12 ناۋرىز, 19:32 583 0 قوعام ارايلىم بيمەنديەۆا

قازاقستاندىق سەرجانتتار العاش رەت اقش-تا باق سىنادى

ەلىمىزدىڭ قارۋلى كۇشتەرىنىڭ سەرجانتتارى قازاقستان مەن اقش قورعانىس ۆەدومستۆولارى اراسىنداعى 2020 جىلعا ارنالعان اسكەري بايلانىس جوسپارىنا سايكەس سەرجانتتار قۇرامىنىڭ اسكەري قىزمەتشىلەرى اراسىندا وتەتىن جىل سايىنعى «ۇزدىك جاۋىنگەر-2020» بايقاۋىنا قاتىستى.

اريزون شتاتىنداعى «حۋاچۋك» اسكەري بازاسىندا ۇيىمداستىرىلعان سايىسقا ەلىمىزدىڭ اتىنان 50-گە جۋىق اسكەري قىزمەتشى قاتىستى. قازاقستاندىق تاراپ بۇل سايىسقا العاش رەت شاقىرىلدى.

– اتالعان سايىس سەرجانتتار قۇرامىنىڭ كاسىبيلىگىن ارتتىرۋعا، قازاقستان جانە اقش ۆەدومستۆولارى اراسىنداعى حالىقارالىق اسكەري ىنتىماقتاستىقتى نىعايتۋعا، سونداي-اق اسكەري جارىس تۇرلەرىن ۇيىمداستىرۋ جانە وتكىزۋ ماسەلەلەرىندە شەت ەلدىك ارميالاردىڭ تاجىريبەسىن الۋعا ىقپال ەتەدى. سونىمەن قاتار، الەم ەلدەرى بويىنشا قازاقستان قارۋلى كۇشتەرىنىڭ سەرجانتتىق قۇرامىنىڭ دايىندىق دەڭگەيىن باعالاۋعا مۇمكىندىك بەرەدى، – دەپ اتاپ ءوتتى قازاقستان قارۋلى كۇشتەرىنىڭ باس سەرجانتى شەبەر-سەرجانت تەمىربەك حالىقوۆ.

سايىسقا قاتىسۋشى ءاربىر ۇمىتكەرگە كۇش، شىدامدىلىق، قارۋ-جاراقپەن جۇمىس ىستەۋدىڭ تاجىريبەلىك داعدىلارى، ۇرىس الاڭىندا باعدارلاي ءبىلۋ، جاۋىنگەرلىك جاعدايدا جەكە قۇرامدى باسقارۋ، بيىكتىكتەگى قورقىنىشتى جەڭۋ، تىعىز قارىم-قاتىناس ورناتۋ سىندى تالاپتار قويىلدى.

قازاقستاندىق كوماندا قۇرامىندا «ۇزدىك سەرجانت» اتاعىن الۋعا بۇكىلارميالىق سايىستىڭ، سونداي-اق اسكەري حالىقارالىق ويىندار اياسىندا وتكىزىلەتىن «الەم جاۋىنگەرى» حالىقارالىق كونكۋرسىنىڭ جۇلدەگەلەرى قاتىستى. ولاردىڭ قاتارىندا بۇكىلارميالىق سايىستىڭ بىرنەشە دۇركىن جەڭىمپازى، كوپسايىستان 1-رازريادتى يەمدەنگەن روتا سەرجانتى اعا سەرجانت نۇربول داۋلەتوۆ پەن «الەم جاۋىنگەرى» حالىقارالىق سايىسىنىڭ بىرنەشە دۇركىن جەڭىمپازى سەرجانت ەرتىلەك بەكبولاتوۆ بار. (2018 جىلى 1 ورىن، 2019 جىلى 3-ورىن).

سونداي-اق قاتىسۋشىلار اراسىندا دەنە شىنىقتىرۋ دايىندىعى بويىنشا تەستىلەۋ ەرەكشە قىزىعۋشىلىق تۋدىردى. اقش قارۋلى كۇشتەرىندە سەرجانتتىق قۇرامعا جانە جالپى اسكەري قىزمەتشىلەرگە دەنە شىنىقتىرۋ دايىندىعى بويىنشا تالاپتار جاۋىنگەرلىك ءىس- قيمىلداردى جۇرگىزۋدىڭ قازىرگى زاماناۋي ءىس-قيمىلدارعا سۇيەنە وتىرىپ ۇسىنىلادى.

سوڭعى جاڭالىقتار