26 اقپان 2020, 18:50 472 0 جاھان Túrkistan Gazeti

اقش-تىڭ ىشكى شارۋاسىنا رەسەي ارالاسا الا ما؟

اقش بارلاۋ قىزمەتى رەسەي فەدەراتسياسى بيىلعى جىلدىڭ قاراشا ايىندا وتەتىن پرەزيدەنتتىك سايلاۋعا ارالاسۋعا بەل بۋىپ وتىرعانىن مالىمدەدى.

بارلاۋ قىزمەتىنىڭ بۇل مالىمەتىنە قۇلاق اسقان اقش كونگرەسىنىڭ وكىلدەر پالاتاسى رەسەي مەملەكەتى اقش پرەزيدەنتى دونالد ترامپتى جەڭىسكە جەتكىزۋ ماقساتىندا الدا وتەتىن پرەزيدەنتتىك سايلاۋعا ارالاسۋى مۇمكىن دەپ بولجام جاساۋدا.

مۇنداي تۇجىرىمدى جابىق تۇردە وتكىزىلگەن بريفينگتە جاريا ەتكەنىنە نارازىلىق تۋدىرعان پرەزيدەنت دونالد ترامپ بۇل بولجامدى جوققا شىعاردى. ول مۇنى وزىنە قارسى جاسالعان پارتيزاندىق شابۋىل دەپ باعالاپ، Twitter پاراقشاسىندا: «كونگرەستەگى دەموكراتتار كەزەكتى جالعان اقپارات تاراتىپ وتىر. بۇل رەسەيدىڭ تۇك ىستەمەيتىن، ەكى اپتا وتسە دە ايوۆاداعى داۋىسىن ەسەپتەي الماي وتىرعان الدەبىر دەموكرات كانديداتتاردان مەنى جوعارى قوياتىنىن بىلدىرەدى» دەپ ءوز ويىن ورتاعا سالدى. ترامپ بۇل جازبامەن تىنىشتالىپ قالماي، ءبىر جىل بۇرىن ءوزى قىزمەتكە تاعايىنداعان ۇلتتىق بارلاۋ قىزمەتى باسشىسىنىڭ مىندەتىن اتقارۋشى دجوزەف ماگۋايرعا سوگىس جاريالادى. بۇدان بولەك، بارلاۋ قىزمەتىنىڭ ماماندارى رەسەي ترامپتىڭ سايلاۋ كەزىندەگى باستى قارسىلاسى، ۆەرمونت شتاتىنىڭ سەناتورى بەرني ساندەرسكە دە بۇيرەگى بۇرىپ، كومەكتەسۋگە تىرىسىپ باعاتىنىن مالىمدەدى. قارسىلاسى بولسا دا، مۇنى دا نازاردان تىس قالدىرماعان ترامپ ساندەرس پەن رەسەيدىڭ بايلانىسى جوق ەكەنىن باسا ايتىپ، مۇنىڭ ارتىندا دەموكراتتار تۇرعانىن، ولاردىڭ دەموكراتيانى «ۋلاعىسى» كەلەتىنىن جانە سايلاۋ ناۋقانى كەزىندە جالعان اقپارات تاراتۋعا بارىن سالاتىنىن مالىمدەدى.

ءاليا تىلەۋجانقىزى

سوڭعى جاڭالىقتار