مۇعالىمدەردى گازەتكە جازدىرىپ، كوشە سىپىرتقان 700-گە جۋىق باسشى جازالاندى

بىلتىر ەلىمىزدە مۇعالىمدەردىڭ قۇقىعىن بۇزعان باسشىلار اكىمشىلىك جاۋاپكەرشىلىككە تارتىلدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ Tengrinews.kz-ءتىڭ Instagram جەلىسىندەگى پاراقشاسىندا وتكەن تىكەلەي ەفير بارىسىندا ايتتى دەپ جازدى turkystan.kz.

بۇگىندە پەداگوگتەرگە جاعداي جاسالۋدا. ارينە، بىرىنشىدەن، ول – جالاقىنىڭ كوبەيۋى. بۇگىندە قىسقا ۋاقىت ىشىندە ورتاشا العاندا جالاقى 2 ەسە ءوستى. ەكىنشىدەن، قاعازباستىلىقپەن كۇرەس. ءبىز قاجەت بۇيرىقتى قابىلدادىق. ياعني، مۇعالىمدە كۇندەلىكتى تولتىراتىن تەك ەكى قۇجاتى بولۋى كەرەك. ارينە، بۇل بۇيرىقتى بۇزاتىن باسشىلار دا بار. ولاردى جاۋاپكەرشىلىككە تارتىپ جاتىرمىز. بىلتىردىڭ وزىندە بۇعان جول بەرگەن 700-گە جۋىق باسشى جازالاندى. بۇل مينيسترلىك وسى ماسەلەمەن كۇرەسىپ جاتقانىن كورسەتەدى»، – دەدى اسحات ايماعامبەتوۆ تىكەلەي ەفير بارىسىندا.

ءمينيستردىڭ ايتۋىنشا، مۇعالىمدەردى بوگدە جۇمىستارعا تارتۋ، گازەت-جۋرنالدارعا جازىلۋعا مىندەتتەۋ، كوشە سىپىرتۋ سياقتى ماسەلەلەر بار. مەملەكەت باسشىسىنىڭ قولداۋىنىڭ ارقاسىندا الداعى ۋاقىتتا بۇل ماسەلەلەر جويىلماق.

ەسكە سالا كەتسەك، 2020 جىلدىڭ 31 جەلتوقسانىندا مەملەكەت باسشىسى قاسىم-جومارت توقاەۆ 21 باپتان تۇراتىن «پەداگوگ مارتەبەسى تۋرالى» زاڭ جوباسىنا قول قويعان بولاتىن.

ۇقساس جاڭالىقتار

Back to top button