسيا بويىنشا ەل پرەزيدەنتى مەملەكەتكە وپاسىزدىق جاساعانى ءۇشىن عانا ەمەس، باسقا قىلمىستار ءۇشىن دە جاۋاپقا تارتىلادى»، – دەپ جاۋاپ بەرگەن مۋسين نازارباەۆقا قاتىستى قىلمىستىق ءىس قوزعالمايتىنىن ايتتى.

ۇقساس جاڭالىقتار

Back to top button