«AMANAT» مەديا سىيلىعى – ماماندىققا ادالدىق - رينات كەرتاەۆ

«AMANAT» پارتياسى باق قىزمەتكەرلەرى كۇنىنە وراي «AMANAT» مەديا سىيلىعى بايقاۋىن وتكىزبەك. ءداستۇرلى بايقاۋدى وتكىزۋ تۋرالى اقپارات 19 مامىر كۇنى رەسمي جاريالانعان ەدى. كۇن سايىن بايقاۋعا قاتىسۋعا نيەت بىلدىرگەندەر سانى كوبەيىپ كەلەدى. بۇل ءداستۇرلى سىيلىقتىڭ بۇرىنعىدان ەرەكشەلىگى قانداي؟ قانداي نوميناتسيالار بار؟ پارتيا بايقاۋ وتكىزۋدە قانداي ماقسات-مىندەت جۇكتەپ وتىر؟ وسى ورايدا، ءبىز «AMANAT» پارتياسىنىڭ حاتشىسى رينات دۋمان ۇلىمەن تىلدەسكەن ەدىك.

– رينات دۋمان ۇلى، «AMANAT» مەديا سىيلىعى بەرىلەتىن كۇن دە الىس ەمەس. بۇل سىيلىقتىڭ ماڭىزى قانداي؟ ماقسات-مىندەتى شە؟

– ءيا، «AMANAT» پارتياسى جىل سايىنعى ءداستۇر بويىنشا باق قىزمەتكەرلەرى كۇنى قارساڭىندا جۋرناليستەر اراسىندا بايقاۋ جاريالاپ وتىر. ءبىز بايقاۋ تۋرالى 19 مامىر كۇنى رەسمي تۇردە حابارلاعان ەدىك. جۋرناليستەردىڭ جۇمىستارىن قابىلداۋدى باستاپ كەتتىك. ول 20 ماۋسىمعا دەيىن جالعاسادى. سوندىقتان «بايقاۋعا قاتىسامىن» دەگەن بارلىق ءجۋرناليستى تەزدەتىپ ءوز جۇمىستارىن بىزگە جىبەرۋىن سۇرايمىز. سەبەبى ۋاقىت از قالدى. ال «AMANAT» مەديا سىيلىعىنىڭ ماقسات-مىندەتى بىرنەشە باعىتتى قامتيدى.

بىرىنشىدەن، مەديا مەن تاۋەلسىز باق – كەز كەلگەن قوعامنىڭ دامۋ كورسەتكىشتەرىنىڭ ءبىرى. مىسالى، دامىعان ەلدەردى الاتىن بولساق، وسىعان كوز جەتكىزۋگە بولادى. ەلىمىز وسى باعىتتى ۇستانىپ، بۇل سالادا دا وتە جوعارى ستاندارتتارعا ۇمتىلىپ وتىر. سول سەبەپتەن دە «AMANAT» پارتياسى وسى قۇندىلىقتاردى قولداۋشى ەلدەگى ەڭ ۇلكەن قوعامدىق ۇيىم رەتىندە بۇل ىسكە ءوز ۇلەسىن قوسۋى – زاڭدىلىق. ياعني، ءبىز «AMANAT» مەديا سىيلىعى مەديا مەن تاۋەلسىز جانە كاسىبي بۇقارالىق اقپارات قۇرالدارىنىڭ دامۋىنا ىقپال ەتەدى دەگەن ويدامىز.

ەكىنشىدەن، قاي سالادا بولماسىن، كەز كەلگەن ماماننىڭ ەڭبەگىن باعالاۋ قاجەت. بۇل شىعارماشىلىق جۇمىسقا جاتاتىن جۋرناليستيكادا ءتىپتى ماڭىزدى. اتقارىلعان ەڭبەكتىڭ، شىعارماشىلىق ىزدەنىستىڭ لايىقتى باعاسىن بەرۋ، «جۇزدەن جۇيرىك، مىڭنان تۇلپار» ۇزدىكتەردى انىقتاۋ كاسىبي جۋرناليستيكانىڭ دامۋىنا ءوز ۇلەسىن قوسارى ءسوزسىز.

ۇشىنشىدەن، قازىر جاس جۋرناليستەردىڭ كوزقاراسى، كاسىبي شەبەرلىگى وسى سالاعا جاڭاشىلدىق الىپ كەلەدى، ونىڭ دامۋىنا تىكەلەي ىقپال ەتەدى. مەديا سىيلىقتىڭ الدىنا قويعان ۇلكەن ماقساتتارىنىڭ ءبىرى – ءدال وسى جاس مامانداردىڭ بەلسەندىلىگىن ارتتىرىپ، ولاردىڭ اراسىنان ۇزدىكتەردى انىقتاۋ. بايقاۋعا قاتىسۋ ءۇشىن بىزگە جاس اۆتورلاردان دا كوپتەگەن جۇمىس كەلىپ جاتىر. بۇل ءبىزدى قۋانتىپ وتىر.

