50438
Бейнелеушілердің құтты мекені
Бейнелеушілердің құтты мекені
![Бейнелеушілердің құтты мекені](https://turkystan.kz/cache/imagine/1200/uploads/resized-images/2022/05/15a3e210-01fb-47d5-80fc-c209233ad62e.jpg)
Қазақтың бекзада өнерін халықаралық аренада таныстырып қана қоймай, жаңа есімдерді көпшілікке танытып келе жатқан – елордамыздағы Has Sanat өнер галереясы. Мұнда келушілер Қазақстан және шетел суретшілері мен шеберлерінің түрлі туындыларымен таныса алады. Өнерсүйер қауым назарына кескіндеме, графика, мүсін және гобелен түрлерінің сан алуан топтамасы ұсынылады.
2003 жылы Астана қаласында ашылған галереяның атауы – көне түркі тілінен аударғанда «нағыз өнер» деген мағынаны білдіреді. Негізгі мақсаты – қазақтың төл мәдениетін дамыту және сақтау, ұлттық бейнелеу өнерін шетелдерде насихаттап, дарынды суретшілер мен шеберлерге қолдау көрсету. Has Sanat залында дәстүрлі классикадан бастап, қазіргі заманғы авангардқа дейінгі стильде жасалған картиналар орналасқан.
– Қазір елімізде суретшілердің картиналарын насихаттайтын галереялар азайып кетті. Көрмелер көбіне Ұлттық мұражайда өтеді, оған кезекке тұрып, ұзақ уақыт күтуге тура келеді. Ал Has Sanat галереясының қай уақытта болса да есігі ашық, – дейді ҚР Өнер академиясының академигі, Лондон шығармашылық гильдиясының мүшесі Әділғали Баяндин.
Has Sanat көктем және күз маусымдарында дәстүрлі түрде көрмелер ұйымдастырады. Көктем уақытында талантты жастарды қолдауға көңіл бөлсе, күз мезгілінде атақты шеберлердің туындылары салтанат құрады. Әр көрменің өзіндік тақырыптары қарастырылған.
Еліміз енді еңсе түзей бастаған 2000 жылдардың басында галерея басшысы Жанна Еңсебаеваның орасан зор қолдау көрсеткенін отандық суретшілер ыстық ықыласпен еске алады.
– Has Sanat-та әр суретшінің көрмесіне асқан жауапкершілікпен дайындалады. Ыстық ықыласпен, үлкен ұқыптылықпен, риясыз сүйіспеншілікпен өткізеді. Өзі кәсіби маман болғандықтан, Жанна айналасына да сезімтал, сергек ұжым жинаған. Ол Президент сарайында менің жеке шығармашылық көрмемді өткізді. Оған үлкен-үлкен жұмыстарым қойылды. Жұмысым жайында ешкім білмеген кезде, көпшілік көрмеген тұста Жанна Рахметжанқызы сол шығармама ғашық болған еді. Тіпті, «Астананың төрінде тұруға лайық жұмыс» деп танып, жылы лебізін білдіргені бар. Осылайша, әлі күнге дейін Нұр-Сұлтан қаласындағы Ұлттық мұражайда менің «Кербез Астана» деген жұмысым сақтаулы тұр, – дейді ҚР Суретшілер одағы басқармасының мүшесі Шоқан Төлеш.
Has Sanat өнер галереясының маңызды жобаларының бірі – қазақстандық заманауи суретшілердің «Алтын ғасыр» халықаралық жылжымалы көрмесі.
2006 жылы алғаш рет Мәскеу қаласындағы «Манеж» көрме залында таныстырылып, ары қарай Мемлекеттік шығыс халықтары өнері музейінде, Ресейдің Орталық суретшілер үйінде зор табыспен жалғасын тапты. 2007 жылы көрме Еуразия кеңістігіндегі мемлекеттер астанасына жолға шығып, 10-нан астам елді аралап қайтты.
