ۇبت – 2022: 1 جىلدا 4 رەت وتەتىن تەستىلەۋ

مەكتەپ ءبىتىرۋشى تۇلەكتەردىڭ ءومى­رىن­دەگى ماڭىزدى ساتتەردىڭ ءبىرى – ۇلت­تىق بىرىڭعاي تەستىلەۋ. 11 جىلدىق ءبىلىم مەن بىلىكتىڭ ناتيجەسىن كورەتىن بۇل كۇن­نىڭ ماڭىزى تالاپكەرلەر ءۇشىن ارقاشان جو­عارى. ءار جىل سايىن فورماتى مەن ەرە­جەسى جاڭارىپ وتىراتىن ۇبت-نىڭ بيىل­عى جاڭالىعى مەن وزگەرىسى جەتەرلىك. بۇرىنعى تەستىلەۋدەن ايىرماشىلىعى دا از ەمەس. سولارعا شولۋ جاساپ وتسەك.

مىسالى، بىلتىر بىرىڭعاي تەستىلەۋ 2 رەت وتكىزىلسە، بيىل 4 رەت بولادى. ناق­تى­راق ايتقاندا، قاڭتار، ناۋرىز، مامىر-ءشىل­دە جانە تامىزدا. قاڭتار، ناۋرىز، تامىز اي­لارىندا تەست تاپسىرعان تالاپكەرلەردىڭ جوو-نىڭ تەك اقىلى بولىمىنە تۇسۋىنە ءمۇم­كىن­دىگى بار. ال مەملەكەتتىك گرانت ءۇشىن مامىر مەن شىلدە ارالىعىندا بولاتىن تەستىلەۋ نە­گىزگى ۇبت دەپ اتالادى. ونى تاپسىرۋعا ءار تەس­تىلەنۋشىدە ەكى مۇمكىندىكتەن بولادى.
قازىر ۇبت 43 ايماقتىق تەستىلەۋ ورتا­لى­عىندا وتكىزىلىپ جاتىر. ۇلتتىق تەستىلەۋ ورتالىعىنىڭ ايتۋىنشا، بارلىق ور­تالىق تەحنيكالىق جاعىنان تولىق قام­­تاماسىز ەتىلگەن. ۇبت-عا كىرگىزۋ ءۇش دەڭ­گەي­لى جۇيە بويىنشا جۇزەگە اسىرىلادى: Face ID جە­كە باسىن سايكەستەندىرۋ ارقىلى، جەكە كۋا­لىك بويىنشا، سونداي-اق وتىراتىن ور­نىن­دا جەكە باسىن سايكەستەندىرۋ. بيىل تەس­تى­ل­ەۋ «1 كومپيۋتەر – 2 كامەرا – 1 تەستىلەنۋشى» قا­عيداتى بويىنشا وتەدى. ەگەر بۇعان دەيىن تەس­تىلەۋ پروتسەسىن ءار كومپيۋتەردىڭ جوعارعى جا­عىنان باقىلاپ وتىراتىن ءبىر كامەرا عانا بول­سا، ەندى تەستىلەنۋشىنىڭ جەكە باسىن ءساي­كەس­تەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (فرونتالدى) كامەرا ورناتىلعان.
ال تەستىلەۋگە ەنگىزىلگەن پاندەردىڭ سانى ەش وزگەرىسسىز قالدىرىلعان. ءۇش مىندەتتى جانە ەكى تاڭداۋ ءپانى بويىنشا. تەست تاپ­سىر­ما­لارى­نىڭ سانى – 120. ونىڭ ىشىندە قازاقستان تا­ري­حىنان – 15، ماتەماتيكالىق ساۋاتتى­لىق­تان – 15، وقۋ ساۋاتتىلىعىنان – 20 جانە ەكى بەيىندىك پاننەن – 35. ەڭ جوعارعى ۇپاي سا­نى – 140. تەستىلەۋدىڭ جالپى ۋاقىتى – 4 سا­عات (240 مينۋت).
