ءبىر ۆيتسە-مينيستر، 2 سۋديا، 3 گەنەرال جەمقورلىق فاكتىسىمەن ۇستالعان

جىل باسىنان بەرى 1 ۆيتسە-مينيستر، 2 سۋديا، 3 گەنەرال جەمقورلىق فاكتىسى بويىنشا جاۋاپكەرشىلىككە تارتىلعان. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ولجاس بەكتەنوۆ ءمالىم ەتتى دەپ حابارلادى turkystan.kz.

 «بۇگىن مەن مەملەكەت باسشىسىنا سىبايلاس جەمقورلىققا قارسى ءىس-قيمىل بارىسىنىڭ ناتيجەسىن باياندادىم. جىل باسىنان بەرى ەلىمىزدە ءبىر مىڭنان استام سىبايلاس جەمقورلىق فاكتىلەرى تىركەلىپ، 600-دەن استام تۇلعا قىلمىستىق جاۋاپكەرشىلىككە تارتىلدى. سونىڭ ىشىندە 1 ۆيتسە-مينيستر، 2 سۋديا، 3 گەنەرال بار. پرەزيدەنتتىڭ ەلىمىزدە ءتارتىپ ورناتۋ، ەكونوميكامىزدى مونوپوليادان بوساتۋ تۋرالى تىكەلەي تاپسىرماسىمەن جۇرگىزىلىپ جاتقان جۇمىستىڭ ناتيجەسىندە 220 ملرد تەڭگەدەن استام قاراجات بيۋدجەتكە قايتارىلدى»، – دەدى اگەنتتىك باسشىسى بورت №1 ارناسىندا جاريالانعان شاعىن سۇحباتتا.

ونىڭ سوزىنشە، سىبايلاس جەمقورلىقتىڭ الدىن الۋ باعىتى بويىنشا دا بەلسەندى جۇمىس اتقارىلىپ كەلە جاتىر.

«جاقىندا عانا اگەنتتىك قىزمەتكەرلەرى كولىكتىك باقىلاۋ كوميتەتىنىڭ جۇمىسىن تالدادى جانە قۇزىرەتتى ورگاندارعا ءتيىستى ۇسىنىستار ەنگىزدى. مەملەكەت باسشىسى باياندامامدى مۇقيات تىڭداپ، اگەنتتىكتىڭ قىزمەتىن ودان ءارى جەتىلدىرۋ بويىنشا ءتيىستى تاپسىرمالار بەردى»، – دەدى ولجاس بەكتەنوۆ.

ايتا كەتسەك، بۇگىن پرەزيدەنت سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ولجاس بەكتەنوۆتى قابىلدادى.

ۇقساس جاڭالىقتار

Back to top button