Алматы облысының үш елдімекенін су басты

Алматы облысында ауа температурасы көтеріліп, жауын-шашын мен қардың еруіне байланысты жеке тұрғын үйлердің ауласын су басты. Бұл туралы ҚР Төтенше жағдайлар министрлігінің ресми өкілі Талғат Уәли мәлімдеді. Алматы облысындағы Ескелді ауданының Ешкіөлмес және А.Алдабергенов ауылын, сондай-ақ Көксу ауданының Талапты ауылын су басқан. «8 ақпан күні түнде Алматы облысының ТЖД-ға 3 елді мекенінде жеке тұрғын үйлердің 40 ауласы су астында қалғаны туралы хабарлама келіп түсті. Алматы облысы ТЖД және жергілікті атқарушы органдардың қызметкерлері Ескелді ауданы Ешкіөлмес ауылындағы оқиға орнынан 10 адамды эвакуациялады және олар орта мектепке орналастырылды. Мотопомпалардың көмегімен су сорғытылды. ТЖД-да жедел штаб құрылып, жедел желі жұмыс істеп жатыр. Қазіргі уақытта арықтарды тереңдету, үйінді бөгет салу және еріген суды бұру бойынша жұмыс жүргізілуде», – деді ресми өкіл. Су басқан жерлерде барлығы Алматы облысы ТЖД күштері мен құралдары 67 қызметкер, 15 бірлік техника, 18 мотопомпа, жергілікті атқарушы органдардан 28 қызметкер, 5 бірлік техника және 5 бірлік мотопомпа, АПБ 7 қызметкер, 3 бірлік техника жұмылдырылды. «ҚР ТЖМ азаматтардан су тасқыны қаупі бар кезеңде қауіпсіздік ережелерін сақтауды, аула аумақтарына іргелес арық желілерін қар мен қоқыстан уақытылы тазартуды сұрайды. Құтқару қызметінің бірыңғай телефоны 101 немесе 112», – делінген хабарламада.