ەستەرىڭىزگە سالا كەتسەك، 2021 جىلدان باس­تاپ تەستىلەۋ ەلەكتروندى فورماتقا كو­شىرىلگەن بولاتىن. تالاپكەرلەر ۇبت-نى جەر­گىلىكتى تەستىلەۋ ورتالىقتارىندا تاپ­سىرا­دى. ەلەكتروندى فورماتقا كوشكەننەن بەرى اپ­پەلياتسيا بەرۋ ءراسىمى جەڭىلدەگەن. وتكەن جىل­دار سياقتى اپپەلياتسيانى كەلەسى كۇنى ەمەس، ۇمىتكەرلەر تەستىلەۋ اياقتالعاننان كەيىن 30 مينۋت ىشىندە بەرە الادى. ال ونىڭ ءنا­تي­جەسى 30 كۇن ارالىعىندا شىعادى.
ۇلتتىق تەستىلەۋ ورتالىعى كورسەتكەن ستا­تيستيكاعا سۇيەنسەك، قازاق تىلىندە تەست تاپسىراتىن تالاپكەرلەردىڭ سانى جىل سايىن ارتىپ كەلە جاتىر ەكەن. اتاپ ايتساق، بيىل ناۋرىز ايىنداعى تەستىلەۋگە قاتىسقان 105 000 وقۋشىنىڭ 78،2 پايىزى قازاق، 21،7 پايى­زى ورىس، 0،2 پايىزى اعىلشىن تىلىندە تاپ­سىرعان. ونىڭ ىشىندەگى شەت ءتىلىن تاڭ­داعاندار ءبىلىم-يننوۆاتسيا ليتسەيى، جە­كە­مەن­شىك اعىلشىن تىلىندە ءبىلىم بەرەتىن مەكەمە ءتۇ­لەكتەرى ەكەن. دەگەنمەن ولار مىندەتتەلگەن وزگە پاندەردىڭ ىشىنەن جالعىز ءپان قازاقستان تاري­حىن قازاق تىلىندە نە ورىس تىلىندە تاپ­سىرادى. سونداي-اق ورىس مەكتەبىندە وقىعان تالاپكەر تەست كەزىندە قازاق ءتىلىن تاڭداۋعا ءمۇم­كىندىگى بار. بۇرىنعى وقىعان ءتىلى بويىن­شا عانا تاپسىرۋ دەگەن قاعيدانىڭ قازىر ماڭىزدىلىعى جويىلعان.

ۇبت-2022: باستى
جاڭالىقتارى قانداي؟
بۇل ساۋالدى تىكەلەي ۇلتتىق تەستىلەۋ ور­تالىعىنا جولداعان كەزىمىزدە ءبىلىم ءجا­نە عىلىم مينيسترىلىگى شەشىم قابىلداۋ كە­زىندە وقۋشىلاردىڭ ۇسىنىسىن، قىزىعۋ­شىلىعىن نازاردان شىعارماۋعا تىرىساتى­نىن جەتكىزدى. سول سەبەپتى نەگىزگى ۇبت-نى 2 رەت تاپ­سىرۋ مۇمكىندىگى تۋرالى شەشىم تالاپ­كەر­لەر­دىڭ ۇسىنىسىنا سايكەس قابىلدانىپتى. ياعني، وقۋشىلار ەندى ەكى رەت ۇبت تاپسىرىپ، گرانت­قا تۇسۋگە مۇمكىندىك الادى. مەملەكەتتىك گرانت كونكۋرسىنا ەكى سەرتيفيكاتتىڭ بىرەۋىن ۇسىنا الادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ «مۇنداي شارا وقۋ­شىلاردىڭ ەموتسيونالدى سترەسس دەڭگەيىن ءتو­مەندەتۋ ءۇشىن جاسالدى» دەگەن بولاتىن. بىراق تالاپكەرلەر ەكى مۇمكىندىكتە دە ءبىر­بەيىن­دىك پاندەر كومبيناتسياسىن تاڭداۋى كە­رەك. ياعني، ءبىرىنشى مۇمكىندىكتە «ماتەما­تي­كا+فيزيكا» ءپانىن تاڭداسا، ەكىنشى مۇمكىن­دىك­تە دە «ماتەماتيكا+فيزيكا» كومبيناتسيا­سى بويىنشا تاپسىرۋعا ءتيىس.
