"Нанды 140 теңгеден алып, 354 теңгеден сатқан": Кәсіпкер Алматы облысындағы балалар үйіне азық-түлікті қымбат бағаға сатқан

Наннан бөлек, қарақұмық жармасын 281 тг/кг алып, 687 тг/кг сатқан.

Алматы облысының Қиын өмір жағдайындағы балаларды қолдау орталығында жоғары бағамен сатып алу фактілері анықталды, деп хабарлайды turkystan.kz Қаржылық мониторинг агенттігінің баспасөз қызметіне сілтеме жасап.

Қазір орталықта 120-дан астам кәмелетке толмаған бала тәрбиеленіп жатыр.

Белгілі болғандай, жеткізуші нанды 140 теңгеден сатып алып, оны балалар үйіне 354 теңгеден (153% үстемақымен) өткізген.

Сондай–ақ, ол қарақұмық жармасын – 145% (281 тг/кг алып, 687 тг/кг сатқан), күнбағыс майы - 63% (600 тг/л алып,  977 тг/л сатқан), қант – 38% (350 тг/кг алып, 480 тг/кг сатқан) үстемеақымен жеткізген.

Қолданыстағы заңнамаға сәйкес ӘМАТ-қа шекті сауда үстемесінің мөлшері 15%-дан аспауға тиіс.

Қабылданған шаралардың нәтижесінде жеткізуші әкімшілік жауапкершілікке тартылды, ал Орталықпен жасалған ӘМАТ-ты жеткізу шарты 1,3 млн теңгеге төмендету бағытында қайта қаралды.

Сондай-ақ, Агенттік қабылдаған шаралар нәтижесінде өңірдің бірқатар балабақшалары жеткізушілермен сатып алу бағасын 3,9 млн теңгеге төмендете отырып, қосымша келісімдер жасасты.