جايىق كيىكتەرىنىڭ پوپۋلياتسياسى 217 مىڭ باسقا جەتتى

پرەمەر-ءمينيستردىڭ ورىنباسارى رومان سكليار پارلامەنت وكىلدەرىنىڭ دەپۋتاتتىق ساۋالىنا بەرگەن جاۋابىندا «بوكەيوردا» تابيعي رەزەرۆاتىنىڭ قۇرىلىسى تۋرالى باياندادى.

«قازاقستان اۋماعىندا، جايىق جانە ءۇستىرت كيىكتەرىنىڭ الەمدىك پوپۋلياتسياسىنىڭ 95 پايىزدان استامى مەكەندەيدى. بۇگىنگى تاڭدا جايىق كيىكتەرىنىڭ پوپۋلياتسياسى 217 مىڭ باسقا جەتتى نەمەسە بۇل قازاقستانداعى بارلىق كيىكتىڭ 65%-ى دەگەن ءسوز. جايىق كيىكتەرىنىڭ تىرشىلىك اياسىن ساقتاۋ ءۇشىن باتىس قازاقستان وبلىسىنداعى «بوكەيوردا» مەملەكەتتىك تابيعي رەزەرۆاتىن جانە اششىوزەك مەملەكەتتىك تابيعي قاۋمالىن قۇرۋ بويىنشا بىرقاتار ءىس-شارا جۇرگىزىلىپ جاتىر»، – دەپ جازىلعان جاۋاپتا.

رومان سكلياردىڭ ايتۋىنشا، باتىس قازاقستان وبلىسىندا تابيعي رەزەراۆات پەن قاۋمال قۇرۋ ءۇشىن زاڭنامانىڭ جەكەلەگەن تالاپتارىن ورىنداۋ قاجەت، ونىڭ ىشىندە كەلەسى ءىس-شارالار ورىندالعان:

1) شتاتتىق سانى 78 بىرلىك، جالپى الاڭى 343 040،1 گا رەزەرۆات جانە جالپى الاڭى 314 504 گا قاۋمال قۇرۋ ءۇشىن تەحنيكالىق-ەكونوميكالىق نەگىزدەمە ازىرلەندى جانە مەملەكەتتىك ەكولوگيالىق ساراپتامانىڭ قورىتىندىسى الىندى;

2) «رەسپۋبليكالىق ماڭىزى بار اششىوزەك مەملەكەتتىك تابيعي قاۋمالىن جانە «بوكەيوردا مەملەكەتتىك تابيعي رەزەرۆاتى» رەسپۋبليكالىق مەملەكەتتىك مەكەمەسىن قۇرۋ تۋرالى» ۇكىمەت قاۋلىسىنىڭ جوباسى ازىرلەندى.

3) مەملەكەت باسشىسى رەزەرۆات پەن قاۋمالدىڭ قىزمەتىن قامتاماسىز ەتۋ ءۇشىن شتات سانىن ءبولۋدى ماقۇلدادى;

4) قازىرگى ۋاقىتتا 2021 جىلعا ارنالعان رەزەرۆات پەن قاۋمال قۇرۋ ءۇشىن بيۋدجەتتىك ءوتىنىم قالىپتاستىرىلىپ، ول رەسپۋبليكالىق بيۋدجەت كوميسسياسىنىڭ قاراۋىنا ەنگىزىلەدى.

ەسكە سالساق، ءماجىلىس دەپۋتاتى ايجان ىسقاقوۆا باتىس قازاقستان وبلىسىندا «بوكەيوردا» مەملەكەتتىك تابيعي رەزەرۆاتىن قۇرۋ جوباسى نەگە توقتاپ قالعانىن سۇراپ، ۇكىمەتكە ساۋال جولداعان بولاتىن.

ۇقساس جاڭالىقتار

Back to top button