بيىل­عى ۇبت-نىڭ تاعى دا ءبىر ەرەكشەلى-
گى – ءبىرىنشى مۇمكىندىكتە ەرەجە بۇزعان جاعدايدا ەكىنشى رەت تاپسىرۋ مۇمكىندىگىنەن ايى­رىلادى. ال ەكىنشى تەستىلەۋ بارىسىندا ەرە­جە بۇزسا، ءبىرىنشى جانە ەكىنشى تەستىلەۋدىڭ ءنا­تيجەلەرى جويىلادى. ۇبت ناتيجەلەرى جويىل­عان تالاپكەرلەر تامىزداعى تەستىلەۋگە قا­تىسا الادى، سونىمەن قاتار شارتتى نەگىزدە جوو-عا اقىلى قابىلدانىپ، ۇبت تاپسىرا الا­دى. سول ءۇشىن دە تەست تاپسىرۋشى تۇلەك­تەر­گە اكادەميالىق ادالدىقتى ۇستانۋ ءمىن­دەت­تەلەدى.
بۇل جولى ەرەكشە ءبىلىم بەرۋ قاجەت­تى­لىكتەرى بار بالالارعا دا نازار اۋدارى­لىپ­تى. مىسالى، ولارعا نەگىزگى ۋاقىتتان ءبو­لەك، قوسىمشا 40 مينۋت بەرىلەدى. سونىمەن قا­تار ەرەكشە كومەكتى قاجەت ەتەتىن وقۋشى­لار­عا سۋرەتسىز، سىزبالارسىز جانە دياگرامما­لار­سىز تەست نۇسقالارى جاسالعان. قابىلدان­عان شارالار ەرەكشە ءبىلىم قاجەتتىلىكتەرى بار تەس­تىلەنۋشىلەر سانىنىڭ ارتۋىنا سەبەپ بو­لىپ وتىر ەكەن. ەگەر 2021 جىلى نەگىزگى ۇبت-عا 90 بالا قاتىسسا، بيىل ءۇش اپتا ىشىندە تەس­تى­لەۋگە ەرەكشە ءبىلىم بەرۋ قاجەتتىلىگى بار 310 با­لا قاتىسىپتى.
سونداي-اق اكادەميالىق ادالدىقتى ساق­تاۋ ماقساتىندا تاپسىرىلعان تەست نۇس­قالارى تاڭبالانادى. ياعني، ۇبت-نىڭ ءار قاتىسۋشىسىنىڭ جەكە تەست نۇسقاسى بولادى. ەرە­جەلەردى بۇزعان نەمەسە تەست تاپسىر­ما­لا­رىن اۋديتوريادان شىعارۋعا تالپىنعان جاع­دايدا جوعارىدا ايتىپ وتكەندەي، ولار­دىڭ ناتيجەلەرى جويىلادى. ۇلتتىق تەستىلەۋ ور­تالىعىنىڭ مالىمەتىنشە، وسى كەزگە دەيىن 119 تالاپكەر سمارتفون، شپارگالكا جانە باس­قا دا تىيىم سالىنعان زاتتاردى الىپ ءوتۋ ارە­كەتتەرى ءۇشىن تەست تاپسىرۋ مۇمكىندىگىنەن ايىرىلعان ەكەن. ورتالىقتىڭ سوزىنشە، قاتاڭ با­قىلاۋ مەن تالاپ تەستىلەۋ پروتسەسىنىڭ ءادىل ءارى شىنايى ءوتىپ، ءتۇرلى زاڭسىزدىقتاردىڭ ال­دىن الۋعا نەگىز بولادى.