تورتىنشىدەن، بۇل ءىس-شارا ءداستۇر ساباقتاستىعى مەن مەدياقاتىناستاردى، وسى سالاداعى ورتاق سينەرگيانى كۇشەيتەدى دەگەن ۇمىتتەمىز. بۇل اسىرەسە اقپاراتتىق كەڭىستىكتى كۇشەيتۋ، ساپالى كونتەنت جاساۋ، اقپاراتتىق تاۋەلسىزدىكتەن ارىلۋ سياقتى ماسەلەلەردە وتە وزەكتى. قورىتا ايتقاندا، «AMANAT» مەديا سىيلىعىنىڭ ماڭىزى دا وسىندا.

– نوميناتسيالار تۋرالى كەڭىرەك ايتىپ وتسەڭىز. پارتيالىق پرەميانىڭ بيىلعى جاڭاشىلدىعى نە بولماق؟

– بيىلعى پرەميادا نوميناتسيالار جانرلىق سيپاتتا ەمەس، تاقى­رىپتىق باعىتتا الىنىپ وتىر. ياعني، ۇزدىك تەلەباعدارلاما نەمەسە ۇزدىك ما­قالا دەگەننىڭ ورنىنا وزەكتى تاقىرىپقا ساي جاسالعان كەز كەلگەن جۋرناليستىك ماتەريال وزا شاۋىپ، بايگە الۋى مۇمكىن. بۇل جەردە جانردىڭ ماڭىزدىلىعىنان گورى كوتەرىلەتىن ماسەلەنىڭ وزەكتىلىگى بولماق. ول بەلگىلى ءبىر تاقىرىپتىڭ زەرتتەلۋىنە، تولىق اشىلۋىنا جانە قالىڭ بۇقاراعا جەتۋىنە بەرىلەتىن باعا. بۇل بايقاۋدىڭ اۋقىمىن كەڭەيتىپ، ونىڭ مازمۇندىق جاعىن كۇشەيتە تۇسەدى دەگەن ويدامىز.

امانات سىيلىعى

بيىل «AMANAT» مەديا سىيلىعى 10 نوميناتسيا بويىنشا بەرىلەدى. ءبىرىنشى نوميناتسيا – «جاڭا قازاقستاندى» قۇرۋ تۋرالى ۇزدىك ماتەريال، ەكىنشى – «اماNAT» پارتياسىنىڭ ترانسفورماتسياسى تۋرالى ۇزدىك ماتەريال، ءۇشىنشى – الەۋمەتتىك ماسەلەگە ارنالعان ۇزدىك ماتەريال، ءتورتىنشى – ايماق تۋرالى ۇزدىك ماتەريال، بەسىنشى – قازاقستان رەسپۋبليكاسىنىڭ مەملەكەتتىك رامىزدەرىنىڭ 30 جىلدىعىنا وراي وسى تاقىرىپتاعى ۇزدىك ماتەريال، التىنشى – جاستار تۋرالى ۇزدىك ما­تەريال، جەتىنشى – رۋحاني جانە مادەني دامۋعا ارنالعان ۇزدىك ماتەريال. جانە وسى جەتەۋىنە قوسا تاعى ءۇش ارنايى سىيلىق تاعايىنداپ وتىر­مىز. ولار: احمەت بايتۇرسىن ۇلى اتىن­داعى «ءسوز زەرگەرى» سىيلىعى، شەرحان مۇرتازا جانە كامال سمايىلوۆ اتىنداعى «تەلەۆيزيا ۇزدىگى» سىيلىعى جانە بەلسەندى ازاماتتىق ۇستانىمى ءۇشىن بەرىلەتىن سىيلىق.

