18 اقپان, 10:23 447 0 جاڭالىقتار اسىل تۇمار

باۋىرجان بايبەك پاۆلودار وبلىسىنىڭ تۇرعىندارىمەن كەزدەسىپ، وڭىردەگى وزەكتى ماسەلەلەردى تالقىلايدى

سۋرەت عالامتوردان الىندى
سۋرەت عالامتوردان الىندى

«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك پاۆلودار وبلىسىنا جۇمىس ساپارىمەن باردى. 

ەلباسى، «Nur Otan» پارتياسىنىڭ كوشباسشىسى نۇرسۇلتان نازارباەۆتىڭ تاپسىرماسى بويىنشا ۇكىمەتپەن جانە وڭىرلىك فيليالدارمەن بىرگە اۋدانداردى، قالالار مەن وبلىستاردى دامىتۋدىڭ 5 جىلعا ارنالعان جاڭا باعدارلامالارىن ازىرلەۋ ماقساتىندا دايىندىق جۇمىستارى جۇرگىزىلۋدە.

وسىعان وراي، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك باستاعان جۇمىس توبى ەلىمىزدىڭ بۇكىل ءوڭىرىن ارالاپ، جەرگىلىكتى حالىقتى تولعاندىرىپ جۇرگەن ماسەلەلەردى زەرتتەۋگە كىرىسكەن بولاتىن.

پارتيا توراعاسىنىڭ ءبىرىنشى ورىنباسارى باۋىرجان بايبەك ءوزىنىڭ فەيسبۋك-پاراقشاسىندا:

– ايماقتارعا ساپارىمدى جالعاستىرۋدامىن. بۇگىن جانە ەرتەڭ پاۆلودار وبلىسىنىڭ بىرقاتار شالعاي ەلدىمەكەندەرىنىڭ تۇرعىندارىمەن كەزدەسىپ، سول جەردە كوكەيكەستى ماسەلەلەردى تالقىلاپ، ولاردىڭ شەشىمىن بىرگە تابۋدى جوسپارلاپ وتىرمىن.

پارتيانىڭ قوعامدىق قابىلداۋ بولمەلەرىنە پاۆلودارلىقتاردان كەلىپ تۇسكەن وتىنىشتەرگە جانە الەۋمەتتىك جەلىلەر مەن باق-تاعى اقپاراتتارعا تالداۋ جاساۋ ارقىلى ءبىز مەملەكەت تاراپىنان شەشىمىن كۇتكەن ءبىرىنشى كەزەكتەگى مىندەتتەردىڭ اۋقىمىن انىقتادىق. اتاپ ايتقاندا، بۇل – الەۋمەتتىك قامسىزداندىرۋ، ءبىلىم بەرۋ، دەنساۋلىق ساقتاۋ، قورشاعان ورتانىڭ ساپاسى، سونداي-اق، تۇرعىن ءۇي قورىنىڭ ماردىمسىز جاعدايى، ەلدى مەكەندەردى اباتتاندىرۋ جانە تاعى دا باسقا كوپتەگەن ماسەلەلەر.

سۋرەت ب.بايبەكتىڭ پاراقشاسىنان الىندى

ازاماتتارىمىزدى الاڭداتىپ وتىرعان ماسەلەلەر بۇگىندە ازىرلەنىپ جاتقان ايماقتى دامىتۋدىڭ 5 جىلدىق باعدارلاماسىنا ەنگىزىلەدى. ءبىز ءار قالانى، اۋداندى جانە اۋىلدى قامتۋدى جوسپارلاپ وتىرمىز. وسى باعىتتاعى جۇمىستاردى پارتيا ورتالىق جانە جەرگىلىكتى مەملەكەتتىك ورگاندارمەن بىرلەسە وتىرىپ بىرنەشە ايدان بەرى جۇرگىزىپ تە كەلەدى. «Nur Otan» ءتۇيىندى ماسەلەلەرگە قۇلاق اسىپ قانا قويماي، ولاردى شەشۋ ءۇشىن ناقتى شارالاردى قولعا الۋى كەرەك. ول ءۇشىن بىزدە قاجەتتى رەسۋرستار بار، ەڭ باستىسى، قاراپايىم حالىق قولداپ وتىر، – دەپ جازدى.

 

سوڭعى جاڭالىقتار