بيىلعى ۇبت-نىڭ تاعى ءبىر جاڭالىعى – تاقىرىپتىق تالداۋ جۇيەسىنىڭ ەن­گىزىلۋى. ول وقۋشىلاردان بولەك، مەكتەپ مۇعا­لىم­دەرىنىڭ دە قاي باعىتتا جۇمىس جاساۋ كە­رەك­تىگىن باعدارلاۋىنا دا كومەك بولادى. بۇل وپ­تسيا العاش رەت پيلوتتىق جوبا رەتىندە بيىل­عى ناۋرىزداعى ۇبت-دا قوسىلىپتى. بۇرىن تالاپكەرلەردىڭ جەكە كابينەتىندە تەك العان جالپى بالى عانا كورىنەتىن بولسا، بيىل ونىمەن بىرگە تەست قورىتىندىسى بويىنشا تا­قىرىپتىق تالداۋ ناتيجەسى دە بەرىلەدى. ياعني، قازىر نەگىزگى ۇبت-عا دايىندالىپ وتىر­عان بالالار ناۋرىز تەستىلەۋىنىڭ قورى­تىن­دى­سى بويىنشا قاي پاندەردەن جانە قانداي تا­قىرىپتاردان دايىندىعىن جاقسارتۋ قاجەت ەكەنىن بىلەدى. سونىمەن بىرگە 1-ءمۇم­كىندىگىن تاپسىرىپ بولعان تالاپكەر تا­قىرىپتىق تالداۋ ارقاسىندا ەكىنشى ءمۇم­كىندىككە تولىق دايىندالا الادى. بۇل تال­داۋلار اۆتوماتتى تۇردە جاسالاتىندىقتان، ول ارقىلى رەسپۋبليكا كولەمىندەگى ءبىلىم سا­پاسىن باقىلاۋعا دا بولادى ەكەن. الايدا بۇل بۇرىنعىداي مەكتەپ اكىمشىلىگى مەن مۇ­عالىم­دەردىڭ تالاپكەرلەرگە مورالدىق قىسىم جا­ساۋىنا سەبەپ ەمەس. مىسالى، وسى كەزگە دەيىن ءبىلىم وردالارىندا وقۋ ۇلگەرىمى تومەن­دەۋ ءبىتىرۋشى تۇلەكتەردى «تومەن بالل الىپ قال­سا، مەكتەپ رەيتينگىنە كەرى اسەر ەتەدى» دەپ ۇبت-عا قاتىسۋىنا قارسى بولۋ مەن شەتتەتۋ جاع­دايلارىن ءجيى ەستىپ جۇردىك. ول ءالى دە سايا­بىرلاعان جوق.
«بۇل تاقىرىپتىق تالداۋداعى ەڭ نەگىزگى ماق­ساتىمىز – رەيتينگ شىعارۋ ەمەس، ءبىلىم بەرۋ­دىڭ قاي سالاسىندا ءبىزدىڭ كەمشىلىكتەرىمىز بار، سونى تۇزەتۋگە باعىتتاۋ. سول ءۇشىن دە تالاپكەر تومەن ناتيجە كورسەتكەن جاعدايدا وعان بۇرىنعى ۇيرەنشىكتى پرينتسيپپەن اۋىر سىن ايتۋدان اۋلاق بولۋ كەرەك»، – دەيدى ۇتو دي­رەكتورى رۋسلان توقتاربەك ۇلى. سونداي-اق 2017 جىلدان باستاپ ۇبت-عا قاتىسۋ، قاتىسپاۋ ەركى ءار وقۋشىنىڭ وزىنە بەرىلگەن. ونلاين ءتىر­كەلۋدىڭ ءوزى ونىڭ ەشكىمنىڭ ىقپالىنسىز جە­كە شەشىم قابىلداۋىنا مۇمكىندىك بەرەدى. ءتىپ­تى، تاپسىراتىن كۇنىن، ۋاقىتىن، وتەتىن جە­رىن دە ءوزى تاڭداي الادى. ورتالىق ديرەك­تورى­نىڭ سوزىنشە، بۇل جەڭىلدەتىلگەن پرو­تسەس­تەر بالانىڭ تەستىلەۋدەن پسيحولوگيالىق تۇر­عىدان قينالماي ءوتۋى ءۇشىن جاسالعان.