Он алты жыл ішінде коллекция Польша, Германия, Голландия бағыты бойынша: Варшава – Вроцлав, Берлин – Штутгарт, Мюнхен, Франкфурт; Амстердам – Эйндховен қалаларын қамтыды. Сонымен қатар Түркия, Оңтүстік Корея, Иран елдеріндегі ең үздік мұражайлар мен галереяда көпшілік назарына ұсынылды.
2009 жылы 1 қазаннан 25 желтоқсанға дейін Нидерланды мемлекетінде болып, Гаага қаласындағы Ernst and Young көрме залында көрермендерін тәнті етті.
Осы мақсатты көздеген Has Sanat өнер галереясының коллекциясында түрлі жанр мен бағыттағы заманауи суретшілердің жүздеген туындысы жинақталған. Олардың қатарында
А.Сыдыханов, А.Ақанаев, Е.Төлепбай, К.Муллашев, А.Ахат, А.Нода, Б.Бапишев, Ш.Төлеш, Э.Казарян, М.Бекеев, Л.Оразбекова, А.Деникеев, Н.Бубэ, Р.Ақанаев, Б.Ақанаева, Е.Айтуаров, Л.Ахмет-Осман, В.Гвоздев (Шеге), Л.Махат, С.Бектияров, А.Смағұлов, Б.Зәуірбекова, Б.Тұрғынбай, А.Бектас, Ғ.Қаржасов, Е.Бейсембинова, Е.Волкова, Б.Асанова және тағы басқалар бар.
Суретші, зергер-дизайнер, коллекционер Сержан Башировтың айтуынша, өнер галереясы шетелдің көптеген галереяларымен, фестивальдарымен тығыз байланыс орнатқан. Соның жарқын бір мысалы – Ыстанбұлдағы симпозиумдарға отандық суретшілер жиі қатысып тұрады.
– Галерея өзіміздің суретшілерді ғана емес, шетелдің белгілі қылқалам шеберлерінің өнерін де таныстырып (авангард, реализм т.б. ағымдар бойынша), халықтың, көрерменнің өнерге деген сауатын көтеру жағынан көп жұмыс атқарып отыр. Студенттердің шығармашылығын шыңдап, тәжірибесін арттыруға таптырмайтын орын. Алдағы уақытта олардың да осы галереяда қанаттанып, жеке көрмесін өткізеріне сенімдімін, – дейді шебер.
Галерея құрылған сәттен бастап қайырымдылық іс-шаралармен айналысып, мүмкіндігі шектеулі балаларға көмек көрсетуді жолға қойған. Мәселен, бүгінге дейін мүмкіндігі шектеулі балаларға көмек ретінде 18 қайырымдылық шара қолға алынды. Соның қатарында 20-дан астам бала оқитын «Океан Арт» терапия студиясының патронажы бар. 2009 жылы студия қатысушыларының суреттері топтастырылған балалар мультфильмінің алғашқы фестивалі өтті.
Has Sanat жас суретшілердің өнерден өз орнын табуына да ықпал етуде. Мәселен, суретші Ботагөз Төлеш «Осы жерде көрме өткізген адамның кеудесінде бір ұшқын пайда болады» деген пікірде.
– Has Sanat-тың энергетикасы тамаша. Біз бұл жерге өнер жайлы әңгімелесу үшін, өз ойымызды ортаға салу үшін келеміз. Әр суретші өзінің әлемімен келеді. Әр көрмеден кейін әдемі бір аура қалыптасады. Мұндай жайлы орта бізге қанат бітіреді, қиялымыз шарықтайды. Has Sanat қазақ өнерінің болашағы – жастарды қолдап, қамқорлық танытады, – дейді ол.
Has Sanat өнер галереясында көрмелерден бөлек, мәдени іс-шаралар мен шеберлік дәрістер өтіп тұрады. Атап айтқанда, ArtStudio Has Sanat ересектер мен 14 жастан асқан балаларға сурет салу курстарын өткізіп, әртүрлі тақырыпта экскурсиялар жүзеге асты. Сонымен қатар бұл жерде жас таланттарға арнап Қазақстанның атақты суретшілерінің шеберлік сағаттары жиі өткізіледі.
Б.БАЛЫҚБАЙ