قانداستارعا ارنالعان قالاشىقتىڭ قۇرىلىسى باستالدى

بۇل تۋرالى دۇنيەجۇزى قازاقتارى قاۋىمداستىعىنىڭ ءباسپاسوز قىزمەتى حابارلادى.
ولاردىڭ ايتۋىنشا، وتكەندە دۇنيەجۇزى قازاقتارى قاۋىمداستىعىنىڭ باستاماسىمەن نۇر-سۇلتان قالاسىمەن شەكتەسەتىن اقمولا وبلىسى، ارشالى اۋدانىنىڭ اۋماعىندا قانداستارعا ارنالعان اگروقالاشىقتىڭ قۇرىلىسى باستالعانىن حابارلاعان ەدىك. سودان بەرى ايعا جۋىق ۋاقىت ءوتتى. «اسار» ادىسىمەن قولعا الىنعان قۇرىلىس جەر تەلىمدەرىندە بولاشاق تۇرعىنداردىڭ ءوز كۇشىمەن سالىنۋدا. بۇگىندە ول جەردە ءۇش-ءتورت كوتتەدجدىڭ ىرگەتاسى قالانىپ، وزگە دە ۇيلەردىڭ قۇرىلىس جۇمىستارى باستادى. جالپى، بارلىق قۇرىلىس تالاپتارىنا ساي دەڭگەيدە جۇمىس جۇرگىزىلۋدە. تۇرعىنداردىڭ اراسىندا كانىگى قۇرىلىسشىلار مەن ارنايى مامانداردىڭ بولۋى، جۇمىستى ءبىرشاما جەڭىلدەتىپ وتىر.
«بۇل – ەلباسى، دۇنيەجۇزى قازاقتارى قاۋىمداستىعىنىڭ توراعاسى ن.نازارباەۆتىڭ شەتەلدەگى قانداستاردى تاريحي وتانىنا اكەلۋ، قازاقستاندىقتاردىڭ الەۋمەتتىك قورعالماعان ساناتتارىنىڭ تۇرعىن ءۇي ماسەلەلەرىن شەشۋ جانە جاڭا جۇمىس ورىندارىن قۇرۋ تۋرالى تاپسىرماسى اياسىندا قولعا الىنعان اۋقىمدى ءىس. بۇعان دەيىن قۇرىلىس سالىناتىن جەردى راسىمدەۋ مەن ءتيىستى قۇجاتتاردى رەتتەۋ شارالارى ءجۇردى. جەر تەلىمدەرى يەلەرى ەسەبىنەن 35 ميلليون تەڭگەگە جوبالىق-سمەتالىق قۇجاتتار جاسالدى. ارينە، بۇل شارالاردى رەتتەۋگە ەكى-ءۇش جىل ۋاقىت كەتىپ قالدى. ونىڭ ۇستىنە بىلتىرعى ىندەتكە بايلانىستى كارانتين ءبىر جىل ۋاقىتتى «جەپ» قويدى. وسىنداي كەدەرگىلەردەن ءوتىپ، ەندى عانا شەتتەن كەلگەن جانە وڭتۇستىكتەن سولتۇستىككە قونىس اۋدارعان قانداستارىمىزعا باسپانا سالۋعا مۇمكىندىك تۋىپ وتىر. اتالعان قالاشىقتا بولاشاقتا بارلىعى 1 282 وتباسىعا ارنالعان كوتتەدجد سالىنۋعا ءتيىس. قالاشىقتىڭ ىشىنە كوشە-جول، كارىز جانە سۋ قۇبىرى جەلىلەرى سياقتى ينجەنەرلىك-كوممۋنيكاتسيالىق ينفراقۇرىلىم قۇرىلىسى بويىنشا جۇمىستار جۇرگىزىلۋ ءۇشىن رەسپۋبليكالىق بيۋدجەتتە قاراجات قاراستىرىلدى. شاعىن اۋداننىڭ سۋ مەن كارىز جەلىلەرىن سىرتقى جەلىگە قوسۋدى جوبالاۋ، سونداي-اق، ەلەكتروەنەرگيا جانە گاز جەلىلەرىن