جىل سايىن ۇبت تاپسىرمالارىنا قا­تىستى سىن ايتىلىپ جاتادى. بيىل تەست بازاسىنداعى «قازاقستان تاريحى» ءپانى سۇراقتارىنىڭ سانى وزگەرىسسىز ساقتالا وتىرىپ، كونتەكستىك (مانماتىندىك) تەست ەنگى­زىلىپتى. ياعني، 15 سۇراقتىڭ 5 سۇراعى كونتەكستىك سۇراقتار، ءماتىندى وقىپ سۇراقتارعا جاۋاپ بەرۋ قاجەت. بۇل كونتەكستىك سۇراقتار فاكتو­لو­گياعا ەمەس، فۋنكتسيونالدىق ساۋاتتىلىققا نەگىزدەلگەن ەكەن.
بۇل جوعارىدا اتالعان ەرەجەلەردىڭ بار­لىعى جالپى ءبىلىم بەرۋ مەكەمەلەرى­نە ارنالعان. وسى تۇستا ەلىمىزدە ۇبت-دان بوساتىلعان نازارباەۆ زياتكەرلىك مەكتەپتەرى مەن SAT ەمتيحانىن تاپسىراتىن ءبىلىم مە­كەمەلەرى بار ەكەنىن دە ايتا كەتكەن ءجون. ولار­دىڭ بالىنا ارنايى ەمتيحان ارقىلى كون­ۆەرتاتسيا جاسالىپ، جوو-نا ءتۇسۋ كون­كۋر­سىنا تىكەلەي قاتىسا الادى. ۇتو ديرەك­تورى­نىڭ ايتۋىنشا، الداعى ۋاقىتتا ۇلتتىق تەس­تىلەۋ بارلىق ءبىلىم مەكەمەلەرىنە ءمىن­­­دەتتەلۋى مۇمكىن.
«بىراق بيىل SAT-تىڭ وزىندە ۇلكەن وزگەرىس بول­دى. قازىر ارنايى جوبا جاسالىپ جاتىر. ول جۇزەگە اسقاندا ۇبت-نى تاپسىرمايتىن ءبى­لىم مەكەمەلەرى ەلىمىزدە از قالادى»، – دەيدى ول.

بيىل قانشا گرانت ءبولىندى؟
مەكتەپ ءبىتىرۋشى تالاپكەرلەردى الاڭ­دا­تاتىن كوپ سۇراقتىڭ ءبىرى – وسى. ويتكەنى ءار جىل سايىن باسىمدىق بەرىلەتىن ما­ماندىق سالالارى مەن بولىنەتىن گرانت سا­نى وزگەرىپ وتىرادى. وسى ساۋال بويىنشا ءبى­لىم جانە عىلىم مينيسترلىگىنەن مىناداي جاۋاپ الدىق.
جالپى، بىزدەگى ءبىلىم گرانتتارىن ءبولۋ ەڭبەك جانە حالىقتى الەۋمەتتىك قور­عاۋ مينيسترلىگى بەرگەن ەل ەكونومي­كا­سى­نىڭ سالالارى ءۇشىن قاجەتتى ماماندىقتار بول­جامى نەگىزىندە جاسالادى ەكەن.
كەيىن سول كادرلاردى دايارلاۋعا ارنال­عان مەملەكەتتىك ءبىلىم بەرۋ تاپ­سىرى­سى ۇكىمەتتىڭ ءۇش جىلعا ارنالعان قاۋ­لىسى­مەن بەكىتىلەدى. ستاتيستيكاعا نازار سا­لا­تىن بولساق، ءبىلىم گرانتتارىنىڭ جىل سايىن كو­بەيىپ بارا جاتقانىن بايقاۋعا بو­لادى. مى­سالى، 2019 جىلى جوعارى ءبىلىمى بار كادرلاردى دايارلاۋعا مەملەكەتتىك ءبىلىم بەرۋ تاپسىرىسى 51 023 گرانتتى قۇراسا، 2020 جى­لى 51 056 گرانت بولىنگەن. ال بىلتىر تالاپ­كەر­لەرگە ارنالعان گرانت سانى 56 561 بولعان. جالپى، سوڭعى 5 جىلدا جوعارى ءبىلىمى بار كادرلاردى دايارلاۋعا مەملەكەتتىك تاپسىرىس 50 پايىزدان اسقان.
