1 توننادان استام بالىق اۋلاعان براكونەرلەر ۇستالدى

ماڭعىستاۋدا «بەكىرە-2022» جەدەل-پروفيلاكتيكالىق ءىس-شاراسى اياسىندا 1 توننادان استام بەكىرە تۇقىمداس بالىق اۋلاعان براكونەرلەر ۇستالدى دەپ حابارلادى turkystan.kz Polisia.kz سايتىنا سىلتەمە جاساپ.

«وڭىردەگى قۇقىقبۇزۋشىلىقتاردى انىقتاۋ ماقساتىندا تابيعاتتى قورعاۋ پوليتسيا قىزمەتكەرلەرى، جىلدام قيمىلدايتىن ارنايى جاساق جانە پاترۋلدىك پوليتسيا باتالونى مەن روتا قىزمەتكەرلەرىنەن بەس توپ قۇرىلدى. ناتيجەسىندە، 90 زاڭبۇزۋشىلىق انىقتالدى. ونىڭ ىشىندە، بالىق اۋلاۋ قاعيداسىن بۇزعانى ءۇشىن 74 تۇلعاعا قاتىستى اقبتك-ءنىڭ 383-بابىمەن (بالىق اۋلاۋ جانە بالىق رەسۋرستارى مەن باسقا دا سۋ جانۋارلارىن قورعاۋ قاعيدالارىن بۇزۋ) حاتتامالار جاساقتالدى. 13 ادام قر قىلمىستىق كودەكسىنىڭ 339-بابى (وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) جانە 3 ادام وسى كودەكستىڭ 335-بابى (بالىق رەسۋرستارىن، باسقا دا سۋ جانۋارلارىن نەمەسە وسiمدiكتەرىن زاڭسىز الۋ) بويىنشا زاڭ الدىندا جاۋاپ بەرەدى. جالپى، تابيعاتتى قورعاۋ زاڭناماسىن بۇزۋشىلاردان 1099 كەلى بەكىرە تۇقىمداس جانە 46 كەلى ۇساق بالىقتار، يتبالىقتىڭ مايى مەن تەرىسى تاركىلەندى. سونداي-اق 500 مەتر بەكىرە تۇقىمداس بالىعىن اۋلاۋعا ارنالعان اۋ جانە «بايدا» مەن ەكى رەزەڭكە قايىق انىقتالدى»، – دەلىنگەن حابارلامادا.

«بەكىرە-2022» جەدەل-پروفيلاكتيكالىق ءىس-شاراسى بالىق جانە بالىق ونىمدەرىن زاڭسىز اۋلاۋ، ساتۋ، تاسىمالداۋ فاكتىلەرىنىڭ الدىن الۋ مەن انىقتاۋ ماقساتىندا وتكىزىلدى.

زاڭسىز بالىق تاسۋ، ساتۋمەن اينالىسقاندار تاراپىنان كەلتىرىلگەن مەملەكەتتىك شىعىن ءار ءىس بويىنشا سوت ۇكىمىنىڭ شەشىمى شىققاننان كەيىن وندىرىلەدى.

ۇقساس جاڭالىقتار

Back to top button