جۇرگىزۋ ءۇشىن جوبالاۋ-سمەتالىق قۇجاتتاماسىن ازىرلەۋ ماسەلەلەرى قازىرگى ۋاقىتتا شەشىلمەي تۇر. بۇل جۇمىسقا ارشالى اۋدانىنىڭ اكىمشىلىگى بايقاۋ جاريالاپ، تەز ارادا جوبالاۋ-سمەتالىق قۇجاتتامانى دايىنداۋعا كىرىسۋى ءتيىس. وسى ماسەلەلەردىڭ تەزىرەك شەشىمىن تابۋعا ىقپال ەتۋىن ءوتىنىپ، اقمولا وبلىسى اكىمى ە.مارجىقپاەۆقا حات جولداندى. ءدال وسىنداي جوبا وزبەكستاننان قازاقستانعا قونىس اۋداراتىن قانداستارىمىز ءۇشىن تۇركىستان وبلىسىنىڭ كەلەس ايماعىندا قولعا الىنعان. وندا ازىرشە جەر تەلىمدەرىن راسىمدەۋ شارالارى جۇرگىزىلۋدە. كەلەستە شاعىن اۋدان سالۋ ءۇشىن 300 گەكتار جەر جانە اۋىل شارۋاشىلىعىنا پايدالانىلاتىن 180 گەكتار سۋارمالى جەر ءبولۋ تۋرالى ماسەلە شەشىلدى. مۇندا دا قانداستاردى تۇرعىنۇيمەن جانە اۋىلشارۋاشىلىق ونىمدەرىن ءوندىرۋ باعىتىنداعى جۇمىستارمەن قامتۋ قاراستىرىلعان. قازىر الەمدى جايلاعان ىندەت جاعدايىندا قويىلعان شەكتەۋلەرگە بايلانىستى ول جاقتاعى تاريحي وتانىنا ورالۋعا ىنتا بىلدىرگەن قانداستاردى ەلگە اكەلۋ ءبىرشاما قيىندىقتار تۋعىزىپ وتىر.
دۇنيەجۇزى قازاقتارىنىڭ قاۋىمداستىعى رقب باسقارما توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ وسى شارۋانى تياناقتاۋ ءۇشىن ۇنەمى ەكى ايماقتا ءىسساپاردا جۇرەدى. كەشە نۇر-سۇلتان قالاسىنا ورالىسىمەن بىردەن قاۋىمداستىق قولعا الىپ وتىرعان «تۇرعىن ءۇي جانە جۇمىس» قاعيداتى بويىنشا سالىنىپ جاتقان اگروقالاشىقتىڭ قۇرىلىس باسىنا كەلدى. ونداعى قۇرىلىس بارىسىن ءوزى قاداعالاپ، باسى-قاسىندا ءجۇر. ۇلكەن قولبايلاۋ بولىپ تۇرعان نارسە – ەلدەگى قىمباتشىلىق. از عانا ۋاقىتتا قۇرىلىس ماتەريالدارىنىڭ ءبارى 50 پايىزعا باعالارىن كوتەرىپ جىبەردى. كىرپىش تاپشى. وسىنداي كەدەرگىلەرگە قاراماستان بيىل قىركۇيەك ايىنىڭ سوڭىنا دەيىن 30 كوتتەدجدى تولىق سالىپ ءبىتىرۋ جوسپارلانعان. وسى ۇدەدەن شىعۋ ءۇشىن جۇمىلعان جۇرت تىنىمسىز ەڭبەك ۇستىندە. ءسويتىپ، قانداستارعا ارنالعان قالاشىقتاعى العاشقى ونشاقتى ءۇيدىڭ ىرگەتاسى قالانىپ، جۇمىس قىزا ءتۇستى» – دەيدى دۇنيەجۇزى قازاقتارى قاۋىمداستىعىنىڭ ءباسپاسوز قىزمەتى.
قانداستارعا ارنالعان قالاشىقتىڭ قۇرىلىسى باستالدى
Back to top button