ەندى 2022-2023 وقۋ جىلى، ياعني بيىلعا ار­نالعان مەملەكەتتىك ءبىلىم بەرۋ تاپ­سىرىسىنا توقتالساق. ەلىمىزدە جوعارى ءبىلىمدى كادرلاردى دايارلاۋعا ارنالعان جالپى سانى 88 214 گرانت ءبولىنىپتى. ونىڭ ىشىندە باكالاۆ­ريات ءۇشىن 73 061 گرانت، ماگيستراتۋراعا 13 263 گرانت، ال دوكتورانتۋرا ارنالعان 1 890 گرانت بار.
مەملەكەت باسشىسىنىڭ تاپسىرماسى بويىنشا بيىل جوو-لارداعى گرانت­تاردىڭ 60 پايىزى تەحنيكالىق مامان­دىقتارعا بولىنەدى ەكەن.
سونداي-اق «بولاشاق» باعدارلاماسى بويىنشا تەحنيكالىق جانە IT مامان­دىقتارعا ارنالعان گرانتتاردىڭ جالپى سانى 36 پايىزدان 60 پايىزعا دەيىن وسەدى.

گرانتقا ءتۇسۋدىڭ بيىلعى
شەكتىك بالى قانشا؟
تەستىلەۋدىڭ ەڭ جوعارى بالل سانى ادەتتەگىدەي – 140. ال شىعارماشىلىق دايى­ن­دىقتى تالاپ ەتەتىن ماماندىقتارعا ءتۇسۋشى تالاپكەرلەر ءۇشىن ەڭ جوعارى بالل – 125 بالل. دەگەنمەن گرانتقا ءتۇسۋ ءۇشىن ۇبت-دان جيناعان بالدىڭ رەسپۋبليكالىق كونكۋرس دەڭ­گەيىندەگى بالمەن سايكەس كەلۋى ماڭىزدى. سول ءۇشىن بيىلعى شەكتى بالدارعا توقتالىپ ءوت­سەك.
ۇلتتىق جوعارى جانە جوعارى وقۋ ور­نىنان كەيىنگى ءبىلىم بەرۋ باعدارلا­ما­لارىن iسكە اسىراتىن ۇيىمدارىنا كەمىندە 65 بالمەن قابىلدانادى. ال «پەداگوگيكالىق عىلىمدار» مەن «قۇقىق» دايارلاۋ باعىتى بويىن­شا بەكىتىلگەن بالل سانى 75-تەن تومەن ەمەس. سونىمەن قاتار «اۋىل شارۋاشىلىعى جانە بيورەسۋرستار»، «ۆەتەريناريا» ءبىلىم بەرۋ سالالارى بويىنشا گرانتقا وقۋعا ءتۇسۋ ءۇشىن 60 بالدان كەم جيناماۋ كەرەك.
ال باسقا دا جوعارى وقۋ ورىندارىنا ءتۇسۋ­دىڭ شەكتى دەڭگەيى كەمىندە 50 بالدى قۇ­رايدى. «پەداگوگيكالىق عىلىمدار» سالاسىندا تەگىن نەگىزدە وقۋ ءۇشىن شەكتى بالل 75-تەن جو­عارى بولۋ كەرەك بولسا، «دەنساۋلىق ساقتاۋ جانە الەۋمەتتىك قامتاماسىز ەتۋ»، ياعني مە­دي­تسينا سالاسى بويىنشا 70 بالدان تومەن بول­ماۋ كەرەك.
سونىمەن قاتار ءار جوو-نىڭ بەلگىلەيتىن ءوز شەكتى بالى بارىن دا ەسكەرگەن دۇرىس. ال بەيىن­دى پاندەر ءبىلىم بەرۋ باعدارلامارى توبى­نا بايلانىستى تاڭدالادى.

