Биыл ғұлама, этнограф, дінтанушы, қазақтың рухани ұстазы Мәшһүр Жүсіп Көпейұлының туғанына 165 жыл. Осыған орай бүгін ғалымның Астанада 5 томдық таңдамалы жинағының тұсауы кесілді деп хабарлады turkystan.kz.
Еңбектің жарық көруіне белгілі меценат, қоғам қайраткері, «Сенімен болашақ» бірлестік құрылтайшысы Нұркен Асанов бастамашы болып, Мұхтар Әуезов атындағы әдебиет және өнер институты құрастырып шығарған.
Жинақ тілге жеңіл, ғылыми түсініктемесі мен талдауы бар, оқырманға ыңғайлы етіп дайындалған.
Жиында сөз алған ғалым Төреәлі Қыдыр 5 томдыққа Мәшһүр Жүсіптің өлеңдері, ойтолғамдары, аңыз-әпсаналары, дастандары мен діни-ғибраттанамасы енгізілгенін айтып өтті.
Тағы бір маңызды дүние – 5 томдық еліміздегі 100 мектеп, 100 мешіт пен 100 кітапханаға тегін таратылатын болады.