نوميناتسيالارعا قىسقاشا توقتالار بولساق. جاڭا قازاقستان – ەلىمىزدەگى باستى ساياسي يدەيا، باستى ساياسي پلاتفورما. بۇعان قوسا، «AMANAT» پارتياسىنىڭ ترانسفورماتسياسى دا ساياسي جۇيەدەگى وتە ماڭىزدى پروتسەسس. سونىمەن قاتار الەۋمەتتىك ماسەلەنى دە نازاردان تىس قالدىرماي، وعان دا بولەك نوميناتسيا بەلگىلەدىك. سەبەبى الەۋمەتتىك ماسەلەلەر – قوعامداعى باستى ساۋالداردىڭ ءبىرى. بيىل سونداي-اق ايماق تىنىسىنا دا جەتە كوڭىل ءبولىپ وتىرمىز. ول ءوز كەزەگىندە ەلىمىزدىڭ تۇكپىرتۇكپىرىندەگى جۋرناليستەردىڭ بەلسەندىلىگىن ارتتىرىپ، ولاردىڭ جۇمىستارىن بۇكىل ەل كولەمىندە ناسيحاتتاۋعا مۇمكىندىك بەرمەك. جاسىراتىنى جوق، ۇلكەن، رەسپۋبليكالىق دەڭگەيدەگى بايقاۋلارعا كوبىنەسە ورتالىقتاعى باق وكىلدەرى قاتىسىپ، جۇلدەلى ورىن مەن ماراپاتتىڭ كوبىن سولار يەمدەنىپ جاتادى. بۇل نوميناتسيانىڭ مىندەتى دە جەرجەردەگى تالانتتاردى بايگەگە قوسىپ، ۇزدىكتەردى انىقتاۋ. ءبىز وسى جايتتى ەسكەرىپ، اتالعان باعىتقا ەرەكشە ءمان بەرىپ وتىرمىز. سونىمەن قاتار بيىل وزدەرىڭىز بىلەتىندەي، مەملەكەتتىك رامىزدەردىڭ 30 جىلدىق مەرەيتويى. وعان ءوز الدىنا بولەك نوميناتسيا بەلگىلەندى. ول پاتريوتتىق باعىتتا، ەلدىك، ەگەمەندىك دەگەن تاقىرىپتا قالام تەربەيتىن شەبەرلەردى ىنتالاندىرۋ دەۋگە بولادى. قازىر اقپاراتتىق كەڭىستىكتە وسى باعىت ەرەكشە قولداۋدى قاجەت ەتەدى دەپ سانايمىز. جانە جاستار تۋرالى ۇزدىك ماتەريالعا دا بولەك بايگە تىگىپ وتىرمىز. سەبەبى جاستاردى ءاردايىم قولداپ، ىنتالاندىرىپ وتىرۋ قاجەت. ال ەندى حالقىمىز ءۇشىن قاسيەتتى سانالاتىن جەتى دەگەن سانمەن ءدال كەل­گەن نوميناتسيا – رۋحاني جانە مادەني دامۋعا ارنالعان ۇزدىك ماتەريال دەپ بەلگىلەندى. بۇل باعىت بويىنشا دا مايتالمان جۋرناليستەر باق سىناپ، ەڭ مىقتىسى جۇلدەلى بولادى دەپ سەنەمىز.

سونداي-اق بيىل – احمەت بايتۇر­سىن ۇلىنىڭ 150 جىلدىعى، كامال سمايىلوۆ پەن شەرحان مۇرتازانىڭ 90 جىلدىق مەرەيتويى. سوندىقتان قازاقتىڭ ءبىرتۋار تۇلعا­لارىنىڭ اتىنداعى ەكى جۇلدە تا­عايىن­داپ وتىرمىز. ونى احمەت باي­تۇرسىن ۇلى اتىنداعى «ءسوز زەر­گەرى» سىيلىعى جانە توعىزىنشى نوميناتسيا شەرحان مۇرتازا مەن كامال سمايىلوۆ اتىنداعى «تەلە­ديدار ۇزدىگى» سىيلىعى دەپ بەكىتتىك. بۇل ءتىزىمدى مەدياسفەرادا بەلسەندى ازاماتتىق ۇستانىمى ءۇشىن بەرىلەتىن ارنايى جۇلدە تۇيىندەپ تۇر.