رۋسلان ەمەلباەۆ،
ءبىلىم جانە عىلىم مينيسترلىگى
ۇلتتىق تەستىلەۋ ورتالىعىنىڭ ديرەكتورى:

«ۇبت تاپسىرمالارى تەك مەكتەپ باعدارلاماسىنا
ساي قۇراستىرىلادى»

– ۇلتتىق تەستىلەۋ ورتالىعى مينيسترلىكپەن تەك تەستىلەۋ كەزىندە عانا ەمەس، ونىڭ باستالۋىنا دەيىن دە وقۋشىلارعا قولايلى جاعداي جاساۋ ءۇشىن تۇراقتى جۇمىس جۇرگىزىپ كەلەدى. سوندىقتان ءبىز تالاپكەرلەرگە ۇبت-عا دايىندالۋ ءۇشىن ونلاين سىناق تەستىلەۋدى ىسكە قوستىق. بۇل – بارلىق تالاپكەرگە تەگىن. سىناق تەستىلەۋىنەن ءوتۋ كەزىندە تالاپكەر تەست تاپسىرمالارىمەن تانىسۋعا جانە تاڭدالعان پاندەر بويىنشا ءوزىنىڭ ءبىلىم دەڭگەيىن تەكسەرۋگە مۇمكىندىگى بار.
«جاراتىلىستانۋ باعىتىنداعى ءپان سۇراقتارى تىم كۇردەلى. مەكتەپ باعدارلاماسىنان تىس سۇراقتار كوبەيگەن» دەگەن سياقتى سىني ەسكەرتپەلەردى ەستىپ جاتامىز.
الايدا، ۇبت تاپسىرمالارى تەك مەكتەپ باعدارلاماسىنا ساي قۇراستىرىلادى. ول سۇراقتاردى مەكتەپتە ساباق بەرىپ جۇرگەن ءپان مۇعالىمدەرى دايارلايدى. تەست قۇراستىرۋ الدىندا بۇل پەداگوگتەر تەستولوگيا بويىنشا سەمينار-وقىتۋ كۋرستارىنان ءوتىپ، تەست تاپسىرمالارىن دايىنداۋعا كىرىسەدى. دايارلانعان سۇراقتار ەكى رەت ساراپتامادان وتەدى، ءار ساراپتامادان سوڭ تۇزەتۋ جۇمىستارى جۇرگىزىلەدى. ساراپتاماعا دا تاجىريبەلى ءپان مۇعالىمدەرى شاقىرىلادى. ەكى ساراپتاما اياقتالعان سوڭ، تاپسىرمالار مەكتەپتە 11-سىنىپ وقۋشىلارىمەن اپروباتسيادان وتەدى. سودان سوڭ ۇلتتىق تەستىلەۋ ورتالىعىنىڭ ءپان كۋراتورلارى تاپسىرمالاردى ۇبت-نىڭ سۇراقتار بازاسىنا ەنگىزەدى.
جالپى، نەگىزگى ۇلتتىق بىرىڭعاي تەستىلەۋگە قاتىسۋعا 290 مىڭعا جۋىق ءوتىنىش كەلىپ ءتۇستى. مەملەكەتتىك ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن بولاتىن تەستىلەۋ 16 مامىردا باستالىپ، 2022 جىلعى 5 شىلدەگە دەيىن جالعاسادى. بۇل رەتتە تالاپكەرلەر تەستىلەۋ ورنى مەن ۋاقىتىن وزدەرى تاڭدادى.
تاعى ءبىر جاڭالىعىمىز، ءبىلىم بەرۋ ورتالىقتارىنىڭ قولداۋىمەن تەگىن ونلاين ساباقتار جۇرگىزىپ جاتىرمىز. ولار ورتالىقتاردىڭ YouTube ارنالارىندا تىكەلەي ەفيردە وتەدى جانە ساقتالادى. وقۋشىلار كەز كەلگەن ۋاقىتتا ساباقتاردى قايتا قاراي الادى.
تالاپكەرلەر ءۇشىن جاسالعان تاعى دا ءبىر مۇمكىندىك – ەكى جىل قاتارىنان ۇتو قازاقستان تاريحى جانە دۇنيەجۇزى تاريحى پاندەرى بويىنشا 100 داتانى بەكىتتى. تەستىلەۋ بارىسىندا كەزدەسەتىن داتالار تەك وسى 100 داتادان بولادى. ولار جەلتوقسان ايىندا ءبىزدىڭ سايتىمىزعا ورنالاستىرىلدى.
