23 اقپان, 19:13 326 0 ءبىلىم انار لەپەسوۆا

ماسانچيداعى مەكتەپتەن ون جىلدا بىردە-ءبىر "التىن بەلگى" يەگەرى شىقپاعان – ساپارباەۆ

قوردايداعى وقيعادان كەيىن جامبىل وبلىسىنىڭ اكىمى بەردىبەك ساپارباەۆ مەكتەپ ديرەكتورلارىنىڭ جۇمىسىن سىنعا الدى. ايماق باسشىسىنىڭ ايتۋىنشا، مەكتەپ ديرەكتورلارى ءوزىن مەنەدجەر ەمەس، سول مەكەمەنىڭ قوجايىنى سياقتى سەزىنەدى. 

بۇل تۋرالى وبلىس اكىمىنىڭ ءباسپاسوز قىزمەتى حابارلادى.

"وقۋ ورىندارىنىڭ كەيبىر باسشىلارى "مەنىڭ مەكتەبىم", "مەنىڭ ۇستازدارىم", "مەنىڭ شاكىرتتەرىم" دەگەن سياقتى تىركەستەردى قولدانىپ، وزدەرىن ۇيىمداستىرۋشى ەمەس، مەنشىك يەسى سەكىلدى سەزىنەدى. مەكتەپ –مەملەكەتتىكى، ال ديرەكتور – اۋىسىپ وتىراتىن باسقارۋشى بولۋى ءتيىس", - دەدى ساپارباەۆ.

اكىم ءبىلىم بەرۋ ۇيىمدارىنداعى جەمقورلىق ماسەلەسىنە دە توقتالدى.

"ديرەكتور جۇمىسقا ورنالاستىرعانى ءۇشىن مۇعالىمنەن اقشا السا، ودان ساپالى جۇمىستى قالاي تالاپ ەتەدى؟ ول مۇعالىم كەيىن ءوز اقشاسىن اتا-انالار ارقىلى قايتارا باستايدى، سىبايلاس جەمقورلىق تىزبەگى وسىلاي جالعاسا بەرەدى", - دەدى ءوڭىر باسشىسى.

ساپارباەۆ ماسانچي اۋىلىنداعى مەكتەپتەن ون جىل بويى بىردە-ءبىر "التىن بەلگى"  نەمەسە ۇزدىك اتتەستات يەگەرى شىقپاعانىن، تەك ءبىر عانا تۇلەكتىڭ گرانتقا قول جەتكىزگەنىن مالىمدەدى.

"مىنە، قوردايداعى وقيعانىڭ تۇپكى سەبەبىن وسىدان ىزدەۋ كەرەك. بۇل ساپالى ءبىلىم مەن جاس ۇرپاقتى تاربيەلەۋ، ۇلتتىق داستۇرلەردەن الشاقتاۋ، مادەني-بۇقارالىق ءىس-شارالاردى ۇيىمداستىرۋ دەڭگەيىنىڭ تومەندىگىن كورسەتەرى ءسوزسىز", - دەدى ول.

اكىمنىڭ ايتۋىنشا، تاربيە وتباسى مەن مەكتەپتەن باستالادى، الايدا سوڭعى ۋاقىتتا وسى الەۋمەتتىك ينستيتۋتتار اراسىنداعى بايلانىس ۇزىلگەن.

ساپارباەۆ مەملەكەت مۇعالىمدەردىڭ الەۋمەتتىك جانە ەڭبەك جاعدايىن جاقسارتۋ ءۇشىن ماڭىزدى قادامدار جاساپ جاتقانىن، ال قوعام ولاردان ساپالى ءبىلىم بەرۋدى تالاپ ەتەتىنىن اتاپ ءوتتى.

كەزدەسۋ سوڭىندا اكىم جاۋاپتى تۇلعالاردى باق پەن الەۋمەتتىك جەلىلەردەگى سىني ەسكەرتپەلەرگە جەدەل ءارى مۇقيات دەن قويۋعا شاقىردى.

ەسكە سالا كەتەيىك، 7 اقپاندا جامبىل وبلىسىنىڭ قورداي اۋدانىندا جاپپاي تارتىپسىزدىك بەلەڭ الىپ، سالدارىنان 10 ادام قازا بولدى، 185 ادام ءتۇرلى دەنە جاراقاتىن الدى. ماسانچي اۋىلىندا 11 اقپاندا ءۇيىندى استىنان كۇيىپ كەتكەن تاعى ءبىر ادامنىڭ ءمايىتى تابىلدى.

سونداي-اق، 39 تۇرعىن ءۇي مەن 20 كوممەرتسيالىق نىسان جانە 47 اۆتوكولىك وتقا ورانىپ، كۇلگە اينالدى. 

 

 

سوڭعى جاڭالىقتار