تاعى ءبىر ايتا كەتەرلىك ماسەلە – بيىل ءبىر نوميناتسيا عانا پارتيانىڭ جۇمىسىنا ارنالىپ وتىر. ول پارتيانىڭ ترانسفورماتسياسى، وزگەرۋ پروتسەسى تۋرالى ۇزدىك ماتەريالعا بەرىلەدى. مۇنى بيىل ەنگىزىلىپ وتىرعان باستى جاڭالىقتاردىڭ ءبىرى دەۋگە بولادى. پارتيانىڭ قىزمەتى تۋرالى جازاتىن جۋرناليستەردىڭ ماتەريالدارىنا قاراپ، بىزگە ءوز جۇمىسىمىزدىڭ ءجۇرۋ بارىسىن بىلۋگە، وعان بەرىلىپ جاتقان باعانى كورۋگە، ياعني كەرى بايلانىس ورناتۋعا مۇمكىندىك تابامىز. سوندىقتان بۇل نو­ميناتسيانىڭ دا ماڭىزى زور، ورنى بولەك. سونداي-اق قازىر ءبىزدىڭ پارتيالىق جۇيەدە ۇلكەن وزگەرىستەر بار. كونستيتۋتسيالىق رەفورمادان كەيىن پارتيالىق بەلسەندىلىك، جاڭا پار­تيالاردىڭ قۇرىلۋى سياقتى ۇردىستەر ءجۇرىپ جاتىر. وسىنداي كەزدە ساياسي بىرلەستىكتەر تۋرالى جازاتىن، قوعام­دىق ۇيىمداردىڭ قىزمەتىنە باعا بەرىپ، تالداۋ جاساي الاتىن جۋرناليستەردىڭ ءرولى كۇشەيە تۇسەدى دەگەن ويدامىن. بۇل – جۋرناليستيكاداعى ەڭ ۇلكەن باعىتتاردىڭ ءبىرى. ول ساياسي ءبىلىمدى، ساراپتامالىق قابىلەتتى تالاپ ەتەدى. سوندىقتان بۇل نوميناتسيانىڭ اياسى وتە كەڭ جانە تەك جۋرناليستىك ورتامەن شەكتەلمەيدى.

نوميناتسيالار تىزىمىنەن، ونداعى پارتيا قىزمەتىنە قاتىستى ءبىر عانا باعىتتىڭ قالۋىنان مەديا سىيلىقتىڭ دا وزگەرىپ، ترانسفورماتسياعا تۇسكەنىن بايقاۋعا بولادى. بيىلعى پرەميا پارتيالىق سىيلىقتان گورى جالپىۇلتتىق دەڭگەيدەگى قوعامدىق ماراپاتقا قاراي وزگەردى.

– جۋرناليستەردەن ءتۇسىپ جاتقان جۇمىستار كوپ پە؟ بايقاۋعا قاتىسۋشىلاردىڭ بەلسەندىلىگى قالاي؟

– بايقاۋدى جاريالاپ، ەل ىشىنە حابار تاراتقان كۇننەن باستاپ-اق جۋرناليستەر ءوز جۇمىستارىن جىبەرىپ، ۇيىمداستىرۋ كوميتەتىمەن حابارلاسىپ جاتىر. تەلەفون ارقىلى ايماقتاردان بايلانىسقا شىعىپ، نوميناتسيالار تۋرالى، بايقاۋعا قاتىسۋدىڭ رەتى تۋرالى سۇراپ جاتقان ازاماتتار وتە كوپ. قازىردىڭ وزىندە ءبىرشاما جۇمىس كەلىپ ءتۇستى. جۋرناليستەر وتە بەلسەندى. باسەكە جوعارى بولادى دەۋگە نەگىز بار. بۇل – قۋانتارلىق جايت. قازىر ءبىزدىڭ ماماندار بايقاۋعا قاتىسۋشىلاردىڭ جۇمىس­تارىن جيناپ جاتىر. ول ماۋسىم ايى­نىڭ 20-سىنا دەيىن، دالىرەك ايتساق، 19 ماۋسىمدا ساعات 00:00-گە دەيىن جالعاسادى. بايقاۋعا قاتىسام دەۋشىلەر بارلىق اقپاراتتى پارتيانىڭ سايتىنان الا الادى.

«AMANAT» مەديا سىيلىعى – ماماندىققا ادالدىق - رينات كەرتاەۆ

– «AMANAT» پارتياسى باق-قا، مەديا سالاداعى جۇمىسقا قانشالىقتى ءمان بەرەدى؟

– پارتيا اشىقتىق، حالىقپەن كە­رى بايلانىس پرينتسيپتەرىن جۇزەگە اسىرىپ كەلەدى. ساياسي ۇيىمنىڭ ءىشىن­­­دە ترانسفورماتسيالىق پروتسەس­تەر جۇزەگە اسىرىلۋدا. وسى ىستە مە­ديا جانە اقپاراتتىق سالانىڭ ماڭى­­زى اسا زور. سول سەبەپتەن پار­تيا كوم­مۋ­ني­كا­تسيا مەن اقپاراتتىق جۇمىسقا ەرەك­شە ءمان بەرىپ، بىرقاتار باعىت بويىن­شا ناقتى جۇمىس اتقا­رىپ جاتىر.

