Өскемен тұрғыны темекі шегемін деп пәтерін өртеп алған

Өскеменде оқыс оқиға болды

Өскемен қаласының тұрғыны темекі шегемін деп пәтерін өртеп алды, деп хабарлады turkystan.kz ШҚО төтенше жағдайлар департаменті баспасөз қызметіне сілтеме жасап.

Мәлімет бойынша, 26 қарашада түнгі сағат 3.00 шамасында Гоголь көшесіндегі көпқабатты тұрғын үйде өрт шыққаны жайлы хабар түскен.

«Белгілі болғандай, 2-қабаттағы пәтер өртенді. ТЖД қызметкерлері жедел түрде баспалдақпен 5 тұрғынды, оның ішінде 2 баланы эвакуациялады. Содан кейін үш иінді сатыны орнатып, терезе арқылы пәтер иесін құтқарды. Көп ұзамай өрт сөндірушілердің үйлесімді іс-қимылының арқасында жалпы ауданы 20 шаршы метрді құраған тілсіз жау толықтай ауыздықталды», - делінген ақпаратта.

Қызыл жалынмен күреске барлығы жеке құрамнан 13 адам мен 4 техника тартылған.

Апаттар медицинасы орталығының дәрігерлері тұрғындарды тексеріп, уақтылы алғашқы көмек көрсетті.

Алдын ала дерек бойынша өрттің шығуына – пәтер иесінің темекі шегу кезіндегі абайсыздығы себеп болған.