Түркия президенті Режеп Тайып Ердоған түрік оппозициялық қайраткері Фетхуллах Гүленді қайтару мәселесін АҚШ президенті Барак Обамамен "Үлкен жиырмалық" саммитінде талқылауды көздеп отыр. Саммит 4 қыркүйекте Қытайда өтеді.
Бұл туралы Түркия президентінің өкілі Ибрагим Калын мәлімдеді. Вашингтон бұл мәлімдемеге әзірге жауап берген жоқ.
24 тамызда Анкараға барған АҚШ вице-президенті Джо Байден Құрама Штаттардың діни қайраткер Гүленге тағылған айыптардың қаншалықты дұрыстығын бағалау үшін Түркиямен әріптестік орнататынын мәлімдеген.
Анкара АҚШ-та тұратын Гүленді биыл шілдеде Түркияда әскери төңкеріс жасауға талпынды деп айыптап отыр. Бұл айыптардың барлығын жоққа шығарған Гүлен кінәсін тәуелсіз сот дәлелдеген жағдайда ғана елге оралуға дайын екенін мәлімдеді.