بيىل تالاپكەرلەرگە ىڭعايلى بولۋ ءۇشىن العاش رەت ۇبت-نىڭ كۇنىن، ۋاقىتىن، ورنى مەن بەيىندىك پاندەرىن ەسكە سالاتىن SMS جولداناتىن بولادى. حابارلاما ۇبت-عا قاتىسۋشىلاردىڭ وزدەرىنە، سونداي-اق كامەلەتتىك جاسقا تولماعان تەستىلەنۋشىلەردىڭ اتا-انالارىنا نەمەسە زاڭدى وكىلدەرىنە جىبەرىلەدى. كامەلەتتىك جاسقا تولماعان تالاپكەرلەر نەگىزگى ۇبت-عا تىركەلۋ بارىسىندا اتا-اناسىنىڭ بىرەۋىنىڭ نەمەسە زاڭدى وكىلدىڭ اتى-ءجونىن جانە بايلانىس تەلەفونىن كورسەتتى.
ايتا كەتسەم، نەگىزگى ۇبت-عا قاتىسۋعا ءوتىنىش بەرۋ 2022 جىلعى 28 ءساۋىر مەن 14 مامىر ارالىعىندا app.testcenter.kz سايتىندا جۇزەگە استى. وتىنىشتەردى قابىلداۋدى 24 ساعات رەجيمىندە ۇزدىكسىز جۇرگىزدىك.
جاڭا ەرەجەلەر مەن وزگەرىستەردىڭ بارلىعى بالالاردىڭ فيزيكالىق، پسيحولوگيالىق مۇمكىندىكتەرىن ەسكەرە وتىرىپ قابىلداندى. ءالى دە تەستىلەۋدىڭ ءوتۋ بارىسى مەكتەپ ءبىتىرۋشى تۇلەكتەرىمىزگە بارىنشا جەڭىل ءارى ىڭعايلى بولۋى ءۇشىن جۇمىس جاساپ جاتىرمىز.

تۇيىندەسەك، ۇبت-نىڭ جىل سايىن ەرەجەلەرى مەن وتكىزۋ فورماتىنىڭ وزگەرۋى تەست تاپسىرۋشى تالاپكەرلەرگە بارىنشا قولايلى جاعداي جاساۋعا باعىتتالىپ جاتقانى قۋانتادى. جاڭا وزگەرىستەردىڭ ەنۋى ءبىتىرۋشى تۇلەكتەرگە مەكتەپ تاراپىنان مورالدىق قىسىم جاسالۋىنا شەكتەۋ قوياتىن شىعار دەگەن ءۇمىت بار. بيىلعى جاڭالىقتىڭ ەڭ ءتيىمدى تۇسى – وقۋشىلاردىڭ اقىلى جانە تەگىن نەگىزدەگى جوو ءۇشىن تەستتى وزدەرى قالاعان ۋاقىتتا 2-3 رەت تاپسىرۋعا مۇمكىندىك بەرىلۋى. دەگەنمەن ۇلتتىق تەستىلەۋدى ورتاق ءبىر جۇيە مەن ستاندارتتى فورماعا كەلتىرەتىن دە ۋاقىت كەلگەن سياقتى. بۇل – قوعام تالابى. سونداي-اق بىرىڭعاي تەستىلەۋدى ءبىلىم مەكەمەلەرىنىڭ بارىنە تاپسىرۋدى مىندەتتەۋ تەزىرەك جۇزەگە اسسا، ۇبت ەلدەگى بارلىق ءبىتىرۋشى تۇلەكتەردىڭ تىلەگىن ءبىر جەرگە تۇيىستىرەتىن نەگىزگى سىناق پلاتفورماسى ستاتۋسىنا يە بولار ەدى.
دەگەنمەن بۇل تەستىلەۋ ءومىر مەن ءبىلىم ەمتيحاندارىنىڭ ەڭ سوڭعىسى ەمەستىگىن ۇمىتپاعان دا ءجون.

ۇقساس جاڭالىقتار

Back to top button