اتاپ ايتار بولساق، «AMANAT» پارتياسى جانىنان ءباسپاسوز ورتا­لىعى اشىلدى. ول جەردە مينيستر­لەر، دەپۋتاتتار، جاۋاپتى ورگاندار­دىڭ باسشىلارى، جۇمىس توپتارى­نىڭ، قوعامدىق كەڭەستەردىڭ مۇشەلە­رى حالىق الدىنا شىعىپ، وزەكتى ماسە­لەلەر بويىنشا اقپارات بەرۋدە. بۇل الاڭ جۋرناليستەر قاۋىمىنا وزەكتى اقپاراتتى جىلدام جانە ىڭعايلى بولىپ تۇر.

سونداي-اق Youtube جەلىسىندە «AMANAT LIVE» جوباسى جۇزەگە اسى­رىلدى. پارتياعا قاراستى مە­ديا­­حولدينگ تە ءوز جۇمىسىندا زا­ماناۋي پرينتسيپتەر مەن ءادىس-ءتا­سىلدەردى قولدانۋدا. پارتيا جانىندا پىكىر الماسۋعا ارنالعان «تالقىلاۋ» الاڭى بار. بۇگىنگە دەيىن ءتورت وتى­رىسى ءوتتى. ساياسي رەفورمالار، ەكىن­شى رەسپۋب­ليكا دەگەن سەكىلدى مەم­لە­كەتىمىز ءۇشىن وزەكتى ماسەلەلەر قارال­دى. اتالعان جوبانىڭ بارلىق وتى­رىستارى الەۋ­مەتتىك جەلىدە live رە­جي­مىندە كورسە­تىلەدى. سونىمەن قاتار ءوڭىر­لەردەگى پارتيا جانىنان قۇرىل­عان قوعامدىق كەڭەس­تەردىڭ دە وتى­رىسى الەۋمەتتىك جەلى­لەردە تىكەلەي ەفير ارقىلى تا­را­تى­لا­دى. ياعني، بارلىق الاڭداردىڭ جۇ­مى­سىن اشىق، حالىققا قولجەتىمدى ەتۋ ءۇشىن ءبىز قوعامدىق-ساياسي جۇمىس پەن زا­ماناۋي كوممۋنيكاتسيا قۇرال­دا­رىن بىرىكتىرىپ وتىرمىز. ءبىر ءسوز­بەن ايت­قاندا، live رەجيم. قازىرگى زا­ماندا بارلىق الەمدەگى تابىستى كومپا­نيالار مەن قوعامدىق ۇيىم­دار ناتيجەلى جۇمىسپەن قوسا وسىن­داي اشىقتىققا تولىق كوشكەن. ءبىز دە وسىنداي مەگاترەند اياسىندا ءۇل­كەن وزگەرىستەردى قولعا الىپ وتىرمىز.

پارتيا بۇگىندە حالىقپەن باي­لانىستى نىعايتۋ، ەسەپتىلىك، اشىق­تىق پرينتسيپتەرىن كۇشەيتۋ، حالىقتى مازالاعان پروبلەمالاردى شەشۋگە باعىتتالعان جوبالاردى ودان ارى تەرەڭدەتىپ، كۇشەيتە تۇسەدى. پارتيا­نىڭ باستى ماقساتى – حالىقتىڭ سۇ­را­­نىسىنا يە، كوپشىلىكتىڭ ماسەلە­سىن شەشەتىن، ازاماتتاردىڭ قولداۋى­نا سۇيەنگەن ساياسي كۇش رەتىندە قىز­مەت ەتۋ.

«AMANAT» مەديا سىيلى­عى دا وسى جۇمىستاردىڭ لوگيكا­لىق زاڭدى جالعاسى. تۇيىندەي ايتساق، بايقاۋدىڭ باستى ماقساتى – تاۋەلسىز اقپاراتتىق كەڭىستىكتى نى­عايتۋ، تالانتتى، جاس جۋرناليس­تەر­گە قولداۋ كورسەتۋ، پاتريوتتىق، ەلدىك تا­قىرىپتاعى شىعارمالاردى ناسي­حاتتاۋ، ورتالىقپەن قوسا ايماقتاردا دا ەلدىڭ بىرلىگى مەن بەرەكەسىنە ءوز ۇلەسىن قوسىپ جۇرگەن ازاماتتاردى كو­تەرمەلەۋ جانە ساپالى كونتەنت جا­ساۋعا ىنتالاندىرۋ. بۇل – «AMANAT» پارتياسىنىڭ وسى باي­قاۋ ارقىلى اتقارۋدى كوزدەپ وتىرعان نەگىزگى مىندەتتەرىنىڭ ءبىرى.

اڭگىمەلەسكەن
ايىم بەكتۇر

Back to top button