Мәслихат хатшысы елордада үйлерді газға қоса алмай жатқандарды сынады

Мәслихат хатшысы елордада үйлерді газға қоса алмай жатқандарды сынады

Мәслихат хатшысы елордада үйлерді газға қоса алмай жатқандарды сынады
ашық дереккөзі

Елорда мәслихатының хатшысы Ерлан Каналимов қала аумағында үйлерді газға қосу қарқынын сынға алды, деп хабарлады turkystan.kz ҚазАқпаратқа сілтеме жасап. Атап айтқанда, қалалық мәслихатта аудандар белсенділерінің қатысуымен «ҚазТрансГазАймақ» АҚ-ның елорда өндірістік филиалының қаланы газдандыру барысы туралы есебі тыңдалды.

«Кездескен адамдардың көбісі үйге газ тарту рәсімі өте күрделі екенін айтып жатыр. Тұрғындардың осы уәжін компания өкілдеріне қайталап жеткізіп отырмын. Неге осындай жағдай қалыптасты? Тұрғындардың шағымынан кейін Алматыға және басқа да қалалардағы әріптестеріме телефон шалып, мән-жайды білдім. Оларда осындай шектен тыс талаптар жоқ, тұрғындар қалыпты түрде үйіне газ тартып жатыр. Бізде жапсарлас салынған және басқа да құрылыстарға техпаспорт талап етеді. Бұлай істеуге болмайды. Тұрғын үйдің өзіне құжат берілді ғой, сол жеткілікті», - деді Ерлан Каналимов.
Осы орайда, ол қажет болған жағдайда талаптарға түзету енгізу керек екенін атап өтті.
«Бұл – сіздердің ішкі құжаттарыңыз. Акционерлік қоғамның қандай да бір қағидалары да болуы мүмкін. Егер ол тұрғындардың газға жаппай қосылуына кедергі болса, бұл пункттерді өзгерту бастамасымен шығайық. Өздеріңіз бір ережелерді ойлап тауып алғандықтан, адамдар үйіне дейін тартылған газға қосыла алмай әуре болып жүр. Үйдің маңындағы құрылыстың заңдастырылмағаны, жазғы ас үйдің кейін салынғаны сияқты сылтауларға сүйеніп, газ тартылмай жатыр. Мұның бәрі соншалықты кедергі болмауы тиіс. Өздеріңіз осындай кедергілерді қолдан жасап алғансыздар», - деді мәслихат хатшысы компания өкіліне қарата айтқан сөзінде.
Өз кезегінде жауапты мамандар тиісті заңнамада құжаттар тізімі бар екенін және аталған пункттерді алып тастау керек екенін атап өтті.
«Бүгін осы жиыннан кейін Алматыдағы әріптестермен байланысқа шығып, осы мәселе қалай шешілгенін анықтап алуларыңызды сұраймын. Олардың тәжірибесін қолдану керек. Алматыда жағдай дүрбелеңсіз шешіліп жатыр. Яғни, онда үйлерді газға қосу қарқынды жүреді», - деді Ерлан Каналимов.