Әйелін өлтіріп, денесін орманда жасырған ер адам 10,5 жылға сотталды

Қылмыс былтыр 13 шілде күні Петропавлда жасалған

Петропавлда әйелін пышақтап өлтірген ер адам 10,5 жылға, ал ауыр қылмыстың ізін жасыруға көмектескен оның немере інісі 1,5 жылға сотталды. Бұл туралы turkystan.kz «Астана» арнасына сілтеме жасап хабарлады.

Солтүстік Қазақстан облыстық соты баспасөз қызметінің мәліметінше, қылмыс былтыр 13 шілде күні Петропавлда жасалған. Ер адам әйелімен жанжалдасып, оны үй маңындағы орманға апарған. Сол жерде ас үй пышағын әйеліне бірнеше рет сұғып, кейін денені жасыру үшін көмекке немере інісін шақырған. Күрек ала келуін өтінген.

Кейін екеуі денені жыраға тастап, үстін топырақ, жапырақпен жауып кеткен.

Қылмыскерлер кінәні толық мойындады, олардың қылмысы сараптама қорытындысымен, айғақ заттармен және басқа да іс материалдарымен толық дәлелденді.

Прокурор айыпталушыны 11 жылға, ал оның немере інісін 4 жылға бас бостандығынан айыруды сұрады.

Қылмыстық іс СҚО қылмыстық істер бойынша мамандандырылған ауданаралық сотта қаралды.

Сот үкімі әлі заңды күшіне енген жоқ.